Náhúm 3
3
1Ḳhúnrez shahr par afsos! wuh jhúṭh aur lúṭ se bi’lkull bhará hai; wuh lúṭmár se báz nahíṉ átá. 2Suno, chábuk kí áwáz, aur pahiyoṉ kí khaṛkhaṛáhaṭ, aur ghoṛoṉ ká kúdná, aur rathoṉ ke hichkole. 3Dekho, sawároṉ ká hamla, aur talwároṉ kí chamak, aur bháloṉ kí jhalak, aur maqtúloṉ ke ḍher, aur láshoṉ ke túde; láshoṉ kí intihá nahíṉ; láshoṉ se ṭhokareṉ kháte haiṉ: 4yih us ḳhúbsúrat jádúgarní fáhishe kí badkárí kí kasrat ká natíja hai, kyúṉki wuh qaumoṉ ko apní badkárí se, aur gharánoṉ ko apní jádúgarí se, bechtí hai. 5Rabb u’l afwáj farmátá hai, Dekh, maiṉ terá muḳhálif húṉ, aur tere sámne se terá dáman uṭhá dúṉgá, aur qaumoṉ ko terí barahnagí, aur mamlukatoṉ ko terá satr dikhláúṉgá. 6Aur najásat tujh par ḍálúṉgá, aur tujhe ruswá karúṉgá, háṉ, tujhe angushtnumá kar dúṉgá. 7Aur jo koí tujh par nigáh karegá tujh se bhágegá, aur kahegá, ki Nínawah wírán húá: is par kaun tars kháegá? maiṉ tere liye tasallí denewále kaháṉ se láúṉ? 8Kyá tú No Ámún se bihtar hai, jo nahroṉ ke darmiyán basá thá, aur pání us kí chároṉ taraf thá, jis kí shahrpanáh daryá e Níl thá, aur jis kí fasíl pání thá? 9Kúsh aur Misr us kí be intihá tawánáí the; Fút aur Lubím us ke himáyatí the. 10Taubhí wuh jiláwatan aur asír húá; us ke bachche sab kúchoṉ meṉ paṭak diye gaye: aur un ke shurafá par qur‘a ḍálá gayá: aur us ke sab buzurg zanjíroṉ se jakṛe gaye. 11Tú bhí mast hokar apne áp ko chhipáegá, aur dushman ke sámne se panáh ḍhúṉḍhegá. 12Tere sab qil‘e anjír ke daraḳht kí mánind haiṉ, jis par pahle pakke phal lage hoṉ; jis ko agar koí hiláe, to wuh khánewále ke muṉh meṉ gir paṛeṉ. 13Dekh, tere andar tere mard ‘aurateṉ ban gaye; terí mamlukat ke pháṭak tere dushmanoṉ ke sámne khule haiṉ: ág tere aṛbangoṉ ko khá gayí. 14Tú apne muhásare ke waqt ke liye pání bhar le, aur apne qil‘oṉ ko mazbút kar; gaṛhe meṉ utarkar miṭṭí taiyár kar, aur íṉṭ ká sáṉcha háth meṉ le. 15Waháṉ ág tujhe khá jáegí; talwár tujhe káṭ ḍálegí; wuh ṭiḍḍí kí tarah tujhe chaṭ kar jáegí, agarchi tú apne áp ko chaṭ karjánewálí ṭiḍḍiyoṉ kí mánind firáwán kare, aur fauj i malaḳh kí mánind beshumár ho jáe. 16Tú ne apne saudágaroṉ ko ásmán ke sitároṉ se ziyáda firáwán kiyá: chaṭ karjánewálí ṭiḍḍí ḳharáb karke uṛ játí hai. 17Tere umará malaḳh, aur tere sardár ṭiḍḍiyoṉ ká hujúm haiṉ, jo sardí ke waqt jháṛiyoṉ meṉ rahtí haiṉ, aur jab áftáb nikaltá hai, to uṛ játí haiṉ, aur un ká makán koí nahíṉ jantá. 18Ai sháh i Asúr, tere charwáhe so gaye; tere sardár leṭ gaye; terí ri‘áyá paháṛoṉ par paráganda ho gayí, aur us ko faráham karnewálá koí nahíṉ. 19Terí shikastagí lá‘iláj hai, terá zaḳhm kárí hai: terá hál sunkar sab tálí bajáeṉge: kyúṉki kaun hai jis par hamesha terí sharárat ká bár na thá?
Currently Selected:
Náhúm 3: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
