Quzát 21
21
1Aur Isráíl ke logoṉ ne Misfáh meṉ qasam khákar kahá thá, ki Ham meṉ se koí apní beṭí kisí Binyamíní ko na degá. 2Aur log Baitel meṉ áe, aur shám tak waháṉ Ḳhudá ke áge baland áwáz se zár zár rote rahe; 3aur unhoṉ ne kahá, Ai Ḳhudáwand, Isráíl ke Ḳhudá, Isráíl meṉ aisá kyúṉ húá ki Isráíl meṉ se áj ke din ek qabíla kam ho gayá? 4Aur dúsre din wuh log subh sawere uṭhe, aur us jagah ek mazbah banákar soḳhtaní qurbáníáṉ aur salámatí kí qurbáníáṉ guzráníṉ. 5Aur baní Isráíl kahne lage, ki Isráíl ke sab qabíloṉ meṉ aisá kaun hai jo Ḳhudáwand ke huzúr jamá‘at ke sáth nahíṉ áyá? kyúṉki unhoṉ ne saḳht qasam kháí thí, ki Jo Ḳhudáwand ke huzúr Misfáh meṉ házir na hogá wuh zarúr qatl kiyá jáegá. 6So baní Isráíl apne bháí Binyamín kí wajh se pachhtáe aur kahne lage, ki Áj ke din baní Isráíl ká ek qabíla kaṭ gayá; 7aur wuh jo báqí rahe haiṉ ham un ke liye bíwiyoṉ kí nisbat kyá kareṉ? kyúṉki ham ne to Ḳhudáwand kí qasam kháí hai, ki Ham apní beṭiyáṉ un ko nahíṉ biyáheṉge. 8So wuh kahne lage, ki Baní Isráíl meṉ se wuh kaun sá qabíla hai jo Misfáh meṉ Ḳhudáwand ke huzúr nahíṉ áyá? Aur dekho lashkargáh meṉ jamá‘at meṉ shámil hone ke liye Yabís Jili‘ád se koí nahíṉ áyá thá. 9Kyúṉki jab logoṉ ká shumár kiyá gayá to Yabís Jili‘ád ke báshindoṉ meṉ se waháṉ koí na milá. 10Tab jamá‘at ne bárah hazár súrmá rawána kiye, aur un ko hukm diyá, ki Jákar Yabís Jili‘ád ke báshindoṉ ko, ‘auratoṉ aur bachchoṉ samet, qatl karo. 11Aur jo tum ko karná hogá wuh yih hai, ki sab mardoṉ aur aisí ‘auratoṉ ko jo mard se wáqif ho chukí hoṉ, halák kar dená. 12Aur un ko Yabís Jili‘ád ke báshindoṉ meṉ char sau kuṉwárí ‘aurateṉ milíṉ jo mard se náwáqif aur achhútí thíṉ: aur wuh un ko mulk i Kan‘án meṉ Sailá kí lashkargáh meṉ le áe.
13Tab sárí jamá‘at ne baní Binyamín ko jo Rimmon kí chaṭán meṉ the kahlá bhejá, aur salámatí ká paig̣ám un ko diyá. 14Tab Binyamíní lauṭe; aur unhoṉ ne wuh ‘aurateṉ un ko de díṉ jin ko unhoṉ ne Yabís Jili‘ád kí ‘auratoṉ meṉ se zinda bacháyá thá: par wuh un ke liye bas na húíṉ. 15Aur log Binyamín kí wajh se pachhtáe, is liye ki Ḳhudáwand ne Isráíl ke qabíloṉ meṉ raḳhna ḍál diyá thá.
16Tab jamá‘at ke buzurg kahne lage, ki In ke liye jo bach rahe haiṉ, bíwiyoṉ kí nisbat ham kyá kareṉ, kyúṉki baní Binyamín kí sab ‘aurateṉ nábúd ho gayíṉ? 17So unhoṉ ne kahá, ki Baní Binyamín ke báqímánda logoṉ ke liye mírás zarúrí hai, táki Isráíl meṉ se ek qabíla miṭ na jáe. 18Taubhí ham to apní beṭiyáṉ un ko biyáh nahíṉ sakte: kyúṉki baní Isráíl ne yih kahkar qasam kháí thí, ki Jo kisí Binyamíní ko beṭí de, wuh mal‘ún ho. 19Phir wuh kahne lage, Dekho, Sailá meṉ jo Baitel ke shimál meṉ aur us sháhráh kí mashriqí simt meṉ hai jo Baitel se Sikm ko játí hai aur Labúnah ke junúb meṉ hai sál ba sál Ḳhudáwand kí ek ‘íd hotí hai. 20Tab unhoṉ ne baní Binyamín ho hukm diyá, ki Jáo, aur angúrí bág̣oṉ meṉ ghát lagáe baiṭhe raho; 21aur dekhte rahná, ki agar Sailá kí laṛkiyáṉ nách náchne ko nikleṉ, to tum angúrí bág̣oṉ meṉ se nikalkar Sailá kí laṛkiyoṉ meṉ se ek ek bíwí apne apne liye pakaṛ lená, aur Binyamín ke mulk ko chal dená. 22Aur jab un ke báp yá bháí ham se shikáyat karne ko áeṉge, to ham un se kah deṉge, ki Un ko mihrbání se hameṉ ‘ináyat karo, kyúṉki us laṛáí meṉ ham un meṉ se har ek ke liye bíwí nahíṉ láe; aur tum ne un ko apne áp nahíṉ diyá, warna tum gunahgár hote. 23G̣araz, baní Binyamín ne aisá hí kiyá, aur apne shumár ke muwáfiq un meṉ se jo nách rahí thíṉ jin ko pakaṛkar le bháge un ko biyáh liyá, aur apní mírás ko lauṭ gaye, aur un shahroṉ ko banákar un meṉ rahne lage. 24Tab baní Isráíl waháṉ se apne apne qabíle aur gharáne ko chale gaye; aur apní mírás ko lauṭe. 25Aur un dinoṉ Isráíl meṉ koí bádsháh na thá: har ek shaḳhs jo kuchh us kí nazar meṉ achchhá ma‘lúm hotá thá wuhí kartá thá.
Currently Selected:
Quzát 21: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
