Amsál 4
4
1Ai mere beṭo, báp kí tarbiyat par kán lagáo,
Aur fahm hásil karne ke liye tawajjuh karo:
2Kyúṉki maiṉ tum ko achchhí talqín kartá húṉ;
Tum merí ta‘lím ko tark na karná.
3Kyúṉki maiṉ bhí apne báp ká beṭá thá,
Aur apní máṉ kí nigáh meṉ názuk aur akelá láḍlá.
4Báp ne mujhe sikháyá aur mujh se kahá,
Merí báteṉ tere dil meṉ raheṉ;
Mere farmán bajá lá, aur zinda rah:
5Hikmat hásil kar, fahm hásil kar,
Bhúlná mat, aur mere muṉh kí bátoṉ se bargashta na honá:
6Hikmat ko tark na karná, wuh terí hifázat karegí;
Us se mahabbat rakhná, wuh terí nigahbán hogí.
7Hikmat afzal asl hai; pas hikmat hásil kar:
Balki apne tamám hásilát se fahm hásil kar.
8Us kí ta‘zím kar, wuh tujhe sarfaráz karegí:
Jab tú use gale lagáegá, wuh tujhe ‘izzat baḳhshegí.
9Wuh tere sir par zínat ká sihrá báṉdhegí:
Aur tujh ko jamál ká táj ‘atá karegí.
10Ai mere beṭe, sun, aur merí bátoṉ ko qubúl kar;
Aur terí zindagí ke din bahut se hoṉge.
11Maiṉ ne tujhe hikmat kí ráh batáí hai;
Aur ráh i rást par terí rahnumáí kí hai.
12Jab tú chalegá tere qadam kotáh na hoṉge;
Aur agar tú dauṛe to ṭhokar na kháegá.
13Tarbiyat ko mazbútí se pakṛe rah; use jáne na de:
Us kí hifázat kar, kyúṉki wuh terí hayát hai.
14Sharíroṉ ke ráste meṉ na jáná,
Aur bure ádmíoṉ kí ráh meṉ na chalná.
15Us se bachná, us ke pás se na guzarná;
Us se muṛkar áge baṛh jáná.
16Kyúṉki wuh jab tak buráí na kar leṉ sote nahíṉ;
Aur jab tak kisí ko girá na deṉ un kí níṉd játí rahtí hai.
17Kyúṉki wuh sharárat kí roṭí kháte
Aur zulm kí mai píte haiṉ.
18Lekin sádiqoṉ kí ráh núr i sahar kí mánind hai,
Jis kí raushní do pahar tak baṛhtí hí játí hai.
19Sharíroṉ kí ráh táríkí kí mánind hai:
Wuh nahíṉ jánte ki kin chízoṉ se un ko ṭhokar lagtí hai.
20Ai mere beṭe, merí bátoṉ par tawajjuh kar;
Mere kalám par kán lagá.
21Us ko apní áṉkh se ojhal na hone de;
Us ko apne dil meṉ rakh.
22Kyúṉki jo is ko pá lete haiṉ yih un kí hayát,
Aur un ke sáre jism kí sihhat hai.
23Apne dil kí ḳhúb hifázat kar;
Kyúṉki zindagí ká sarchashma wuhí hai.
24Kajgo muṉh tujh se alag rahe,
Darog̣go lab tujh se dúr hoṉ.
25Terí áṉkheṉ sámne hí nazar kareṉ,
Aur terí palakeṉ sídhí raheṉ.
26Apne páṉwoṉ ke ráste ko hamwár baná,
Aur terí sab ráheṉ qáim raheṉ.
27Na dahine muṛ, na báeṉ;
Aur páṉw ko badí se haṭá le.
Currently Selected:
Amsál 4: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
