Yasa‘iyáh 2
2
1Wuh bát jo Yasa‘iyáh bin Ámús ne Yahúdáh aur Yarúshalem ke haqq meṉ royá meṉ dekhí.
2Áḳhirí dinoṉ meṉ yúṉ hogá, ki Ḳhudáwand ke ghar ká paháṛ paháṛoṉ kí choṭí par qáim kiyá jáegá, aur ṭíloṉ se baland hogá, aur sab qaumeṉ waháṉ pahuṉcheṉgí. 3Balki bahut sí ummateṉ áeṉgí, aur káheṉgí, Áo, Ḳhudáwand ke paháṛ par chaṛheṉ, ya‘ní Ya‘qúb ke Ḳhudá ke ghar meṉ dáḳhil hoṉ, aur wuh apní ráheṉ ham ko batáegá, aur ham us ke rástoṉ par chaleṉge: kyúṉki sharí‘at Siyyún se aur Ḳhudáwand ká kalám Yarúshalem se sádir hogá. 4Aur wuh qaumoṉ ke darmiyán ‘adálat karegá, aur bahut sí ummatoṉ ko ḍáṉṭegá, aur wuh apní talwároṉ ko toṛkar pháleṉ, aur apne bháloṉ ko haṉsúe baná ḍáleṉge; aur qaum qaum par talwár na chaláegí, aur wuh phir kabhí jang karná na síkheṉge.
5Ai Ya‘qúb ke gharáne, áo, ham Ḳhudáwand kí raushní meṉ chaleṉ. 6Tú ne to apne logoṉ ya‘ní Ya‘qúb ke gharáne ko tark kiyá, is liye ki wuh ahl i mashriq kí rusúm se pur haiṉ, aur Filistíoṉ kí mánind shugún lete, aur begánoṉ kí aulád ke sáth háth par háth márte haiṉ. 7Aur un ká mulk sone chándí se málámál hai, aur un ke ḳhazánoṉ kí kuchh intihá nahíṉ; aur un ká mulk ghoṛoṉ se bhará hai; aur un ke rathoṉ ká kuchh shumár nahíṉ. 8Aur un kí sarzamín butoṉ se bhí pur hai, wuh apne hí háthoṉ kí san‘at, ya‘ní apní hí ungliyoṉ kí kárígarí ko sijda karte haiṉ. 9Is sabab se chhoṭá ádmí past kiyá játá hai, aur baṛá ádmí zalíl hotá hai; aur tú un ko hargiz mu‘áf na karegá. 10Ḳhudáwand ke ḳhauf se aur us ke jalál kí shaukat se chaṭán meṉ ghus já, aur ḳhák meṉ chhip já. 11Insán kí úṉchí nigáh níchí kí jáegí, aur baní Ádam ká takabbur past ho jáegá; aur us roz Ḳhudáwand hí sarbaland hogá. 12Kyúṉki Rabb u’l afwáj ká din tamám mag̣rúroṉ, balandnazaroṉ, aur mutakabbiroṉ par áegá, aur wuh past kiye jáeṉge. 13Aur Lubnán ke sab deodároṉ par jo baland aur úṉche haiṉ, aur Basan ke sab balútoṉ par, 14aur sab úṉche paháṛoṉ, aur sab baland ṭíloṉ par, 15aur har ek úṉche burj par, aur har ek fasílí díwár par, 16aur Tarsís ke sab jaházoṉ par, g̣araz har ek ḳhushnumá manzar par, 17aur ádmí ká takabbur zer kiyá jáegá, aur logoṉ kí balandbíní past kí jáegí, aur us roz Ḳhudáwand hí sarbaland hogá. 18Aur tamám but bi’lkull faná ho jáeṉge. 19Aur jab Ḳhudáwand uṭhegá, ki zamín ko shiddat se hiláe, to log us ke ḍar se, aur us ke jalál kí shaukat se paháṛon ke g̣ároṉ aur zamín ke shigáfoṉ meṉ ghuseṉge. 20Us roz log apní sone chándí kí múratoṉ ko jo unhoṉ ne pújne ke liye banáíṉ, chhuchhúṉdaroṉ aur chamgádaṛoṉ ke áge pheṉk deṉge; 21táki jab Ḳhudáwand zamín ko shiddat se hiláne ke liye uṭhe, to us ke ḳhauf se aur us ke jalál kí shaukat se chaṭánoṉ ke g̣ároṉ, aur náhamwár pattharoṉ ke shigáfoṉ meṉ ghus jáeṉ. 22Pas tum insán se, jis ká dam us ke nathnoṉ meṉ hai, báz raho; kyúṉki us kí kyá qadr hai?
Currently Selected:
Yasa‘iyáh 2: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
