Zabúr 144
144
Dáúd ká Mazmúr.
1 Ḳhudáwand, merí chaṭán, mubárak ho,
Jo mere háthoṉ ko jang karná
Aur merí unglíoṉ ko laṛná sikhátá hai.
2Wuh mujh par shafaqat karnewálá aur merá qil‘a hai:
Merá úṉchá burj aur merá chhuṛánewálá:
Wuh merí sipar aur merí panáhgáh hai,
Jo mere logoṉ ko mere tábi‘ kartá hai.
3Ai Ḳhudáwand, insán kyá hai ki tú use yád rakkhe?
Aur ádamzád kyá hai ki tú us ká ḳhayál kare?
4Insán butlán kí mánind hai:
Us ke din ḍhalte sáye kí mánind haiṉ.
5Ai Ḳhudáwand, ásmánoṉ ko jhukákar utar á:
Paháṛoṉ ko chhú to un se dhuwáṉ uṭhegá.
6Bijlí girákar un ko paráganda kar de:
Apne tír chalákar un ko shikast de.
7Úpar se háth baṛhá;
Mujhe riháí de aur baṛe sailáb
Ya‘ní pardesiyoṉ ke háth se chhuṛá,
8Jin ke muṉh se batálat nikaltí rahtí hai,
Aur jin ká dahiná háth jhúṭh ká dahiná háth hai.
9Ai Ḳhudá, maiṉ tere liye nayá gít gáúṉgá:
Das tárwálí barbat par maiṉ terí madhsaráí karúṉgá.
10Wuhí bádsháhoṉ ko naját baḳhshtá hai,
Aur apne bande Dáúd ko muhlik talwár se bachátá hai.
11Mujhe bachá aur pardesiyoṉ ke háth se chhuṛá,
Jin ke muṉh se batálat nikaltí rahtí hai,
Aur jin ká dahiná háth jhúṭh ká dahiná háth hai.
12Jab hamáre beṭe jawání meṉ qaddáwar paudoṉ kí mánind hoṉ,
Aur hamárí beṭiyáṉ mahall ke kone ke liye taráshe húe pattharoṉ kí mánind hoṉ;
13Jab hamáre khatte bhare hoṉ jin se har qism kí jins mil sake,
Aur hamárí bheṛ bakriyáṉ kamáre kúchoṉ meṉ hazároṉ aur lákhoṉ bachche deṉ;
14Jab hamáre bail ḳhúb lade hoṉ,
Jab na raḳhna ho na ḳhurúj,
Aur na hamáre kúchoṉ meṉ wáwailá ho;
15Mubárak hai wuh qaum jis ká yih hál hai:
Mubárak hai wuh qaum jis ká Ḳhudá Ḳhudáwand hai.
Currently Selected:
Zabúr 144: URDR55
Highlight
Share
Copy
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
