Hizqíel 36
36
1Ai ádamzád, Isráíl ke paháṛoṉ se nubuwwat kar, aur kah. Ai Isráíl ke paháṛo, Ḳhudáwand ká kalám suno. 2Ḳhudáwand Ḳhudá yúṉ farmátá hai, ki Chúṉki dushman ne tum par Ahá há! kahá, aur yih ki Wuh úṉche úṉche qadím maqám hamáre hí hoṉge, 3is liye nubuwwat kar, aur kah, Ḳhudáwand Ḳhudá yúṉ farmátá hai, ki Is sabab se, háṉ, isí sabab se ki unhoṉ ne tum ko wírán kiyá, aur har taraf se tum ko nigal gaye, táki jo qaumoṉ meṉ se báqí haiṉ tumháre málik hoṉ, aur tumháre haqq meṉ bakwásiyoṉ ne zabán kholí hai, aur tum logoṉ meṉ badnám húe ho: 4is liye, ai Isráíl ke paháṛo, Ḳhudáwand Ḳhudá ká kalám suno: Ḳhudáwand Ḳhudá paháṛoṉ, aur ṭíloṉ, aur náloṉ, aur wádíoṉ, aur ujáṛ wíránoṉ se, aur matrúk shahroṉ se jo áspás kí qaumoṉ ke báqí logoṉ ke liye lúṭ aur já e tamasḳhur húe haiṉ, yúṉ farmátá hai; 5háṉ, isí liye Ḳhudáwand Ḳhudá yúṉ farmátá hai, ki Yaqínan maiṉ ne aqwám ke báqí logoṉ ká aur tamám Adom ká muḳhálif hokar, jinhoṉ ne apne púre dil kíḳhushí se aur qalbí ‘adáwat se apne áp ko merí sarzamín ke málik ṭhahráyá, táki un ke liye g̣anímat ho, apní g̣airat ke josh meṉ farmáyá hai. 6Is liye tú Isráíl ke mulk kí bábat nubuwwat kar, aur paháṛoṉ aur ṭíloṉ, nadiyoṉ aur wádíoṉ se kah, Ḳhudáwand Ḳhudá yúṉ farmátá hai, ki Dekho, maiṉ ne apní g̣airat aur apne qahr meṉ kalám kiyá, is liye ki tum ne qaumoṉ kí malámat uṭháí hai; 7pas Ḳhudáwand Ḳhudá yúṉ farmátá hai, ki Maiṉ ne qasam kháí, ki yaqínan tumháre áspás kí aqwám áp hí malámat uṭháeṉgí. 8Par tum, ai Isráíl ke paháṛo, apní sháḳheṉ nikáloge, aur merí ummat Isráíl ke liye phal láoge, kyúṉki wuh jald ánewále haiṉ. 9Is liye dekho, maiṉ tumhárí taraf húṉ, aur tum par tawajjuh karúṉgá, aur tum jote aur boe jáoge. 10Aur maiṉ ádmíoṉ ko, háṉ, Isráíl ke tamám gharáne ko tum par bahut baṛháúṉgá; aur shahr ábád hoṉge, aur khanḍar phir ta‘mír kiye jáeṉge. 11Aur maiṉ tum par insán o haiwán kí firáwání karúṉgá; aur wuh bahut hoṉge, aur phaleṉge; aur maiṉ tum ko aisá ábád karúṉgá, jaise ki tum pahle the, aur tum par tumhárí ibtidá ke aiyám se ziyáda ihsán karúṉgá; aur tum jánoge ki maiṉ Ḳhudáwand húṉ. 12Háṉ, maiṉ aisá karúṉgá ki ádmí, ya‘ní mere Isráílí log, tum par chaleṉ phireṉge, aur tumháre málik hoṉge, aur tum un kí mírás hoge, aur phir un ko beaulád na karoge. 13Ḳhudáwand Ḳhudá yúṉ farmátá hai, ki Chúṉki wuh tujh se kahte haiṉ, Ai zamín, tú insán ko nigaltí hai, aur tú ne apní qaumoṉ ko beaulád kiyá; 14is liye áyanda na tú insán ko niglegí, na apní qaumoṉ ko beaulád karegí, Ḳhudáwand Ḳhudá farmátá hai. 15Aur maiṉ aisá karúṉgá, ki log tujh par kabhí dígar aqwám ká ta‘na na suneṉge, aur tú qaumoṉ kí malámat na uṭháegí, aur phir apne logoṉ kí lag̣zish ká bá‘is na hogí, Ḳhudáwand Ḳhudá farmátá hai.
