Yasa‘iyáh 9
9
1lekin andohgín kí tíragí játí rahegí. Us ne qadím zamáne meṉ Zabúlún aur Naftálí ke ‘iláqoṉ ko zalíl kiyá; par áḳhirí zamáne meṉ qaumoṉ ke Galíl meṉ daryá kí simt Yardan ke pár buzurgí degá. 2Jo log táríkí meṉ chalte the, unhoṉ ne baṛí raushní dekhí: jo maut ke sáye ke mulk meṉ rahte the, un par núr chamká. 3Tú ne qaum ko baṛháyá, tú ne un kí shádmání ko ziyáda kiyá: wuh tere huzúr aise ḳhush haiṉ, jaise fasl káṭte waqt aur g̣anímat kí taqsím ke waqt log ḳhush hote haiṉ. 4Kyúṉki tú ne un ke bojh ke júe aur un ke kandhe ke laṭh aur un par zulm karnewále ke ‘asá ko aisá toṛá hai, jaisá Midyán ke din meṉ kiyá thá. 5Kyúṉki jang meṉ musallah mardoṉ ke tamám siláh aur ḳhúnáluda kapṛe jaláne ke liye ág ká índhan hoṉge. 6Is liye hamáre liye ek laṛká tawallud húá, aur ham ko ek beṭá baḳhshá gayá; aur saltanat us ke kandhe par hogí: aur us ká nám ‘Ajíb, Mushír, Ḳhudá e Qádir, Abadíyat ká Báp, Salámatí ká Sháhzáda hogá. 7Us kí saltanat ke iqbál aur salámatí kí kuchh intihá na hogí, wuh Dáúd ke taḳht, aur us kí mamlukat par áj se abad tak hukmrán rahegá, aur ‘adálat aur sadáqat se use qiyám baḳhshegá. Rabb u’l afwáj kí g̣aiyúrí yih karegí.
8 Ḳhudáwand ne Ya‘qúb ke pás paig̣ám bhejá, aur wuh Isráíl par názil húá. 9Aur sab log ma‘lúm kareṉge, ya‘ní baní Ifráím aur ahl i Sámariya jo takabbur aur saḳhtdilí se kahte haiṉ, 10ki Iṉṭeṉ gir gayíṉ, par ham taráshe húe pattharoṉ kí ‘imárat banáeṉge; gúlar ke daraḳht káṭe gaye, par ham deodár lagáeṉge. 11Is liye Ḳhudáwand Razín kí muḳhálif gurohoṉ ko un par chaṛhá láegá, aur un ke dushmanoṉ ko ḳhud musallah karegá; 12áge Arámí hoṉge, aur píchhe Filistí; aur wuh muṉh pasárkar Isráíl ko nigal jáeṉge. Báwujúd is ke us ká qahr ṭal nahíṉ gayá, balki us ká háth hanoz baṛhá húá hai.
13Taubhí log apne márnewále kí taraf na phire, aur Rabb u’l afwáj ke tálib na húe. 14Is liye Ḳhudáwand Isráíl ke sir aur dum aur ḳháss o ‘ámm ko ek hí din meṉ káṭ ḍálegá. 15Buzurg aur ‘izzatdár ádmí sir hai, aur jo nabí jhúṭhí báteṉ sikhátá hai, wuhí dum hai. 16Kyúṉki jo in logoṉ ke peshwá haiṉ, in se ḳhatákárí karáte haiṉ, aur un ke pairau nigle jáeṉge. 17Pas Ḳhudáwand un ke jawánoṉ se ḳhushnúd na hogá, aur wuh un ke yatímoṉ aur un kí bewáoṉ par kabhí rahm na karegá; kyúṉki un meṉ har ek bedín aur badkirdár hai, aur har ek muṉh hamáqat ugaltá hai. Báwujúd is ke us ká qahr ṭal nahíṉ gayá, balki us ká háth hanoz baṛhá húá hai.
18Kyúṉki sharárat ág kí tarah jalátí hai, wuh ḳhas o ḳhár ko khá játí hai, balki wuh jangal kí gunján jháṛiyoṉ meṉ shu‘lazan hotí hai, aur wuh dhuweṉ ke bádal meṉ úpar ko uṛ játí haiṉ. 19Rabb u’l afwáj ke qahr se yih mulk jaláyá gayá hai; aur log índhan kí mánind haiṉ; koí apne bháí par rahm nahíṉ kartá. 20Aur koí dahiní taraf se chhínegá, par bhúká rahegá: aur wuh báíṉ taraf se kháegá, par ser na hogá; un meṉ se har ek ádmí apne bázú ká gosht kháegá: 21Munassí Ifráím ká, aur Ifráím Munassí ká, aur wuh milkar Yahúdáh ke muḳhálif hoṉge. Báwujúd is ke us ká qahr ṭal nahíṉ gayá, balki us ká háth hanoz baṛhá húá hai.
Currently Selected:
Yasa‘iyáh 9: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
