Nahamiyáh 13
13
1Us din unhoṉ ne logoṉ ko Músá kí kitáb meṉ se paṛhkar sunáyá, aur us meṉ yih likhá milá, ki ‘Ammoní aur Moábí Ḳhudá kí jamá‘at meṉ kabhí na áne páeṉ; 2is liye ki wuh roṭí aur pání lekar baní Isráíl ke istiqbál ko na nikle, balki Bal‘ám ko un ke ḳhiláf ujrat par buláyá, táki un par la‘nat kare: par hamáre Ḳhudá ne us la‘nat ko barakat se badal diyá. 3Aur aisá húá, ki sharí‘at ko sunkar unhoṉ ne sárí milí julí bhíṛ ko Isráíl se judá kar diyá.
4Is se pahle Ilyásib káhin ne, jo hamáre Ḳhudá ke ghar kí koṭhriyoṉ ká muḳhtár thá, Túbiyáh ká rishtadár hone kí wajh se, 5us ke liye ek baṛí koṭhrí taiyár kí thí, jaháṉ pahle nazr kí qurbáníáṉ, aur lubán, aur bartan, aur anáj kí aur mai kí aur tel kí dahyakíáṉ jo hukm ke mutábiq Láwíoṉ, aur gánewáloṉ, aur darbánoṉ ko dí játí thíṉ, aur káhinoṉ ke liye uṭháí húí qurbáníaṉ bhí rakkhí játí thíṉ. 6Par in aiyám meṉ maiṉ Yarúshalem meṉ na thá, kyúṉki sháh i Bábul Artaḳhshashatá ke battísweṉ baras maiṉ bádsháh ke pás gayá thá, aur kuchh dinoṉ ke ba‘d maiṉ ne bádsháh se ruḳhsat kí darḳhwást kí. 7Aur maiṉ Yarúshalem meṉ áyá, aur ma‘lúm kiyá, ki Ḳhudá ke ghar ke sahnoṉ meṉ Túbiyáh ke wáste ek koṭhrí taiyár karne se Ilyásib ne kaisí ḳharábí kí hai. 8Is se maiṉ niháyat ranjída húá, is liye maiṉ ne Túbiyáh ke sab ḳhánagí sámán ko us koṭhrí se báhar pheṉk diyá. 9Phir maiṉ ne hukm diyá, aur unhoṉ ne un koṭhriyoṉ ko sáf kiyá; aur maiṉ Ḳhudá ke ghar ke bartanoṉ aur nazr kí qurbáníoṉ, aur lubán ko phir wahíṉ le áyá. 10Phir mujhe ma‘lúm húá, ki Láwíoṉ ke hisse un ko nahíṉ diye gaye, is liye ḳhidmatguzár Láwí aur gánewále apne apne khet ko bhág gaye haiṉ. 11Tab maiṉ ne hákimoṉ se jhagaṛkar kahá, ki Ḳhudá ká ghar kyúṉ chhoṛ diyá gayá hai? Aur maiṉ ne un ko ikaṭṭhá karke un ko un kí jagah par muqarrar kiyá. 12Tab sab ahl i Yahúdáh ne anáj, aur mai, aur tel ká daswáṉ hissa ḳhazánoṉ meṉ dáḳhil kiyá. 13Aur maiṉ ne Salamiyáh káhin, aur Sadoq faqíh, aur Láwíoṉ meṉ se Fidáyáh ko ḳhazánoṉ ke ḳhazáṉchí muqarrar kiyá; aur Hanán bin Zakkúr bin Mattaniyáh un ke sáth thá; kyúṉki wuh diyánatdár máne játe the, aur apne bháiyoṉ meṉ báṉṭ dená un ká kám thá. 14Ai mere Ḳhudá, is ke liye mujhe yád kar, aur mere nek kámoṉ ko, jo maiṉ ne apne Ḳhudá ke ghar aur us kí rusúm ke liye kiye, miṭá na ḍál.
