Rút 2
2
1Aur Na‘omí ke shauhar ká ek rishtadár thá jo Ilímalik ke gharáne ká; aur baṛá máldár thá; aur us ká nám Bo‘az thá. 2So Moábí Rút ne Na‘omí se kahá, Mujhe ijázat de, to maiṉ khet meṉ jáúṉ, aur jo koí karam kí nazar mujh par kare, us ke píchhe píchhe báleṉ chunúṉ. Us ne us se kahá, Já, merí beṭí. 3So wuh gayí, aur khet meṉ jákar káṭnewáloṉ ke píchhe báleṉ chunne lagí: aur ittifáq se wuh Bo‘az hí ke khet ke hisse meṉ já pahuṉchí, jo Ilímalik ke ḳhándán ká thá. 4Aur Bo‘az ne Baitlahm se ákar káṭnewáloṉ se kahá, Ḳhudáwand tumháre sáth ho. Unhoṉ ne use jawáb diyá, Ḳhudáwand tujhe barakat de. 5Phir Bo‘az ne apne us naukar se jo káṭnewáloṉ par muqarrar thá púchhá, Yih kis kí laṛkí hai? 6Us naukar ne jo káṭnewáloṉ par muqarrar thá jawáb diyá, Yih wuh Moábí laṛkí hai jo Na‘omí ke sáth Moáb se áí hai. 7Us ne mujh se kahá thá, ki Mujh ko zará káṭnewáloṉ ke píchhe púliyoṉ ke bích meṉ báleṉ chunkar jama‘ karne de. So yih ákar subh se ab tak yahíṉ rahí, faqat zará sí der ghar meṉ ṭhahrí thí. 8Tab Bo‘az ne Rút se kahá, Ai merí beṭí, kyá tujhe sunáí nahíṉ detá? Tú dúsre khet meṉ báleṉ chunne ko na jáná, aur na yaháṉ se nikalná, balki merí chhokriyoṉ ke sáth sáth rahná. 9Is khet par jise wuh káṭte haiṉ terí áṉkheṉ jamí raheṉ, aur tú un hí ke píchhe píchhe chalná. Kyá maiṉ ne in jawánoṉ ko hukm nahíṉ kiyá, ki wuh tujhe na chhúeṉ? aur jab tú piyásí ho, to bartanoṉ ke pás jákar usí pání meṉ se píná jo mere jawánoṉ ne bhará hai. 10Tab wuh auṉdhe muṉh girí, aur zamín par sarnigún hokar us se kahá, Kyá bá‘is hai, ki tú mujh par karam kí nazar karke merí ḳhabar letá hai, háláṉki maiṉ pardesí húṉ? 11Bo‘az ne use jawáb diyá, ki Jo kuchh tú ne apne ḳháwind ke marne ke ba‘d apní sás ke sáth kiyá hai, wuh sab mujhe púre taur par batáyá gayá hai, ki tú ne kaise apne máṉ báp aur zádbúm ko chhoṛá, aur un logoṉ meṉ jin ko tú is se peshtar na jántí thí áí. 12Ḳhudáwand tere kám ká badla de, balki Ḳhudáwand Isráíl ke Ḳhudá kí taraf se, jis ke paroṉ ke níche tú panáh ke liye áí hai, tujh ko púrá ajr mile. 13Tab us ne kahá, Ai mere málik, tere karam kí nazar mujh par rahe; kyúṉki tú ne mujhe dilásá diyá, aur mihr ke sáth apní lauṉḍí se báteṉ kíṉ, agarchi maiṉ terí lauṉḍiyoṉ meṉ se ek ke barábar bhí nahíṉ. 14Phir Bo‘az ne us se kháne ke waqt kahá, ki Yaháṉ á, aur roṭí khá, aur apná niwála sirke meṉ bhigo. Tab wuh káṭnewáloṉ ke pás baiṭh gayí: aur unhoṉ ne bhuná húá anáj us ke pás kar diyá; so us ne kháyá, aur ser húí, aur kuchh rakh chhoṛá. 15Aur jab wuh báleṉ chunne uṭhí, to Bo‘az ne apne jawánoṉ se kahá, ki Use púliyoṉ ke bích meṉ bhí chunne dená, aur use malámat na karná. 16Aur us ke liye gaṭṭharoṉ meṉ se thoṛá sá nikálkar chhoṛ dená, aur use chunne dená, aur jhiṛakná mat. 17So wuh shám tak khet meṉ chuntí rahí, aur jo kuchh us ne chuná thá use phaṭká, aur wuh qaríb ek aifah jau niklá. 18Aur wuh use uṭhákar shahr meṉ gayí, aur jo kuchh us ne chuná thá, use us kí sás ne dekhá: aur us ne wuh bhí jo us ne ser hone ke ba‘d rakh chhoṛá thá nikálkar apní sás ko diyá. 19Us kí sás ne us se púchhá, Tú ne áj kaháṉ báleṉ chuníṉ, aur kaháṉ kám kiyá? Mubárak ho wuh jis ne terí ḳhabar lí. Tab us ne apní sás ko batáyá ki us ne kis ke pás kám kiyá thá, aur kahá, ki Us shaḳhs ká nám jis ke háṉ áj maiṉ ne kám kiyá Bo‘az hai. 20Na‘omí ne apní bahú se kahá, Wuh Ḳhudáwand kí taraf se barakat páe jis ne zindoṉ aur murdoṉ se apní mihrbání báz na rakkhí. Aur Na‘omí ne us se kahá, ki Yih shaḳhs hamáre qaríbí rishte ká hai, aur hamáre nazdík ke qarábatíoṉ meṉ se ek hai. 21Moábí Rút ne kahá, Us ne mujh se yih bhí kahá thá, ki Tú mere jawánoṉ ke sáth rahná jab tak wuh merí sárí fasl káṭ na chukeṉ. 22Na‘omí ne apní bahú Rút se kahá, Merí beṭí, yih achchhá hai, ki tú us kí chhokriyoṉ ke sáth jáyá kare, aur wuh tujhe kisí âur khet meṉ na páeṉ. 23So wuh báleṉ chunne ke liye jau aur gehúṉ kí fasl ke ḳhátime tak Bo‘az kí chhokriyoṉ ke sáth sáth lagí rahí, aur wuh apní sás ke sáth rahtí thí.
Currently Selected:
Rút 2: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)