Amsál 6
6
1Ai mere beṭe, agar tú apne paṛausí ká zámin húá hai,
Agar tú háth par háth márkar kisí begáne ká zimmawár húá hai;
2To tú apne hí muṉh kí bátoṉ meṉ phaṉsá,
Tú apne hí muṉh kí bátoṉ se pakṛá gayá.
3So ai mere beṭe, chúṉki tú apne paṛausí ke háth meṉ phaṉs gayá hai;
Ab yih kar, aur apne áp ko bachá le.
Já, ḳháksár bankar apne paṛausí se isrár kar.
4Tú na apní áṉkhoṉ meṉ níṉd áne de,
Aur na apní palakoṉ meṉ jhapkí.
5Apne áp ko harní kí mánind saiyád ke háth se,
Aur chiṛiyá kí mánind chiṛímár ke háth se chhuṛá.
6Ai káhil, chyúṉṭí ke pás já;
Us kí rawishoṉ par g̣aur kar aur dánishmand ban:
7Jo báwujúde ki us ká na koí sardár,
Na názir, na hákim hai,
8Garmí ke mausim meṉ apní ḳhurák muhaiyá kartí hai,
Aur fasl kaṭne ke waqt apní ḳhurish jama‘ kartí hai.
9Ai káhil, tú kab tak paṛá rahegá?
Tú níṉd se kab uṭhegá?
10Thoṛí sí níṉd, ek âur jhapkí,
Zará paṛe rahne ko háth par háth:
11Isí tarah terí muflisí ráhzan kí tarah
Aur terí tangdastí musallah ádmí kí tarah á paṛegí.
12Ḳhabís o badkár ádmí
Ṭeṛhí tirchhí zabán liye phirtá hai;
13Wuh áṉkh mártá hai, wuh páṉwoṉ se báteṉ,
Aur ungliyoṉ se ishára kartá hai;
14Us ke dil meṉ kají hai, wuh buráí ke mansúbe báṉdhtá rahtá hai;
Wuh fitnaangez hai.
15Is liye áfat us par nágahán á paṛegí;
Wuh yaklaḳht toṛ diyá jáegá, aur koí chára na hogá.
16Chha chízeṉ haiṉ jin se Ḳhudáwand ko nafrat hai;
Balki sát haiṉ jin se use karáhiyat hai:
17Úṉchí áṉkheṉ, jhúṭhí zabán,
Begunáh ká ḳhún bahánewále háth;
18Bure mansúbe báṉdhnewálá dil,
Sharárat ke liye tezrau páṉw;
19Jhúṭhá gawáh jo darog̣goí kartá hai,
Aur wuh jo bháiyoṉ meṉ nifáq ḍáltá hai.
20Ai mere beṭe, apne báp ke farmán ko bajá lá,
Aur apní máṉ kí ta‘lím ko na chhoṛ:
21In ko apne dil par báṉdhe rakh,
Aur apne gale ká tauq baná le.
22Yih chalte waqt terí rahbarí,
Aur sote waqt terí nigahbání,
Aur jágte waqt tujh se báteṉ karegí.
23Kyúṉki farmán chirág̣ hai, aur ta‘lím núr;
Aur tarbiyat kí malámat hayát kí ráh hai:
24Táki tujh ko burí ‘aurat se bacháe,
Ya‘ní begána ‘aurat kí zabán kí cháplúsí se.
25Tú apne dil meṉ us ke husn par ‘áshiq na ho;
Aur wuh tujh ko apní palakoṉ se shikár na kare.
26Kyúṉki chhinál ke sabab se ádmí ṭukṛe ká muhtáj ho játá hai:
Aur zániya qímatí ján ká shikár kartí hai.
27Kyá mumkin hai ki ádmí apne síne meṉ ág rakkhe,
Aur us ke kapṛe na jaleṉ?
28Yá koí angároṉ par chale,
Aur us ke páṉw na jhulseṉ?
29Wuh bhí aisá hai jo apne paṛausí kí bíwí ke pás játá hai;
Jo koí use chhúe besazá na rahegá.
30Chor agar bhúk ke máre apná peṭ bharne ko chorí kare,
To log use haqír nahíṉ jánte;
31Par agar wuh pakṛá jáe to sát guná bharegá;
Use apne ghar ká sárá mál dená paṛegá.
32Jo kisí ‘aurat se ziná kartá hai wuh be‘aql hai;
Wuhí aisá kartá hai jo apní ján ko halák karná cháhtá hai.
33Wuh zaḳhm aur zillat uṭháegá;
Aur us kí ruswáí kabhí na miṭegí.
34Kyúṉki g̣airat se ádmí g̣azabnák hotá hai;
Aur wuh intiqám ke din nahíṉ chhoṛegá.
35Wuh koí fidya manzúr nahíṉ karegá;
Aur go tú bahut se in‘ám bhí de, taubhí wuh rází na hogá.
Currently Selected:
Amsál 6: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
