Ahbár 20
20
1Phir Ḳhudáwand ne Músá se kahá, 2Tú baní Isráíl se yih bhí kah de, ki Baní Isráíl meṉ se, yá un pardesíoṉ meṉ se jo Isráílíoṉ ke darmiyán búdobásh karte haiṉ, jo koí shaḳhs apní aulád meṉ se kisí ko Molak kí nazr kare, wuh zarúr ján se márá jáe; ahl i mulk use sangsár kareṉ. 3Aur maiṉ bhí us shaḳhs ká muḳhálif húṉgá, aur use us ke logoṉ meṉ se káṭ ḍálúṉgá, is liye ki us ne apní aulád ko Molak kí nazr karke mere maqdis aur mere pák nám ko nápák ṭhahráyá. 4Aur agar us waqt, jab wuh apní aulád meṉ se kisí ko Molak kí nazr kare, ahl i mulk us shaḳhs kí taraf se chashmposhí karke use ján se na máreṉ, 5to maiṉ ḳhud us shaḳhs ká, aur us ke gharáne ká muḳhálif hokar us ko aur un sabhoṉ ko, jo us kí pairawí meṉ zinákár baneṉ aur Molak ke sáth ziná kareṉ, un kí qaum meṉ se káṭ ḍálúṉgá. 6Aur jo shaḳhs jinnát ke yároṉ aur jádúgaroṉ ke pás jáe, ki un kí pairawí meṉ ziná kare, maiṉ us ká muḳhálif húṉgá, aur use us kí qaum meṉ se káṭ ḍálúṉgá. 7Is liye tum apne áp ko muqaddas karo, aur pák raho. Maiṉ Ḳhudáwand tumhará Ḳhudá húṉ. 8Aur tum mere áín ko mánná, aur us par ‘amal karná. Maiṉ Ḳhudáwand húṉ, jo tum ko muqaddas kartá húṉ. 9Aur jo koí apne báp yá apní máṉ par la‘nat kare, wuh zarúr ján se márá jáe; us ne apne báp yá máṉ par la‘nat kí hai; so us ká ḳhún usí kí gardan par hogá. 10Aur jo shaḳhs dúsre kí bíwí se, ya‘ní apne hamsáye kí bíwí se, ziná kare, wuh zání aur zániya, donoṉ zarúr ján se már diye jáeṉ. 11Aur jo shaḳhs apní sautelí máṉ se suhbat kare, us ne apne báp ke badan ko beparda kiyá; wuh donoṉ zarúr ján se máre jáeṉ; un ká ḳhún un hí kí gardan par hogá. 12Aur agar koí shaḳhs apní bahú se suhbat kare, to wuh donoṉ zarúr ján se máre jáeṉ; unhoṉ ne auṉdhí bát kí hai; un ká ḳhún un hí kí gardan par hogá. 13Aur agar koí mard se suhbat kare, jaise ‘aurat se karte haiṉ, to un donoṉ ne niháyat makrúh kám kiyá hai, so wuh donoṉ zarúr ján se máre jáeṉ; un ká ḳhún un hí kí gardan par hogá. 14Aur agar koí shaḳhs apní bíwí aur apní sás donoṉ ko rakkhe, to yih baṛí ḳhabásat hai; so wuh ádmí aur wuh ‘aurateṉ, tínoṉ ke tínoṉ, jalá diye jáeṉ, taki tumháre darmiyán ḳhabásat na rahe. 15Aur agar koí mard kisí jánwar se jimá‘ kare, to wuh zarúr ján se márá jáe, aur tum us jánwar ko bhí már ḍálná. 16Aur agar koí ‘aurat kisí jánwar ke pás jáe, aur us se hamsuhbat ho, to tum us ‘aurat aur jánwar donoṉ ko már ḍálná; wuh zarúr ján se máre jáeṉ; un ká ḳhún un hí kí gardan par hogá. 17Aur agar koí mard apní bahin ko, jo us ke báp kí, yá us kí máṉ kí beṭí ho lekar, us ká badan dekhe, aur us kí bahin us ká badan dekhe, to yih sharm kí bát hai; wuh donoṉ apní qaum ke logoṉ kí áṉkhoṉ ke sámne qatl kiye jáeṉ; us ne apní bahin ke badan ko beparda kiyá; us ká gunáh usí ke sir lagegá. 18Aur agar mard us ‘aurat se jo kapṛoṉ se ho, suhbat karke us ke badan ko beparda kare, to us ne us ká chashma kholá, aur us ‘aurat ne apne ḳhún ká chashma khulwáyá; so wuh donoṉ apní qaum meṉ se káṭ ḍále jáeṉ. 19Aur tú apní ḳhála, yá phúphí ke badan ko beparda na karná; kyúṉki jo aisá kare, us ne apní qaríbí rishtadár ko beparda kiyá; so un donoṉ ká gunáh un hí ke sir lagegá. 20Aur agar koí apní chachí yá táí se suhbat kare, to us ne apne chachá yá táú ke badan ko beparda kiyá; so un ká gunáh un ke sir lagegá; wuh láwalad mareṉge. 21Agar koí shaḳhs apne bháí kí bíwí ko rakkhe, to yih najásat hai; us ne apne bháí ke badan ko beparda kiyá hai; wuh láwalad raheṉge.
22So tum mere sab áín aur ahkám mánná, aur un par ‘amal karná, táki wuh mulk, jis meṉ maiṉ tum ko basáne ko liye játa húṉ, tum ko ugal na de. 23Tum un qaumoṉ ke dastúroṉ par, jin ko maiṉ tumháre áge se nikáltá húṉ, mat chalná; kyúṉki unhoṉ ne yih sáre kám kiye, isí liye mujhe un se nafrat ho gayí. 24Par maiṉ ne tum se kahá hai, ki Tum un ke mulk ke wáris hoge, aur maiṉ tum ko wuh mulk, jis meṉ dúdh aur shahd bahtá hai, tumhárí milkíyat hone ke liye dúṉgá. Maiṉ Ḳhudáwand tumhárá Ḳhudá húṉ, jis ne tum ko âur qaumoṉ se alag kiyá hai; 25so tum pák aur nápák chaupáyoṉ meṉ, aur pák aur nápák parandoṉ meṉ, farq karná; aur tum kisí jánwar, yá parande, yá zamín par ke reṉgnewále jándár se, jin ko maiṉ ne tumháre liye nápák ṭhahrákar alag kiyá hai, apne áp ko makrúh na baná lená. 26Aur tum mere liye pák bane rahná, kyúṉki maiṉ jo Ḳhudáwand húṉ, pák húṉ; aur maiṉ ne tum ko âur qaumoṉ se alag kiyá hai, táki tum mere hí raho.
27Aur wuh mard yá ‘aurat jis meṉ jinn ho, yá wuh jádúgar ho, to wuh zarúr ján se márá jáe; aisoṉ ko log sangsár kareṉ; un ká ḳhún un hí kí gardan par hogá.
Currently Selected:
Ahbár 20: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
