Tutui Makasososak 36
36
Esau tititi-nonosin nara
1Ia Esau tititi-nonosin nara. Naden laen ndia Edom. 2Esau sao ana feꞌok Kanaꞌan dua, esa hatahori Het, ndia Elon ana inan, nade Ada. Sao kaduan, hatahori Hewi, nade Oholibama. Aman nade Anah, ma baꞌin nade Sibeon. 3Esau oo sao nala Ismael ana inan, nade Basmat. Basmat kaꞌa toun, nade Nebayot.
4Esau sao ulun, Ada, bonggi Elifas. Basmat bonggi Rehuel. 5Boe ma Oholibama bonggi Yeus, Yalam, ma Kora. Bonggi basa Esau anan nara ruma nusa Kanaꞌan.
6Laꞌe esa, Esau lali neni nusak laen esa neu dook ka numa Yakob mai. Ana nuni noo sao-anan nara, hatahori mana maue-osan, banda-manun ma ndia hata-heton nara lalaꞌen. 7Esau nabingga-baꞌek no Yakob, nahuu sira banda-manun ma hata-heton nara noꞌun seli. Dadi ara leo-laꞌo rakaseseꞌe nai nusak naa. 8Boe ma Esau (ndia Edom), neu leo nusa mbuku-letek nai Seir.
9Ia, Esau tititi-nonosin fo ara rae, ‘hatahori Edom’. Ara leo numa nusa mbuku-letek nai Seir.
10-13Esau saon Ada, bonggi nala anak touk esa, nade Elifas. Elifas ana toun nara lima. Sira: Teman, Omar, Sefo, Gatam, ma Kenas. Elifas sao tian, nade Timna. Ana bonggi nala ana touk esa, nade Amalek.
Esau saon mana nade Basmat, bonggi nala ana touk esa, nade Rehuel. Rehuel bonggi nala ana touk haa, sira: Nahat, Sera, Syama, ma Misa.
14Esau saon Oholibama, fo ndia Anah anan, fo Sibeon umbun naa, bonggi nala ana touk telu, sira: Yeus, Yalam, ma Kora.
15-16Esau umbu-anan nara ratanggela dadi reu leo noꞌuk ka. Esa-esak no sira mane leon. Esau ana ulun Elifas anan nara, dadi reu mane leo Teman, mane leo Omar, mane leo Sefo, mane leo Kenas, mane leo Kora, mane leo Gatam, ma mane leo Amalek. Sira basa sara raa, Esau no saon Ada tititi-nonosin.
17Esau anan Rehuel anan nara, dadi mane leo Nahat, mane leo Sero, mane leo Syama, ma mane leo Misa. Sira basa sara raa, Esau no saon Basmat tititi-nonosin.
18Esau no saon Oholibama anan nara, dadi mane leo Yeus, mane leo Yalam, ma mane leo Kora.
19Basa leor raa lalaꞌen, Esau tititi-nonosin.
Seir tititi-nonosin nara
20-21Numa mamanak naa oo hambu hatahori Hori esa boe, nade Seir. Anan nara ratanggela dadi leo noꞌuk ka. Esa-esak no sira mane leon. De ndia anan nara dadi mane leo Lotan, mane leo Sobal, mane leo Sibeon, mane leo Anah, mane leo Dison, mane leo Eser, ma mane leo Disan.
22Lotan anan, sira: Hori ma Heman (Lotan feton, Timna).
23Sobal anan nara, sira: Alwan, Manahat, Ebal, Sefo ma Onam.
24Sibeon anan nara, sira: Aya no Anah. Anah naa, ndia natonggo oe mata katobik numa mamana nees, neu ana lolo aman keledein nara.
25-26Anah ana inan ndia Oholibama, ma ana toun ndia, Dison. Dison anan nara, sira: Hemdan, Esban, Yitran, ma Keran.
27Eser anan nara, sira: Bilhan, Saꞌawan, ma Akan.
28Disan anan nara, sira: Us ma Aran.
29-30Dadi mane leor hatahori Horir raa, sira: Lotan, Sobal, Sibeon, Anah, Dison, Eser, ma Disan. Sira basa sara leo numa nusa Seir.
Edom mane-manen nara
31Neu nusa Israꞌel bei ta hambu manek, nai dae Edom hambu manek kara ena. Sira naden nara tungga-tungga, sira:
32Ara soꞌu Beor anan, nade Bela, dadi manek numa kota Dinhaba.
33Neu Bela maten, boe ma Yobab hene dadi manek nggatin. Ndia aman, nade Sera numa nggorok Bosra mai.
34Neu Yobab maten, boe ma Husam hene dadi manek nggatin. Husam naa, numa hatahori Teman nara nusan mai.
35Neu Husam maten, boe ma Hadad hene dadi manek nggatin. Ndia aman, nade Bedad numa nggorok Awit mai. (Ana ndia nasenggi hatahori Midian neu lelek fo ara ratati numa Moab.)
36Neu Hadad maten, boe ma Samla hene dadi manek nggatin. Samla naa, numa nggorok Masreka mai.
37Neu Samla maten, boe ma Saul hene dadi manek nggatin. Saul naa, numa nggorok Rehobot nai lee tatain mai.
38Neu Saul maten, boe ma Baꞌal-Hanan hene dadi manek nggatin. Ndia aman, nade Akbor.
39Neu Baꞌal-Hanan maten, boe ma Hadar hene dadi manek nggatin. Hadar naa, numa nggorok Pau mai. Saon nade Mehetabel. Mehetabel aman, nade Matret. Ma ndia baꞌin, nade Mesahab.
40-43Dadi mane leor mana konda numa Esau sara mai, sira: Timna, Alwa, Yetet, Oholibama, Ela, Pinon, Kenas, Teman, Mibsar, Magdiel, ma Iram. Sira esa-esak foi sira nusan nara tungga sira nade heli-helin.
Dadi basa naar, tutuik laꞌe-neu Esau tititi-nonosin, ndia hatahori Edom mara.
Currently Selected:
Tutui Makasososak 36: txqNTPO
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. in cooperation with (UBB) Unit Bahasa dan Budaya