MAT 15
15
Yahudiyailu la landa koilu
1Wo kɔ rɔ, Farisi doilu ni sariya karanmɔɔ doilu bɔra Jerusalɛmu ka na Isa tɛrɛn. 2Ii ka a maɲininka ko: «Nfenna i la karandenilu ye an benbailu la landa tiɲanna? Ii ye dɔɔnnin kɛla ka a tɛrɛn ii ma ii bolo lako fɔlɔ.» 3Isa ka a fɔ ii yɛ ko: «Ai don? Nfenna ai ye ai la landailu bonyala ka Alla la sariya tiɲan? 4Baa Alla ka a fɔ ko: ‹I ye i na ni i fa bonya.› Ko: ‹Ni mɔɔ mɛn ka a fa wala a na danka, wo tii ka kan ka faa le.› 5Kɔni ai ka a fɔ ko mɔɔ ri se a fɔla a fa wala a na yɛ ko: ‹I ka kan ka dɛmɛnfen mɛn sɔrɔn n bolo, n da wo bila a dan na Alla yɛ.› 6Ai ka a fɔ ko ni a ka a fɔ ten, a diyagboyani tɛ butun ka a fa bonya niilifen na. Wo rɔ, ai ra Alla la kuma to ye, ka ai la landailu bila a nɔ rɔ. 7Ai jɛrɛmayuwailu, Nabi Esayi ka mɛn fɔ ai la ko rɔ fɔlɔfɔlɔ, wo bɛnni kosɛbɛ. A ka a fɔ ko:
8‹Mɔɔ ɲinilu ye n bonyala ii da le la,
kɔni ii jusukun ma senin n na muumɛ!
9Ii ye n batola fuu.
Ii ye mɔɔilu karanna mɛnilu la,
woilu tɛ foyi ri fɔɔ adamadenilu la jamariliilu.›»
Fen mɛnilu ye mɔɔ nɔɔla
10Wo kɔ rɔ, Isa ka jama kili, ka a fɔ ii yɛ ko: «Ai bɛɛ ye ai tolo malɔ n na kuma la ka a famun. 11Mɔɔ ye fen fen donna a da rɔ ka a dɔɔn, wo si ti se mɔɔ nɔɔla. Kɔni mɛnilu ye bɔla mɔɔ da rɔ, wo le ye mɔɔ nɔɔla.»
12A la karandenilu ka ii madon a la, ka a fɔ a yɛ ko: «I ma a lɔn ko i la kuma gbara Farisilu la wa?» 13Isa ka a fɔ ko: «N Fa mɛn ye sankolo rɔ, ni wo jɛrɛ ma lannifen mɛn lan, woilu ri bɔ ka faa. 14Ai ye Farisilu to ye. Ii ye ɲa fuyenilu le ri, ii jɛrɛ le ye i ɲɔɔn na gbeleke mirabailu ri. Ni ɲa fuyen don ka ɲa fuyen do la gbeleke mira, ii fila bɛɛ ri be denka rɔ.»
15Piyɛri ka a fɔ Isa yɛ ko: «Kuma kɔrɔlama wo kɔrɔ fɔ an yɛ.» 16Isa ka a fɔ ko: «A ye di? Ai fanan ma se ko ɲayenna wa? 17Ai ma a ɲayen wa ko fen mɛn ye donna mɔɔ da rɔ, wo ye wala a kɔnɔ le rɔ? Mɔɔ wo wa wa kɔkan, fen wo ri bɔ. 18Kɔni kuma mɛnilu ye bɔla mɔɔ da rɔ, woilu ye bɔla a jusukun de rɔ. Woilu le ye mɔɔ nɔɔla, 19baa ko kɔrɔn mɛn ye bɔla mɔɔ jusukun dɔ, woilu le ɲin di: miriya juu, mɔɔfaa, kaninkɛla, jatɔya su bɛɛ, suɲali, sereya juu bɔ, a ni mɔɔ tɔɔ tiɲan. 20Ko woilu le ye mɔɔ nɔɔla. Kɔni ka dɔɔnnin kɛ bolo lakobali la, wo tɛ mɔɔ nɔɔla.»
