Húsí‘a 8
8
1Turhí apne muṉh se lagá. Wuh ‘uqáb kí tarah Ḳhudáwand ke ghar par ṭúṭ paṛá hai: kyúṉki unhoṉ ne mere ‘ahd se tajáwuz kiyá, aur merí sharí‘at ke ḳhiláf chale. 2Wuh mujhe yúṉ pukárte haiṉ, ki Ai hamáre Ḳhudá, ham baní Isráíl tujhe pahchánte haiṉ. 3Isráíl ne bhaláí ko tark kar diyá: dushman us ká píchhá kareṉge. 4Unhoṉ ne bádsháh muqarrar kiye, par merí taraf se nahíṉ; unhoṉ ne umará ko ṭhahráyá hai, aur maiṉ ne un ko na jáná; unhoṉ ne apne sone chándí se but banáe, táki nest o nábúd hoṉ. 5Ai Sámariya, terá bachhṛá mardúd hai; merá qahr un par bhaṛká hai; wuh kab tak gunáh se pák na hoṉge? 6Kyúṉki yih bhí Isráíl hí kí kartút hai; kárígar ne us ko banáyá hai, wuh Ḳhudá nahíṉ; Sámariya ká bachhṛá yaqínan ṭukṛe ṭukṛe kiyá jáegá. 7Beshakk unhoṉ ne hawá boí, wuh girdbád káṭeṉge; us meṉ ḍanṭhal na niklegá, na us kí báloṉ se galla paidá hogá, aur agar paidá bhí ho, to ajnabí use chaṭ kar jáeṉge. 8Isráíl niglá gayá; ab wuh qaumoṉ ke darmiyán nápasandída bartan kí mánind hoṉge. 9Kyúṉki wuh tanhá gorḳhar kí mánind Asúr ko chale gaye haiṉ; Ifráím ne ujrat par yár buláe. 10Agarchi unhoṉ ne qaumoṉ ko ujrat dí hai, taubhí ab maiṉ un ko jama‘ karúṉgá; aur wuh bádsháh o umará ke bojh se g̣amgín hoṉge. 11Chúṉki Ifráím ne gunahgárí ke liye bahut sí qurbángáheṉ banáíṉ, is liye wuh qurbángáheṉ us kí gunahgárí ká bá‘is húíṉ. 12Agarchi maiṉ ne apní sharí‘at ke ahkám ko un ke liye hazárhá bár likhá, par wuh un ko ajnabí ḳhayál karte haiṉ. 13Wuh mere hadyoṉ kí qurbáníoṉ ke liye gosht guzránte aur kháte haiṉ; lekin Ḳhudáwand un ko qubúl nahíṉ kartá; ab wuh un kí badkirdárí ko yád karegá, aur un ko un ke gunáhoṉ kí sazá degá; wuh Misr ko wápas jáeṉge. 14Isráíl ne apne ḳháliq ko farámosh karke butḳháne banáe haiṉ; aur Yahúdáh ne bahut se hasín shahr ta‘mír kiye haiṉ: lekin maiṉ us ke shahroṉ par ág bhejúṉgá, aur wuh un ke qasroṉ ko bhasam kar degí.
Currently Selected:
Húsí‘a 8: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