15Un hí dinoṉ meṉ maiṉ ne Yahúdáh meṉ ba‘z ko dekhá jo sabt ke din hauzoṉ meṉ páṉwoṉ se angúr kuchal rahe the, aur púle lákar un ko gadhoṉ par ládte the; isí tarah mai, aur angúr, aur anjír, aur har qism ke bojh sabt ko Yarúshalem meṉ láte the; aur jis din wuh kháne kí chízeṉ bechne lage, maiṉ ne un ko ṭoká. 16Aur waháṉ Súr ke log bhí rahte the jo machhlí aur har tarah ká sámán lákar sabt ke din Yarúshalem meṉ Yahúdáh ke logoṉ ke háth bechte the. 17Tab maiṉ ne Yahúdáh ke umará se jhagaṛkar kahá, Yih kyá burá kám hai jo tum karte aur sabt ke din kí behurmatí karte ho? 18Kyá tumháre bápdádá ne aisá hí nahíṉ kiyá, aur kyá hamárá Ḳhudá ham par aur is shahr par yih sab áfateṉ nahíṉ láyá? taubhí tum sabt kí behurmatí karke Isráíl par ziyáda g̣azab láte ho? 19So jab sabt se pahle Yarúshalem ke pháṭakoṉ ke pás andherá hone lagá, to maiṉ ne hukm diyá, ki Pháṭak band kar diye jáeṉ, aur hukm de diyá ki jab tak sabt guzar na jáe, wuh na khuleṉ: aur maiṉ ne apne chand naukaroṉ ko pháṭakoṉ par rakkhá, ki sabt ke din koí bojh andar áne na páe. 20So byopárí aur tarah tarah ke mál ke bechnewále ek yá do bár Yarúshalem ke báhar ṭike. 21Tab maiṉ ne un ko ṭoká, aur un se kahá, ki Tum díwár ke nazdík kyúṉ ṭik játe ho? Agar phir aisá kiyá, to maiṉ tum ko giriftár kar lúṉgá. Us waqt se wuh sabt ko phir na áe. 22Aur maiṉ ne Láwíoṉ ko hukm kiyá, ki apne áp ko pák kareṉ, aur sabt ke din kí taqdís kí g̣araz se ákar pháṭakoṉ kí rakhwálí kareṉ. Ai mere Ḳhudá, ise bhí mere haqq meṉ yád kar, aur apní baṛí rahmat ke mutábiq mujh par tars khá.
23Un hí dinoṉ meṉ maiṉ ne un Yahúdíoṉ ko bhí dekhá jinhoṉ ne Ashdúdí, aur ‘Ammoní, aur Moábí ‘aurateṉ biyáh lí thíṉ. 24Aur un ke bachchoṉ kí zabán ádhí Ashdúdí thí, aur wuh Yahúdí zabán meṉ bát nahíṉ kar sakte the, balki har qaum kí bolí ke mutábiq bolte the. 25So maiṉ ne un se jhagaṛkar un ko la‘nat kí, aur un meṉ se ba‘z ko márá, aur un ke bál noch ḍále, aur un ko Ḳhudá kí qasam khiláí, ki tum apní beṭiyáṉ un ke beṭoṉ ko na dená, aur na apne beṭoṉ ke liye aur na apne liye un kí beṭiyáṉ lená. 26Kyá sháh i Isráíl Sulaimán ne in bátoṉ se gunáh nahíṉ kiyá? agarchi aksar qaumoṉ meṉ us kí mánind koí bádsháh na thá, aur wuh apne Ḳhudá ká piyárá thá, aur Ḳhudá ne use sáre Isráíl ká bádsháh banáyá, taubhí ajnabí ‘auratoṉ ne use bhí gunáh meṉ phaṉsáyá. 27So kyá ham tumhárí sunkar aisí baṛí buráí kareṉ, ki ajnabí ‘auratoṉ ko biyáhkar apne Ḳhudá ká gunáh kareṉ? 28Aur Ilyásib sardár káhin ke beṭe Yúyada‘ ke beṭoṉ meṉ se ek beṭá Húrúní Sanballat ká dámád thá; is liye maiṉ ne us ko apne pás se bhagá diyá. 29Ai mere Ḳhudá, un ko yád kar, is liye ki unhoṉ ne kahánat ko, aur kahánat aur Láwíoṉ ke ‘ahd ko nápák kiyá hai. 30Yúṉ hí maiṉ ne un ko kull ajnabíoṉ se pák kiyá, aur káhinoṉ aur Láwíoṉ ke liye un kí ḳhidmat ke mutábiq, 31aur muqarrara waqtoṉ par lakṛí ke hadye aur pahle phaloṉ ke liye halqe muqarrar kar diye. Ai mere Ḳhudá, bhaláí ke liye mujhe yád kar.
Currently Selected:
Nahamiyáh 13: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