Siya gbɛrɛ muso do lara Isa la
21Wo kɔ rɔ, Isa bɔra yɔrɔ wo rɔ ka wa Tiri ni Sidɔn mara rɔ. 22Ye muso do nara Isa tɛrɛn. Kanaanka le tɛrɛ a ri. A tɛrɛ ye a kule kan nabɔla ko: «Maari, Dawuda dencɛ, i ye hina n na. Jina do ye n denmuso tɔrɔla kojuuya!» 23Kɔni Isa ma foyi fɔ. A la karandenilu ka ii madon a la, ka a madiya ko: «Muso ɲin gben, a bilani an kɔfɛ ka a kule kan nabɔ kojuuya.» 24Isa ka a fɔ ko: «Alla ma n kelaya mɔɔ gbɛrɛ si ma ni Isirayɛlikailu tɛ, woilu mɛnilu ye ikomin saa tununnilu.» 25Kɔni muso wo nara a be Isa sen kɔrɔ, ka a fɔ a yɛ ko: «Maari, i ye n dɛmɛn.» 26Isa ka a fɔ ko: «Ka denninilu la dɔɔnnin ta ka a lafili wuluilu kɔrɔ, wo ti bɛn.» 27Muso ka a jabi: «Maari, tuɲa le wo ri. Kɔni wuluilu ye dɔɔnnin buruburu dɔɔnna, mɛn ye bela duu ma ii tiilu la tabali kɔrɔ.» 28Isa ka a jabi: «Aa, muso. I la lemɛniya ka bon! I ka mɛn ɲinin, a ye kɛ i yɛ.» A denmuso kɛndɛyara wo waati kelen.
Isa ka jankarɔto siyaman nakɛndɛya
29Isa bɔra yɔrɔ wo rɔ, ka wa Kalile Dala da la. A yɛlɛra koyinkɛ do kan ka a sii ye. 30Jama ba nara a tɛrɛn. Ii nara nambarailu ri, a ni ɲa fuyenilu ni bolokelenilu ni boboilu ni jankarɔto siyaman gbɛrɛilu. Ii nara woilu bɛɛ ri, ka ii lala Isa kɔrɔ. A ka ii bɛɛ lakɛndɛya. 31Ii ka ii yen tuma mɛn na ko boboilu ra kuma damira, bolokelenilu ra kɛndɛya, nambarailu ra ii taama, a ni ɲafuyenilu ɲa ra laka; jama kabannakoyara. II bɛɛ ka Isirayɛlikailu la Maari Alla tando.
Isa ka dɔɔnnin di mɔɔ waa naanin ma
32Isa ka a la karandenilu kili, ka a fɔ ii yɛ ko: «Jama ɲin kininkinin ye n na. Ii ra tele sawa le kɛ n dafɛ yan. Dɔɔnnifen si tɛ ii bolo. N tɛ a fɛ ka sila di ii kɔnkɔtɔ ma ten. Ni wo tɛ, ii ri kirɔn ii la sila la.» 33Karandenilu ka Isa jabi: «An di buru sɔrɔn mi wula kɔndɔ yan, mɛn di jama ba ɲin ɲɔɔn bɔ?» 34Isa ka a fɔ ii yɛ ko: «Burukala yɛli ye ai bolo?» Ii ka a fɔ ko: «Burukala wɔrɔnwula, a ni jɛɛ mɛsɛnni dando»
35Isa ka a fɔ jama yɛ ko ii ye ii sii duu ma. 36A ka burukala wɔrɔnwula ni jɛɛ woilu ta, ka baraka bila Alla yɛ, ka ii rakadikadi, ka ii di karandenilu ma. Karandenilu ka woilu ta ka ii ratalatala jama tɛma. 37Jama bɛɛ ka dɔɔnnin kɛ ka ii fa. Buru kunkundun ni jɛɛ tɔ mɛn toni, Isa la karandenilu ka see wɔrɔnwula lafa wo rɔ. 38Cɛɛ mɔɔ waa naanin ka dɔɔnnin kɛ. Musoilu ni denninilu ma jate. 39A ka sila di jama ma, Isa donda kulun do kɔndɔ ka wa Makadan mara rɔ.
Currently Selected:
MAT 15: AKS
Highlight
Share
Copy
Want to have your highlights saved across all your devices? Sign up or sign in
© 2022 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/
