Habaqqúq 2
2
1Maiṉ apní dídgáh par khaṛá rahúṉgá, aur burj par chaṛhkar intizár karúṉgá, ki wuh mujh se kyá kahtá hai, aur maiṉ apní faryád kí bábat kyá jawáb dúṉ. 2Tab Ḳhudáwand ne mujhe jawáb diyá, aur farmáyá, ki Royá ko taḳhtíoṉ par aisí safáí se likh, ki log dauṛte húe bhí paṛh sakeṉ. 3Kyúṉki yih royá ek muqarrara waqt ke liye hai, yih jald wuqú‘ meṉ áegí, aur ḳhatá na karegí: agarchi is meṉ der ho, taubhí is ká muntazir rah, kyúṉki yih yaqínan wuqú‘ meṉ áegí, táḳhír na karegí. 4Dekh, mutakabbir ádmí ká dil rást nahíṉ hai: lekin sádiq apne ímán se zinda rahegá. 5Beshakk mutakabbir ádmí mai kí mánind dag̣ábáz hai, wuh apne ghar meṉ nahíṉ rahtá; wuh pátál kí mánind apní hawas baṛhátá hai, wuh maut kí mánind hai, kabhí ásúda nahíṉ hotá, balki sab qaumoṉ ko apne pás jama‘ kartá hai, aur sab ummatoṉ ko apne nazdík faráham kartá hai. 6Kyá yih sab us par masal na láeṉge, aur tanzan na kaheṉge, ki Us par afsos jo auroṉ ke mál se máldár hotá hai! lekin yih kab tak? aur us par jo kasrat se girau letá hai! 7Kyá wuh tujhe khá jáne ko achának na uṭheṉge, aur tujhe muztarib karne ko bedár na hoṉge, aur tú un ke liye lúṭ na hogá? 8Chúṉki tú ne bahut sí qaumoṉ ko lúṭ liyá, aur mulk o shahr o báshindoṉ meṉ ḳhúnrezí aur sitamgarí kí hai, is liye báqímánda log tujhe g̣árat kareṉge.
9Us par afsos jo apne gharáne ke liye nájáiz nafa‘ uṭhátá hai, táki apne áshiyána balandí par banáe, aur musíbat se mahfúz rahe! 10Tú ne bahut sí ummatoṉ ko barbád karke apne gharáne ke liye ruswáí hásil kí, aur apní ján ká gunahgár húá. 11Kyúṉki díwár se patthar chilláeṉge, aur chhat se shahtír jawáb deṉge.
12Us par afsos jo qasbe ko ḳhúnrezí se aur shahr ko badkirdárí se ta‘mír kartá hai! 13Kyá yih Rabb u’l afwáj kí taraf se nahíṉ, ki logoṉ kí mihnat ág ke liye ho, aur qaumoṉ kí mashaqqat batálat ke liye? 14Kyúṉki jis tarah samundar pání se bhará hai, usí tarah zamín Ḳhudáwand ke jalál ke ‘irfán se ma‘múr hogí.
15Us par asfos jo apne hamsáye ko apne qahr ká jám pilákar matwálá kartá hai, táki us ko beparda kare! 16Tú ‘izzat ke ‘iwaz ruswáí se bhar gayá hai; tú bhí píkar apní námaḳhtúní záhir kar: Ḳhudáwand ke dahine háth ká piyála apne daur meṉ tujh tak pahuṉchegá, aur ruswáí terí shaukat ko ḍháṉp legí. 17Chúṉki tú ne mulk o shahr o báshindoṉ meṉ ḳhúnrezí aur sitamgarí kí hai, is liye wuh ziyádatí jo Lubnán par húí, aur wuh halákat jis se jánwar ḍar gaye, tujh par áegí.
18Khodí húí múrat se kyá hásil, ki us ke banánewále ne use khodkar banáyá? ḍhálí húí múrat, aur jhúṭh sikhánewále se kyá fáida, ki us ká banánewálá us par bharosá rakhtá, aur gúṉge butoṉ ko banátá hai? 19Us par afsos jo lakṛí se kahtá hai, Jág; aur bezabán patthar se, ki Uṭh! Kyá wuh ta‘lím de saktá hai? Dekh, wuh to sone chándí se muṛhá hai, lekin us meṉ mutlaq dam nahíṉ. 20Magar Ḳhudáwand apní muqaddas haikal meṉ hai: sárí zamín us ke huzúr ḳhámosh rahe.
Currently Selected:
Habaqqúq 2: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
