Yasa‘iyáh 38
38
1Un hí dinoṉ meṉ Hizqiyáh aisá bímár paṛá, ki marne ke qaríb ho gayá. Aur Yasa‘iyáh bin Ámús nabí ne us ke pás ákar us se kahá, ki Ḳhudáwand yúṉ farmátá hai, ki Tú apne ghar ká intizám kar de; kyúṉki tú mar jáegá, aur bachne ká nahíṉ. 2Tab Hizqiyáh ne apná muṉh díwár kí taraf kiyá, aur Ḳhudáwand se du‘á kí, 3aur kahá, Ai Ḳhudáwand, maiṉ terí minnat kartá húṉ, yád farmá, ki maiṉ tere huzúr sachcháí aur púre dil se chaltá rahá húṉ, aur jo terí nazar meṉ bhalá hai, wuhí kiyá hai. Aur Hizqiyáh zár zár royá. 4Tab Ḳhudáwand ká yih kalám Yasa‘iyáh par názil húá, 5ki Já, aur Hizqiyáh se kah, ki Ḳhudáwand, tere báp Dáúd ká Ḳhudá, yúṉ farmátá hai, ki Maiṉ ne terí du‘á suní, maiṉ ne tere áṉsú dekhe: so dekh, maiṉ terí ‘umr pandrah baras âur baṛhá dúṉgá. 6Aur maiṉ tujh ko aur is shahr ko sháh i Asúr ke háth se bachá lúṉgá: aur maiṉ is shahr kí himáyat karúṉgá. 7Aur Ḳhudáwand kí taraf se tere liye yih nishán hogá, ki Ḳhudáwand is bát ko jo us ne farmáí, púrá karegá: 8dekh, maiṉ áftáb ke ḍhale húe sáye ke darjoṉ meṉ se Áḳhaz kí dhúpghaṛí ke mutábiq das darje píchhe ko lauṭá dúṉgá. Chunáṉchi áftáb jin darjoṉ se ḍhal gayá thá, un meṉ ke das darje phir lauṭ gayá.
9Sháh i Yahúdáh Hizqiyáh kí tahrír, jab wuh bímár thá, aur apní bímárí se shifáyáb húá.
10Maiṉ ne kahá, Maiṉ apní ádhí ‘umr meṉ pátál ke pháṭakoṉ meṉ dáḳhil húṉgá.
Merí zindagí ke báqí baras mujh se chhín liye gaye.
11Maiṉ ne kahá, Maiṉ Ḳhudáwand ko, háṉ, Ḳhudáwand ko, zindoṉ kí zamín meṉ phir na dekhúṉgá:
Insán aur dunyá ke báshinde mujhe phir dikháí na deṉge.
12Merá ghar ujaṛ gayá hai, aur gaḍariye ke ḳhaime kí mánind mujh se dúr kiyá gayá:
Maiṉ ne juláhe kí mánind apní zindagání ko lapeṭ liyá hai; wuh mujh ko táṉt se káṭ ḍálegá;
Subh se shám tak tú mujh ko tamám kar ḍáltá hai.
13Maiṉ ne subh tak tahammul kiyá; tab wuh sher i babar kí mánind merí sab haḍḍiyáṉ chúr kar ḍáltá hai:
Subh se shám tak tú mujhe tamám kar ḍáltá hai.
14Maiṉ abábíl aur sáras kí tarah chíṉ chíṉ kartá rahá;
Maiṉ kabútar kí tarah kuṛhtá rahá: merí áṉkheṉ úpar dekhte dekhte patthrá gayíṉ;
Ai Ḳhudáwand, maiṉ bekas húṉ, tú merá kafíl ho.
15Maiṉ kyá kahúṉ? us ne to mujh se wa‘da kiyá, aur usí ne use púrá kiyá:
Maiṉ apní báqí ‘umr apní ján kí talḳhí ke sabab se áhista áhista basar karúṉgá.
16Ai Ḳhudáwand, in hí chízoṉ se insán kí zindagí hai,
Aur in hí meṉ merí rúh kí hayát hai:
So tú hí shifá baḳhsh, aur mujhe zinda rakh.
17Dekh, merá saḳht ranj ráhat se tabdíl húá:
Aur merí ján par mihrbán hokar tú ne use nestí ke gaṛhe se riháí dí;
Kyúṉki tú ne mere sab gunáhoṉ ko apní píṭh ke píchhe pheṉk diyá.
18Is liye ki pátál terí sitáish nahíṉ kar saktá, aur maut se terí hamd nahíṉ ho saktí:
Wuh jo gor meṉ utarnewále haiṉ terí sachcháí ke ummedwár nahíṉ ho sakte.
19Zinda, háṉ, zinda hí terí sitáish karegá, jaisá áj ke din maiṉ kartá húṉ;
Báp apní aulád ko terí sachcháí kí ḳhabar degá.
20 Ḳhudáwand mujhe bacháne ko taiyár hai:
Is liye ham apne tárdár sázoṉ ke sáth
‘Umr bhar Ḳhudáwand ke ghar meṉ sarodḳhwání karte raheṉge.
21Yasa‘iyáh ne kahá thá, ki Anjír kí ṭikkiyá lekar phoṛe par báṉdheṉ, aur wuh shifá páegá. 22Aur Hizqiyáh ne kahá thá, Is ká kyá nishán hai, ki maiṉ Ḳhudáwand ke ghar meṉ jáúṉgá?
Currently Selected:
Yasa‘iyáh 38: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