16Aur Ḳhudáwand ká kalám mujh par názil húá, 17ki Ai ádamzád, jab baní Isráíl apne mulk meṉ baste the, unhoṉ ne apní rawish aur apne a‘mál se us ko nápák kiyá; un kí rawish mere nazdík ‘aurat kí nápákí kí hálat kí mánind thí. 18Is liye maiṉ ne us ḳhúnrezí ke sabab se jo unhoṉ ne us mulk meṉ kí thí, aur un butoṉ ke sabab se jin se unhoṉ ne use nápák kiyá thá, apná qahr un par názil kiyá. 19Aur maiṉ ne un ko qaumoṉ meṉ paráganda kiyá, aur wuh mulkoṉ meṉ tittar bittar ho gaye, aur un kí rawish aur un ke a‘mál ke mutábiq maiṉ ne un kí ‘adálat kí. 20Aur jab wuh dígar aqwám ke darmiyán jaháṉ jaháṉ wuh gaye the pahuṉche, to unhoṉ ne mere muqaddas nám ko nápák kiyá, kyúṉki log un kí bábat kahte the, ki Yih Ḳhudáwand ke log haiṉ, aur us ke mulk se nikal áe haiṉ. 21Lekin mujhe apne pák nám par, jis ko baní Isráíl ne un qaumoṉ ke darmiyán jaháṉ wuh gaye the nápák kiyá, afsos húá. 22Is liye tú baní Isráíl se kah de, Ḳhudáwand Ḳhudá yúṉ farmátá hai, ki Ai baní Isráíl, tumhárí ḳhátir nahíṉ, balki apne muqaddas nám kí ḳhátir, jis ko tum ne un qaumoṉ ke darmiyán jaháṉ tum gaye the nápák kiyá, yih kartá húṉ. 23Maiṉ apne buzurg nám kí, jo qaumoṉ ke darmiyán nápák kiyá gayá, jis ko tum ne un ke darmiyán nápák kiyá thá, taqdís karúṉgá: aur jab un kí áṉkhoṉ ke sámne tum se merí taqdís hogí, tab wuh qaumeṉ jáneṉgí ki main Ḳhudáwand húṉ, Ḳhudáwand Ḳhudá farmátá hai. 24Kyúṉki maiṉ tum ko un qaumoṉ meṉ se nikál lúṉgá, aur tamám mulkoṉ meṉ se faráham karúṉgá, aur tum ko tumháre watan meṉ wápas láúṉgá. 25Tab tum par sáf pání chhiṛkúṉgá, aur tum pák sáf hoge: aur maiṉ tum ko tumhárí tamám gandagí se, aur tumháre sab butoṉ se, pák karúṉgá. 26Aur maiṉ tum ko nayá dil baḳhshúṉgá, aur nayí rúh tumháre bátin meṉ ḍálúṉgá, aur tumháre jism meṉ se saṉgín dil ko nikál ḍálúṉgá, aur goshtín dil tum ko ‘ináyat karúṉgá. 27Aur maiṉ apní rúh tumhárí bátin meṉ ḍálúṉgá, aur tum se apne áín kí pairawí karáúṉgá, aur tum mere ahkám par ‘amal karoge, aur un ko bajá láoge. 28Aur tum us mulk meṉ, jo maiṉ ne tumháre bápdádá ko diyá, sukúnat karoge, aur tum mere log hoge, aur maiṉ tumhárá Ḳhudá húṉgá. 29Aur maiṉ tum ko tumhárí tamám nápákí se chhuṛáúṉgá, aur anáj maṉgwáúṉgá, aur ‘ifrát baḳhshúṉgá, aur tum par qaht na bhejúṉgá. 30Aur maiṉ daraḳht ke phaloṉ meṉ aur khet ke hásil meṉ afzáish baḳhshúṉgá, yaháṉ tak ki tum áyanda ko qaumoṉ ke darmiyán qaht ke sabab se malámat na uṭháoge. 31Tab tum apní burí rawish aur bada‘málí ko yád karoge, aur apní badkirdárí o makrúhát ke sabab se apní nazar meṉ ghiraune ṭhahroge. 32Maiṉ yih tumhárí ḳhátir nahíṉ kartá húṉ, Ḳhudáwand Ḳhudá farmátá hai; yih tum ko yád rahe: tum apní ráhoṉ ke sabab se ḳhajálat uṭháo, aur sharminda ho, ai baní Isráíl. 33Ḳhudáwand Ḳhudá yúṉ farmátá hai, ki Jis din maiṉ tum ko tumhárí tamám badkirdárí se pák karúṉgá, usí din tum ko tumháre shahroṉ meṉ basáúṉgá, aur tumháre khanḍar ta‘mír ho jáeṉge. 34Aur wuh wírán zamín, jo tamám ráhguzaroṉ kí nazaroṉ meṉ wírán paṛí thí, jotí jáegí. 35Aur wuh kaheṉge, ki Yih sarzamín jo ḳharáb paṛí thí bág̣ i ‘Adan kí mánind ho gayí, aur ujáṛ aur wírán o ḳharáb shahr muhkam aur ábád ho gaye. 36Tab wuh qaumeṉ jo tumháre áspás báqí haiṉ jáneṉgí ki maiṉ Ḳhudáwand ne ujáṛ makánoṉ ko ta‘mír kiyá hai, aur wíráne ko bág banáyá hai; maiṉ Ḳhudáwand ne farmáyá hai, aur maiṉ hí kar dikháúṉgá.
37Ḳhudáwand Ḳhudá yúṉ farmátá hai, ki Baní Isráíl mujh se yih darḳhwást bhí kar sakeṉge, aur maiṉ un ke liye aisá karúṉgá, ki un ke logoṉ ko bheṛ bakriyoṉ kí tarah firáwán karúṉ. 38Jaisá muqaddas galla thá, aur jis tarah Yarúshalem ká galla us kí ‘ídoṉ meṉ thá, usí tarah ujáṛ shahr ádmíoṉ ke g̣oloṉ se ma‘múr hoṉge; aur wuh jáneṉge ki maiṉ Ḳhudáwand húṉ.
Currently Selected:
Hizqíel 36: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
