Ḳhurúj 33
33
1Aur Ḳhudáwand ne Músá se kahá, ki Un logoṉ ko apne sáth lekar, jin ko tú mulk i Misr se nikálkar láyá: yaháṉ se us mulk kí taraf rawána ho, jis ke báre meṉ Abrahám, aur Izháq, aur Ya‘qúb se maiṉ ne qasam khákar kahá thá, ki Ise maiṉ terí nasl ko dúṉgá. 2Aur maiṉ tere áge áge ek firishte ko bhejúṉgá; aur maiṉ Kan‘áníoṉ, aur Amoríoṉ, aur Hittíoṉ, aur Farizzíoṉ, aur Hawwíoṉ, aur Yabúsíoṉ ko nikál dúṉgá: 3us mulk meṉ dúdh aur shahd bahtá hai: aur chúṉki tum gardankash log ho, is liye maiṉ tumháre bích meṉ hokar na chalúṉgá, tá aisá na ho ki maiṉ tum ko ráh meṉ faná kar ḍálúṉ. 4Log is dahshatnák ḳhabar ko sunkar g̣amgín húe, aur kisí ne apne zewar na pahine. 5Kyúṉki Ḳhudáwand ne Músá se kah diyá thá, ki baní Isráíl se kahná, ki Tum gardankash log ho: agar maiṉ ek lamha bhí tumháre bích meṉ hokar chalúṉ, to tum ko faná kar dúṉgá. So tum apne apne zewar utár ḍálo, táki mujhe ma‘lúm ho ki tumháre sáth kyá karná cháhiye. 6Chunáṉchi baní Isráíl Horib paháṛ se lekar áge áge apne zewaroṉ ko utáre rahe.
7Aur Músá ḳhaime ko lekar use lashkargáh se báhar, balki lashkargáh se dúr lagá liyá kartá thá; aur us ká nám ḳhaima e ijtimá‘ rakkhá. Aur jo koí Ḳhudáwand ká tálib hotá, wuh lashkargáh ke báhar usí ḳhaime kí taraf chalá játá thá. 8Aur jab Músá báhar ḳhaime kí taraf játá, to sab log uṭhkar apne apne ḍere ke darwáze par khaṛe ho játe, aur Músá ke píchhe dekhte rahte the, jab tak wuh ḳhaime ke andar dáḳhil na ho játá. 9Aur jab Músá ḳhaime ke andar chalá játá, to abr ká sutún utarkar ḳhaime ke darwáze par ṭhahrá rahtá, aur Ḳhudáwand Músá se báteṉ karne lagtá. 10Aur sab log abr ke sutún ko ḳhaime ke darwáze par ṭhahrá húá dekhte the, aur sab log uṭh uṭhkar apne apne ḍere ke darwáze par se use sijda karte the. 11Aur jaise koí shaḳhs apne dost se bát kartá hai, waise hí Ḳhudáwand rúbarú hokar Músá se báteṉ kartá thá: aur Músá lashkargáh ko lauṭ átá thá: par us ká ḳhádim Yashú‘, jo Nún ká beṭá aur jawán ádmí thá, ḳhaime se báhar nahíṉ nikaltá thá.
12Aur Músá ne Ḳhudáwand se kahá, Dekh, tú mujh se kahtá hai, ki In logoṉ ko le chal: par mujhe yih nahíṉ batáyá, ki tú kis ko mere pás bhejegá; háláṉki tú ne yih bhí kahá hai, Maiṉ tujh ko banám jántá húṉ, aur tujh par mere karam kí nazar hai. 13Pas agar mujh par tere karam kí nazar hai, to mujh ko apní ráh batá, jis se maiṉ tujhe pahchán lúṉ, táki mujh par tere karam kí nazar rahe: aur yih ḳhayál rakh, ki yih qaum terí hí ummat hai. 14Tab us ne kahá, Maiṉ sáth chalúṉgá, aur tujhe árám dúṉgá. 15Músá ne kahá, Agar tú sáth na chale, to ham ko yaháṉ se áge na le já. 16Kyúṉki yih kyúṉkar ma‘lúm hogá, ki mujh par aur tere logoṉ par tere karam kí nazar hai? Kyá isí taríq se nahíṉ ki tú hamáre sáth sáth chale, táki maiṉ aur tere log rú e zamín kí sab qaumoṉ se nirále ṭhahreṉ?
17 Ḳhudáwand ne Músá se kahá, Maiṉ yih kám bhí, jis ká tú ne zikr kiyá hai, karúṉgá; kyúṉki tujh par mere karam kí nazar hai, aur maiṉ tujh ko banám pahchántá húṉ. 18Tab wuh bol uṭhá, ki Maiṉ terí minnat kartá húṉ, mujhe apná jalál dikhá de. 19Us ne kahá, Maiṉ apní sárí nekí tere sámne záhir karúṉgá, aur tere hí sámne Ḳhudáwand ke nám ká i‘lán karúṉgá; aur maiṉ jis par mihrbán honá cháhúṉ, mihrbán húṉgá; aur jis par rahm karná cháhúṉ, rahm karúṉgá. 20Aur yih bhí kahá, Tú merá chihra nahíṉ dekh saktá; kyúṉki insán mujhe dekhkar zinda nahíṉ rahegá. 21Phir Ḳhudáwand ne kahá, Dekh, mere qaríb hí ek jagah hai, so tú us chaṭán par khaṛá ho. 22Aur jab tak merá jalál guzartá rahegá, maiṉ tujhe us chaṭán ke shigáf meṉ rakkhúṉgá; aur jab tak maiṉ nikal na jáúṉ, tujhe apne háth se ḍháṉke rahúṉgá: 23is ke ba‘d maiṉ apná háth uṭhá lúṉgá, aur tú merá píchhá dekhegá, lekin merá chihra dikháí nahíṉ degá.
Currently Selected:
Ḳhurúj 33: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
