1 Juan 3

Ñayiu ka kuu seꞌe ia Dios

1Vi kondiaꞌa ni naxa kutoo ña Tata Dios, ja vi konanio seꞌe maa ya, te saa ka kuo. Te yun guaa tu ka jini ña ñayiu ñuyiu jion, chi tu ni ka jini ia Dios. 2Ñani kuaꞌa ja kutoo ña san, ja seꞌe maa ia Dios ka kuo, te chiaꞌan ka ja skuni kaji ña maa ya naxa vi koo nuu ndajiokuiin ya. Su ka jinio ja nuu na ndenta maa Jesukristu, te vi koo nagua oo maa ya, chi vi kunio ya, nagua oo nagua kaa ya. 3Te ndiꞌi ñayiu ja ka ndetu kaꞌnu nuu ndajiokuiin Jesukristu, chi siun ni ka ndasavii anui, nagua oo maa ya ja ia vii kuu ya.

4Te ndiꞌi ñayiu ka saꞌa yika kuechi, ka jiso kavai Ley ia Dios, chi yika kuechi yun saꞌa ja jiso kavao Ley ya. 5Te ja ka jini maa ni ja ni kii Jesukristu ñuyiu yaꞌa ja ni kindee ya yika kuechio, te tu saꞌun na yika kuechi maa ya. 6Te ndiꞌi ñayiu ja siun ni ka oi jin ya, tu na yika kuechi ka saꞌa kai. Su ndiꞌi ñayiu ja ka saꞌa ni yika kuechi, ni ja tu ka jini ya, te ni tu ka jinkuiꞌnu ini na ia kuu ya. 7Te maa ni ja ka kuu ni na kuinio seꞌe san, vi koto ni maa ni ja ni in ñayiu ma vi xndaꞌu ña, chi ñayiu saꞌa tniuu ndaa, te sui kuu ñayiu ndaa, nagua oo maa ya ja ia ndaa kuu ya. 8Su ñayiu saꞌa ni yika kuechi, te oi nuu ndaꞌa Tachi, chi Tachi kuu ja saꞌa yika kuechi ndee jaxtnañuꞌu nuu ni junkoo ñuyiu. Te yun guaa ni kii Seꞌe ia Dios ja ni xnaa ya tniuu saꞌa Tachi yun.

9Te ndiꞌi ñayiu ja ka kuu seꞌe ia Dios, tu ka saꞌa kai yika kuechi, chi ndikin tata maa Dios ka kui, te siun ni ka oi nuu ya, te ma kuu vi kondikin kai ichi yika kuechi, chi seꞌe maa Dios ka kui. 10Te yaꞌa kuu nuu ka xneꞌi mai ndei ka kuu seꞌe ia Dios, te ndei ka kuu seꞌe Tachi, chi ndiꞌi ñayiu tu ka saꞌa tniuu ndaa, te tu ka kaꞌan toi ñani, te masu seꞌe Dios ka kui.

Na vi kaꞌan too tnaꞌo

11Chi yaꞌa kuu tnoꞌo ja ni ka jini soꞌo maa ni ndee jaxtnañuꞌu, ja na vi kaꞌan too tnaꞌo. 12Te ma vi saꞌo nagua ni saꞌa Caín, ja ni oo de nuu ndaꞌa Tachi, te ni jaꞌni de ñani de. ¿Te na jaꞌa kuu ja ni jaꞌni ña de? Chi tniuu kueꞌe ni osaꞌa de, te ñani de, chi tniuu ndaa ni osaꞌi.

13Ñani vi kuaꞌa maa san ja ka skuaꞌo, ma vi kukuiꞌa ini ni nuu ja ka kaꞌan uꞌu ña ñayiu ñuyiu jin ni. 14Su yoon, chi ka jinio ja ni ka okuo na kuinio ndiyi, su vitna te ka tekuo, chi ka kaꞌan too in in ñanio. Te ñayiu tu kaꞌan too in ñani, te kui na kuinio ndiyi nuu ya. 15Chi ndiꞌi ñayiu ja kaꞌan uꞌu in ñani, te kui na kuinio in ñayiu jaꞌni ndiyi, te ka jini guaꞌa maa ni ja ni in ñayiu jaꞌni ndiyi, ma niꞌi taꞌui ja kotekui nikuii nikani. 16Te yaꞌa kuu nuu ka jinio naxa ka kaꞌan too tnaꞌo, chi ni soko Jesukristu maa ya ja jaꞌa in ion, te suni yoon, na vi soko mao vi guaa ndee na vi kuo ja jaꞌa ñayiu ka skuaꞌa. 17Su nuu ja ndee ñayiu nevaꞌa nagua oo nuu ñuyiu yaꞌa, te ndiaꞌi in ñani ja kundaꞌu kukee ñayiu yun, te kuxii nagua nevaꞌi, ¿nuu saa te naxa koo ja kaꞌan too ia Dios ini anui? 18Te maa ni ja ka kuu ni na kuinio seꞌe maa san, ma vi kaꞌon ja ka kaꞌan too tnaꞌo jin tnoꞌo uun suaꞌa ni, chi vi na vi saꞌa ndaa ndijao.

19Te yaꞌa kuu nuu ka jinio ja ka kuo in ñayiu ndaa, te ka kukanu inio jin anuo ja ka oo guaꞌo nuu ia Dios. 20Su nuu ja anuo xtavi kuechi ña na in jakueꞌe ka saꞌo, te kaꞌnu ka kuu ia Dios saa anuo, te maa ya, chi jini ya ndiꞌi nagua ka saꞌo. 21Ñani kuaꞌa ja kaꞌan too ña san, nuu ja anuo, tu nagua xtavi kuechi ña, nuu saa te ka kukanu inio ja vi kuyatnio nuu ia Dios. 22Te nani guaa kuu ja ka jikaon nuu ya, te vi niꞌo, chi ka jantnoꞌo nagua tatnuni ya, te ka saꞌo nagua junkuaan ini ya. 23Te tnoꞌo yaꞌa kuu ja tatnuni ya, ja na vi kandijao sivi Seꞌe maa ya Jesukristu, te na vi kaꞌan too tnaꞌo, nagua ni tatnuni ya ja vi saꞌo. 24Te ñayiu ka jantnoꞌo nagua tatnuni maa ia Dios, chi siun ni ka oi jin ya, te suni siun ni oo ya jin. Te yaꞌa kuu nuu ka jinio ja ka oo jin ya, chi ni taa ya Espíritu ya ja oo ini anuo.

Currently Selected:

1 Juan 3: xtnNTplus

Highlight

Copy

Compare