Amsál 10
10
Sulaimán kí amsál.
1Dáná beṭá báp ko ḳhush rakhtá hai;
Lekin ahmaq beṭá apní máṉ ká g̣am hai.
2Sharárat ke ḳhazáne ‘abas haiṉ:
Lekin sadáqat maut se chhuṛátí hai.
3 Ḳhudáwand sádiq kí ján ko fáqa na karne degá:
Par sharíroṉ kí hawas ko dúr o dafa‘ karegá.
4Jo ḍhíle háth se kám kartá hai kaṉgál ho játá hai:
Lekin mihnatí ká háth daulatmand baná detá hai.
5Wuh jo garmí meṉ jama‘ kartá hai dáná beṭá hai:
Par wuh beṭá jo dirau ke waqt sotá rahtá hai sharm ká bá‘is hai.
6Sádiq ke sir par barakateṉ hotí haiṉ:
Lekin sharíroṉ ke muṉh ko zulm ḍháṉktá hai.
7Rást ádmí kí yádgár mubárak hai:
Lekin sharíroṉ ká nám saṛ jáegá.
8Dánádil farmán bajá láegá:
Par bakwásí ahmaq pichháṛ kháegá.
9Rástrau bekhaṭke chaltá hai:
Lekin jo kajrawí kartá hai záhir ho jáegá.
10Áṉkh márnewálá ranj pahuṉchátá hai:
Aur bakwásí ahmaq pichháṛ kháegá.
11Sádiq ká muṉh hayát ká chashma hai:
Lekin sharíroṉ ke muṉh ko zulm ḍháṉktá hai.
12‘Adáwat jhagṛe paidá kartí hai:
Lekin mahabbat sab ḳhatáoṉ ko ḍháṉk detí hai.
13‘Aqlmand ke laboṉ par hikmat hai:
Lekin be‘aql kí píṭh ke liye laṭh hai.
14Dáná ádmí ‘ilm jama‘ karte haiṉ:
Lekin ahmaq ká muṉh qaríbí halákat hai.
15Daulatmand kí daulat us ká muhkam shahr hai:
Kaṉgál kí halákat usí kí tangdastí hai.
16Sádiq kí mihnat zindagání ká bá‘is hai;
Sharír kí iqbálmandí gunáh karátí hai.
17Tarbiyatpazír zindagí kí ráh par hai:
Lekin malámat ko tark karnewálá gumráh ho játá hai.
18‘Adáwat ko chhipánewálá darog̣go hai;
Aur tuhmat lagánewálá ahmaq hai.
19Kalám kí kasrat ḳhatá se ḳhálí nahíṉ:
Lekin hoṉṭhoṉ ko qábú meṉ rakhnewálá dáná hai.
20Sádiq kí zabán ḳhális chándí hai:
Sharíroṉ ke dil beqadr haiṉ.
21Sádiq ke hoṉṭh bahutoṉ ko g̣izá pahuṉcháte haiṉ;
Lekin ahmaq be‘aqlí se marte haiṉ.
22 Ḳhudáwand hí kí barakat daulat baḳhshtí hai,
Aur wuh us ke sáth dukh nahíṉ milátá.
23Ahmaq ke liye sharárat khel hai:
Par hikmat ‘aqlmand kel iye hai.
24Sharír ká ḳhauf us par á paṛegá:
Aur sádiqoṉ kí murád púrí hogí.
25Jab bagolá guzartá hai, to sharír nest ho játá hai:
Lekin sádiq abadí bunyád hai.
26Jaisá dáṉtoṉ ke liye sirka aur áṉkhoṉ ke liye dhuwáṉ,
Waisá hí káhil apne bhejnewáloṉ ke liye hai.
27 Ḳhudáwand ká ḳhauf ‘umr kí darází baḳhshtá hai:
Lekin sharíroṉ kí zindagí kotáh kar dí jáegí.
28Sádiqoṉ kí ummed ḳhushí láegí;
Lekin sharíroṉ kí tawaqqu‘ ḳhák meṉ mil jáegí.
29 Ḳhudáwand kí ráh rástbázoṉ ke liye panáhgáh,
Lekin badkirdároṉ ke liye halákat hai.
30Sádiqoṉ ko kabhí jumbish na hogí:
Lekin sharír zamín par qáim nahíṉ raheṉge.
31Sádiq ke muṉh se hikmat nikaltí hai:
Lekin kajgo zabán káṭ ḍálí jáegí.
32Sádiq ke hoṉṭh pasandída bát se áshná haiṉ,
Lekin sharíroṉ ke muṉh kajgoí se.
Currently Selected:
Amsál 10: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
