G̣azalu’l G̣azalát 8
8
1Kásh ki tú mere bháí kí mánind hotá,
Jis ne merí máṉ kí chhátiyoṉ se dúdh piyá.
Maiṉ tujhe jab báhar pátí, to terí machchhiyáṉ letí;
Aur koí mujhe haqír na jántá.
2Maiṉ tujh ko apní máṉ ke ghar meṉ le játí,
Wuh mujhe sikhátí;
Maiṉ apne anároṉ ke ras se
Tujhe mamzúj mai pilátí.
3Us ká báyáṉ háth mere sir ke níche hotá,
Aur dahiná mujhe gale se lagátá.
4Ai Yarúshalem kí beṭiyo, maiṉ tum ko qasam detí húṉ,
Ki tum mere piyáre ko na jagáo, na uṭháo,
Jab tak ki wuh uṭhná na cháhe.
5Yih kaun hai jo biyábán se
Apne mahbúb par takiya kiye chalí átí hai?
Maiṉ ne tujhe seb ke daraḳht ke níche jagáyá:
Jaháṉ terí wiládat húí,
Jaháṉ terí wálida ne tujhe janam diyá.
6Nagín kí mánind mujhe apne dil meṉ lagá rakh, aur ta‘wíz kí mánind apne bázú par;
Kyúṉki ‘ishq maut kí mánind zabardast hai;
Aur g̣airat pátál se bemuruwwat hai.
Us ke shu‘le ág ke shu‘le haiṉ,
Aur Ḳhudáwand ke shu‘le kí mánind.
7Sailáb ‘ishq ko bujhá nahíṉ saktá,
Báṛh us ko ḍubá nahíṉ saktí;
Agar ádmí mahabbat ke badle apná sab kuchh de ḍále,
To wuh sarásar hiqárat ke láiq ṭhahregá.
8Hamárí ek chhoṭí bahin hai,
Abhí us kí chhátiyáṉ nahíṉ uṭhíṉ;
Jis roz us kí bát chale,
Ham apní bahin ke liye kyá kareṉ?
9Agar wuh díwár ho,
To ham us par chándí ká burj banáeṉge;
Aur agar wuh darwáza ho,
To ham us par deodár ke taḳhte lagáeṉge.
10Maiṉ díwár húṉ aur merí chhátiyáṉ burj haiṉ;
Aur maiṉ us kí nazar meṉ salámatíyáfta kí mánind thí.
11Ba‘l Hámún meṉ Sulaimán ká tákistán thá;
Us ne us tákistán ko bág̣bánoṉ ke supurd kiyá,
Ki un meṉ se har ek us ke phal ke badle hazár misqál chándí adá kare.
12Merá tákistán jo merá hí hai, mere sámne hai:
Ai Sulaimán, tú to hazár le,
Aur us ke phal ke nigahbán do sau páeṉ.
13Ai bostán meṉ rahnewalí,
Rafíq terí áwáz sunte haiṉ;
Mujh ko bhí suná.
14Ai mere mahbúb, jaldí kar,
Aur us g̣azál yá áhú bachche kí mánind ho já,
Jo balsání paháṛiyoṉ par hai.
Currently Selected:
G̣azalu’l G̣azalát 8: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
