Zabúr 118
118
1 Ḳhudáwand ká shukr karo, kyúṉki wuh bhalá hai,
Aur us kí shafaqat abadí hai.
2Isráíl ab kahe,
Us kí shafaqat abadí hai.
3Hárún ká gharáná ab kahe,
Us kí shafaqat abadí hai.
4 Ḳhudáwand se ḍarnewále ab kaheṉ,
Us kí shafaqat abadí hai.
5Maiṉ ne musíbat meṉ Ḳhudáwand se du‘á kí:
Ḳhudáwand ne mujhe jawáb diyá aur kushádagí baḳhshí.
6 Ḳhudáwand merí taraf hai, maiṉ nahíṉ ḍarne ká:
Insán merá kyá kar saktá hai?
7 Ḳhudáwand merí taraf, mere madadgároṉ meṉ hai,
Is liye maiṉ apne ‘adáwat rakhnewáloṉ ko dekh lúṉgá.
8 Ḳhudáwand par tawakkul karná
Insán par bharosá rakhne se bihtar hai.
9 Ḳhudáwand par tawakkul karná
Umará par bharosá rakhne se bihtar hai.
10Sab qaumoṉ ne mujhe gher liyá:
Maiṉ Ḳhudáwand ke nám se un ko káṭ ḍálúṉgá.
11Unhoṉ ne mujhe gher liyá; beshakk gher liyá:
Maiṉ Ḳhudáwand ke nám se un ko káṭ ḍálúṉgá.
12Unhoṉ ne shahd kí makkhiyoṉ kí tarah mujhe gher liyá; wuh káṉṭoṉ kí ág kí tarah bujh gaye:
Maiṉ Ḳhudáwand ke nám se un ko káṭ ḍálúṉgá.
13Tú ne mujhe zor se dhakel diyá ki gir paṛúṉ:
Lekin Ḳhudáwand ne merí madad kí.
14 Ḳhudáwand merí quwwat aur merá git hai;
Wuhí merí naját húá.
15Sádiqoṉ ke ḳhaimoṉ meṉ shádmání aur naját kí rágní hai:
Ḳhudáwand ká dahiná háth diláwarí kartá hai.
16 Ḳhudáwand ká dahiná háth baland húá hai;
Ḳhudáwand ká dahiná háth diláwarí kartá hai.
17Maiṉ marúṉgá nahíṉ, balki jítá rahúṉgá,
Aur Ḳhudáwand ke kámoṉ ká bayán karúṉgá.
18 Ḳhudáwand ne mujhe saḳht tambíh to kí:
Lekin maut ke hawále nahíṉ kiyá.
19Sadáqat ke pháṭakoṉ ko mere liye khol do:
Maiṉ un se dáḳhil hokar Ḳhudáwand ká shukr karúṉgá.
20 Ḳhudáwand ká pháṭak yihí hai;
Sádiq is se dáḳhil hoṉge.
21Maiṉ terá shukr karúṉgá, kyúṉki tú ne mujhe jawáb diyá,
Aur ḳhud merí naját baná hai.
22Jis patthar ko mi‘mároṉ ne radd kiyá,
Wuhí kone ke sire ká patthar ho gayá.
23Yih Ḳhudáwand kí taraf se húá;
Aur hamárí nazar meṉ ‘ajíb hai.
24Yih wuhí din hai jise Ḳhudáwand ne muqarrar kiyá;
Ham is meṉ shádmán hoṉge aur ḳhushí manáeṉge.
25Áh, ai Ḳhudáwand, bachá le:
Áh, ai Ḳhudáwand, ḳhushhálí baḳhsh.
26Mubárak hai wuh jo Ḳhudáwand ke nám se átá hai:
Ham ne tum ko Ḳhudáwand ke ghar se du‘á dí hai.
27 Yahowáh hí Ḳhudá hai, aur usí ne ham ko núr baḳhshá hai:
Qurbání ko mazbah ke síṉgoṉ se rassiyoṉ se báṉdho.
28Tú merá Ḳhudá hai, maiṉ terá shukr karúṉgá:
Tú merá Ḳhudá hai, maiṉ terí tamjíd karúṉgá.
29 Ḳhudáwand ká shukr karo, kyúṉki wuh bhalá hai,
Aur us kí shafaqat abadí hai.
Currently Selected:
Zabúr 118: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
