Gintí 27
27
1Tab Yúsuf ke beṭe Munassí kí aulád ke gharánoṉ meṉ se Siláfihád bin Hifr bin Jili‘ád bin Makír bin Munassí kí beṭiyáṉ, jin ke nám Mahláh, aur Nú‘áh, aur Hujláh, aur Milkáh, aur Tirzáh haiṉ pás ákar 2ḳhaima e ijtimá‘ ke darwáze par Músá, aur Ilí‘azar káhin, aur amíroṉ, aur sab jamá‘at ke sámne khaṛí húíṉ, aur kahne lagíṉ, ki 3Hamárá báp biyábán meṉ mará, par wuh un logoṉ meṉ shámil na thá jinhoṉ ne, Qorah ke faríq se milkar Ḳhudáwand ke ḳhiláf sir uṭháyá thá: balki wuh apne gunáh meṉ mará, aur us ke koí beṭá na thá. 4So beṭá na hone ke sabab se hamáre báp ká nám us ke gharáne se kyúṉ miṭne páe? Is liye ham ko bhí hamáre báp ke bháiyoṉ ke sáth hissa do. 5Músá un ke mu‘ámale ko Ḳhudáwand ke huzúr le gayá. 6Ḳhudáwand ne Músá se kahá, 7Siláfihád kí beṭiyáṉ ṭhík kahtí haiṉ. Tú un ko un ke báp ke bháiyoṉ ke sáth zarúr hí mírás ká hissa dená, ya‘ní un ko un ke báp kí mírás mile. 8Aur baní Isráíl se kah, ki Agar koí shaḳhs mar jáe, aur us ká koí beṭá na ho, to us kí mírás us kí beṭí ko dená. 9Agar us kí koí beṭí bhí na ho, to us ke bháiyoṉ ko us kí mírás dená. 10Agar us ke bháí bhí na hoṉ, to tum us kí mírás us ke báp ke bháiyoṉ ko dená. 11Agar us ke báp ká bhí koí bháí na ho, to jo shaḳhs us ke gharáne meṉ us ká sab se qaríbí rishtadár ho, use us kí mírás dená: wuh us ká wáris hogá. Aur yih hukm baní Isráíl ke liye, jaisá Ḳhudáwand ne Músá ko farmáyá wájibí farz hogá.
12Phir Ḳhudáwand ne Músá se kahá, Tú ‘Abárím ke is paháṛ par chaṛhkar us mulk ko, jo maiṉ ne baní Isráíl ko ‘ináyat kiyá hai, dekh le. 13Aur jab tú use dekh legá, to tú bhí apne logoṉ meṉ apne bháí Hárún kí tarah já milegá. 14Kyúṉki dasht i Sín meṉ jab jamá‘at ne mujh se jhagṛá kiyá, to bar‘aks is ke ki waháṉ pání ke chashme par tum donoṉ un kí áṉkhoṉ ke sámne merí taqdís karte, tum ne mere hukm se sarkashí kí. Yih wuhí Maríbah ká chashma hai, jo dasht i Sín ke Qádis meṉ hai. 15Músá ne Ḳhudáwand se kahá, ki 16Ḳhudáwand, sáre bashar kí rúhoṉ ká Ḳhudá, kisí ádmí ko is jamá‘at par muqarrar kare, 17jis kí ámad o raft un ke rúbarú ho, aur wuh un ko báhar le jáne aur andar le áne meṉ un ká rahbar ho, táki Ḳhudáwand kí jamá‘at un bheṛoṉ kí mánind na rahe, jin ká koí charwáhá nahíṉ. 18Ḳhudáwand ne Músá se kahá, Tú Nún ke beṭe Yashú‘ ko lekar us par apná háth rakh, kyúṉki us shaḳhs meṉ rúh hai; 19aur use Ilí‘azar káhin, aur sárí jamá‘at ke áge khaṛá karke un kí áṉkhoṉ ke sámne use wasíyat kar. 20Aur apne ru‘bdáb se use bahrawar kar de, táki baní Isráíl kí sárí jamá‘at us kí farmánbardárí kare. 21Wuh Ilí‘azar káhin ke áge khaṛá húá kare, jo us kí jánib se Ḳhudáwand ke huzúr Úrím ká hukm daryáft kiyá karegá: usí ke kahne se wuh, aur baní Isráíl kí sárí jamá‘at ke log, niklá kareṉ, aur usí ke kahne se lauṭá bhí kareṉ. 22So Músá ne Ḳhudáwand ke hukm ke mutábiq ‘amal kiyá, aur us ne Yashú‘ ko lekar use Ilí‘azar káhin aur sárí jamá‘at ke sámne khaṛá kiyá: 23aur us ne apne háth us par rakkhe, aur jaisá Ḳhudáwand ne us ko hukm diyá thá, use wasíyat kí.
Currently Selected:
Gintí 27: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)