Nahamiyáh 2
2
1Artaḳhshashatá bádsháh ke bísweṉ baras Nísán ke mahíne meṉ jab mai us ke áge thí, to maiṉ ne mai uṭhákar bádsháh ko dí. Aur is se pahle maiṉ kabhí us ke huzúr udás nahíṉ húá thá. 2So bádsháh ne mujh se kahá, Terá chihra kyúṉ udás hai, báwujúde ki tú bímár nahíṉ hai? pas yih dil ke g̣am ke siwá âur kuchh na hogá. Tab maiṉ bahut ḍar gayá. 3Aur maiṉ ne bádsháh se kahá, ki Bádsháh hamesha jítá rahe: merá chihra udás kyúṉ na ho, jab wuh shahr, jaháṉ mere bápdádá kí qabreṉ haiṉ ujáṛ paṛá hai, aur us ke pháṭak ág se jale húe haiṉ? 4Bádsháh ne mujh se farmáyá, Kis bát ke liye terí darḳhwást hai? Tab maiṉ ne ásmán ke Ḳhudá se du‘á ki: 5phir maiṉ ne bádsháh se kahá, Agar bádsháh kí marzí ho, aur agar tere ḳhádim par tere karam kí nazar hai, to tú mujhe Yahúdáh meṉ mere bápdádá kí qabroṉ ke shahr ko bhej de, táki maiṉ use ta‘mír karúṉ. 6Tab bádsháh ne, (malika bhí us ke pás baiṭhí thí,) mujh se kahá, Terá safar kitní muddat ká hogá, aur tú kab lauṭegá? G̣araz bádsháh kí marzí húí ki mujhe bheje; aur maiṉ ne waqt muqarrar karke use batáyá. 7Aur maiṉ ne bádsháh se yih bhí kahá, Agar bádsháh kí marzí ho to daryá pár ke hákimoṉ ke liye mujhe parwáne ‘ináyat hoṉ, ki wuh mujhe Yahúdáh tak pahuṉchne ke liye guzar jáne deṉ. 8Aur Ásaf ke liye jo sháhí jangal ká nigahbán hai ek sháhí ḳhatt mile, ki wuh haikal ke qil‘e ke pháṭakoṉ ke liye aur shahrpanáh aur us ghar ke liye, jis meṉ maiṉ rahúṉgá, kaṛiyáṉ banáne ko mujhe lakṛí de. Aur chúṉki mere Ḳhudá kí shafaqat ká háth mujh par thá, bádsháh ne merí ‘arz qubúl kí. 9Tab maiṉ ne daryá pár ke hákimoṉ ke pás pahuṉchkar bádsháh ke parwáne un ko diye; aur bádsháh ne faují sardároṉ aur sawároṉ ko mere sáth kar diyá thá. 10Aur jab Sanballat Húrúní aur ‘Ammoní g̣ulám Túbiyáh ne yih suná, ki ek shaḳhs baní Isráíl kí bihbúdí ká ḳhwáháṉ áyá hai, to wuh niháyat ranjída húe. 11Aur maiṉ Yarúshalem pahuṉchkar tín din rahá. 12Phir maiṉ rát ko uṭhá, maiṉ bhí aur mere sáth chand ádmí; par jo kuchh Yarúshalem ke liye karne ko Ḳhudá ne mere dil meṉ ḍálá thá, wuh maiṉ ne kisí ko na batáyá; aur jis jánwar par maiṉ sawár thá, us ke siwá âur koí jánwar mere sáth na thá. 13Aur maiṉ rát ko wádí ke pháṭak se nikalkar azhdahe ke kúeṉ aur kúṛe ke pháṭak ko gayá, aur Yarúshalem kí fasíl ko, jo toṛ dí gayí thí, aur us ke pháṭakoṉ ko jo ág se jale húe the dekhá. 14Phir maiṉ chashme ke pháṭak aur bádsháh ke táláb ko gayá; par waháṉ us jánwar ke liye jis par maiṉ sawár thá guzarne kí jagah na thí. 15Phir maiṉ rát hí ko nále kí taraf se fasíl ko dekhkar lauṭá, aur wádí ke pháṭak se dáḳhil húá, aur yúṉ wápas á gayá. 16Aur hákimoṉ ko ma‘lúm na húá, ki maiṉ kaháṉ kaháṉ gayá, yá maiṉ ne kyá kyá kiyá; aur maiṉ ne us waqt tak na Yahúdíoṉ, na káhinoṉ, na amíroṉ, na hákimoṉ, na báqíoṉ ko jo kárguzár the kuchh batáyá thá. 17Tab maiṉ ne un se kahá, Tum dekhte ho ki ham kaisí musíbat meṉ haiṉ, ki Yarúshalem ujáṛ paṛá hai, aur us ke pháṭak ág se jale húe haiṉ: áo, ham Yarúshalem kí fasíl banáeṉ, táki áge ko ham zillat ká nishán na raheṉ. 18Aur maiṉ ne un ko batáyá, ki Ḳhudá kí shafaqat ká háth mujh par kaise rahá, aur yih ki bádsháh ne mujh se kyá kyá báteṉ kahí thíṉ. Unhoṉ ne kahá, Ham uṭhkar banáne lageṉ. So is achchhe kám ke liye unhoṉ ne apne háthoṉ ko mazbút kiyá. 19Par jab Sanballat Húrúní, aur ‘Ammoní gulám Túbiyáh, aur ‘Arabí Jasham ne yih suná, to wuh ham ko ṭhaṭṭhoṉ meṉ uṛáne, aur hamárí hiqárat karke kahne lage, Tum yih kyá kám karte ho? kyá tum bádsháh se bag̣áwat karoge? 20Tab maiṉ ne jawáb dekar un se kahá, Ásmán ká Ḳhudá wuhí ham ko kámyáb karegá; isí sabab se ham jo us ke bande haiṉ uṭhkar ta‘mír kareṉge: lekin Yarúshalem meṉ tumhárá na to koí hissa, na haqq, na yádgár hai.
Currently Selected:
Nahamiyáh 2: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
