Amsál 20
20
1Mai masḳhara aur sharáb hangáma karnewálí hai,
Aur jo koí in se fareb khátá hai dáná nahíṉ.
2Bádsháh ká ru‘b sher kí garaj kí mánind hai,
Jo koí use g̣ussa dilátá hai apní ján se badí kartá hai.
3Jhagṛe se alag rahne meṉ ádmí kí ‘izzat hai,
Lekin har ek ahmaq jhagaṛtá rahtá hai.
4Káhil ádmí jáṛe ke bá‘is hai nahíṉ chalátá,
Is liye fasl káṭne ke waqt wuh bhíkh máṉgegá aur kuchh na páegá.
5Ádmí ke dil kí bát gahre pání kí mánind hai:
Lekin sáhib i fahm ádmí use kheṉch nikálegá.
6Aksar log apná apná ihsán jatáte haiṉ,
Lekin wafádár ádmí kis ko milegá?
7Rástrau sádiq ke ba‘d
Us ke beṭe mubárak hote haiṉ.
8Bádsháh jo taḳht i ‘adálat par baiṭhtá hai,
Ḳhud dekhkar har tarah kí badí ko phaṭaktá hai.
9Kaun kah saktá hai ki Maiṉ ne apne dil ko sáf kar liyá hai,
Aur maiṉ apne gunáh se pák ho gayá húṉ?
10Do tarah ke báṭ aur do tarah ke paimáne,
In donoṉ se Ḳhudáwand ko nafrat hai.
11Bachcha bhí apní harakát se pahcháná játá hai,
Ki us ke kám nek o rást haiṉ ki nahíṉ.
12Sunnewále kán aur dekhnewálí áṉkh,
Donoṉ ko Ḳhudáwand ne banáyá hai.
13Ḳhwábdost na ho, mabádá tú kaṉgál ho jáe:
Apní áṉkheṉ khol, ki tú roṭí se ser hogá.
14Ḳharídár kahtá hai, Raddí hai, raddí;
Lekin jab chal paṛtá hai to faḳhr kartá hai.
15Zar o marján kí to kasrat hai;
Lekin beshbahá sarmáya ‘ilmwále hoṉṭh haiṉ.
16Jo begáne ká zámin ho us ke kapṛe chhín le;
Aur jo ajnabí ká zámin ho us se kuchh girau rakh le.
17Dag̣á kí roṭí ádmí ko míṭhí lagtí hai;
Lekin áḳhir ko us ká muṉh kaṉkaroṉ se bhará játá hai.
18Har ek kám mashwarat se ṭhík hotá hai:
Aur tú nek saláh lekar jang kar.
19Jo koí lutrápan kartá phirtá hai ráz fásh kartá hai;
Is liye tú muṉhphaṭ se kuchh wásta na rakh.
20Jo apne báp yá apní máṉ par la‘nat kartá hai,
Us ká chirág̣ gahrí táríkí meṉ bujháyá jáegá.
21Agarchi ibtidá meṉ mírás yaklaḳht hásil ho,
Taubhí us ká anjám mubárak na hogá.
22Tú yih na kahná, ki Maiṉ badí ká badla lúṉgá;
Ḳhudáwand kí ás rakh, aur wuh tujhe bacháegá.
23Do tarah ke báṭ se Ḳhudáwand ko nafrat hai:
Aur dag̣á kí tarázú ṭhík nahíṉ.
24Ádmí kí raftár Ḳhudáwand kí taraf se hai:
Pas insán apní ráh ko kyúṉkar ján saktá hai?
25Jaldbází se kisí chíz ko muqaddas ṭhahráná,
Aur mannat mánne ke ba‘d daryáft karná ádmí ke liye phandá hai.
26Dáná bádsháh sharíroṉ ko phaṭaktá hai,
Aur un par dáone ká pahiyá phirwátá hai.
27Ádmí ká zamír Ḳhudáwand ká chirág̣ hai,
Jo us ke tamám andarúní hál ko daryáft kartá hai.
28Shafaqat aur sachcháí bádsháh kí nigahbán haiṉ,
Balki shafaqat hí se us ká taḳht qáim rahtá hai.
29Jawánoṉ ká zor un kí shaukat hai,
Aur búṛhoṉ ke safed bál un kí zínat haiṉ.
30Koṛoṉ ke zaḳhm se badí dúr hotí hai,
Aur már kháne se dil sáf hotá hai.
Currently Selected:
Amsál 20: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
