Ástar 4
4
1Jab Mardakí ko wuh sab jo kiyá gayá thá ma‘lum húá, to Mardakí ne apne kapṛe pháṛe, aur ṭáṭ pahine aur sir par rákh ḍálkar shahr ke bích meṉ chalá gayá, aur baland aur purdard áwáz se chilláne lagá. 2Aur wuh bádsháh ke pháṭak ke sámne bhí áyá; kyúṉki ṭáṭ pahine koí bádsháh ke pháṭak ke andar jáne na pátá thá. 3Aur har súbe meṉ, jaháṉ kahíṉ bádsháh ká hukm aur farmán pahuṉchá, Yahúdíoṉ ke darmiyán baṛá mátam aur roza aur giryazárí aur nauha shurú‘ ho gayá; aur bahutere ṭáṭ pahine rákh meṉ paṛ gaye. 4Aur Ástar kí saheliyoṉ aur us ke ḳhwájasaráoṉ ne ákar use ḳhabar dí. Tab malika bahut g̣amgín húí; aur us ne kapṛe bheje, ki Mardakí ko pahináeṉ, aur ṭáṭ us par se utár leṉ; par us ne un ko na liyá. 5Tab Ástar ne bádsháh ke ḳhwájasaráoṉ meṉ se Haták ko jise us ne Ástar ke pás házir rahne ko muqarrar kiyá thá bulwáyá, aur use tákíd kí ki Mardakí ke pás jákar daryáft kare, ki yih kyá bát hai, aur kis sabab se hai. 6So Haták nikalkar shahr ke chauk meṉ jo bádsháh ke pháṭak ke sámne thá Mardakí ke pás gayá. 7Tab Mardakí ne apní púrí sarguzasht, aur rupaye kí wuh ṭhík raqm use batáí jise Hámán ne Yahúdíoṉ ko halák karne ke liye bádsháh ke ḳhazánoṉ meṉ dáḳhil karne ká wa‘da kiyá thá. 8Aur us farmán kí tahrír kí ek naql bhí, jo un ke halák karne ke liye Sosan meṉ dí gayí thí, use dí, táki use Ástar ko dikháe, aur batáe, aur use tákíd kare, ki bádsháh ke huzúr jákar us se minnat kare, aur us ke huzúr apní qaum ke liye darḳhwást kare. 9Chunáṉchi Haták ne ákar Ástar ko Mardakí kí báteṉ kah sunáíṉ. 10Tab Ástar Haták se bát karne lagí, aur use Mardakí ke liye yih paig̣ám diyá, ki 11Bádsháh ke sab mulázim aur bádsháhí súboṉ ke sab log jánte haiṉ, ki jo koí mard ho yá ‘aurat bebuláe bádsháh kí bárgáh i andarúní meṉ jáe, us ke liye, bas, ek hí qánún hai, ki wuh márá jáe, siwá us ke jis ke liye bádsháh sone ká ‘asá uṭháe táki wuh jítá rahe: lekin tís din húe ki maiṉ bádsháh ke huzúr nahíṉ buláí gayí. 12Unhoṉ ne Mardakí se Ástar kí báteṉ kahíṉ. 13Tab Mardakí ne un se kahá, ki Ástar ke pás yih jawáb le jáeṉ, ki Tú apne dil meṉ yih na samajh, ki sab Yahúdíoṉ meṉ se tú bádsháh ke mahall meṉ bachí rahegí. 14Kyúṉki agar tú is waqt ḳhámoshí iḳhtiyár kare, to ḳhalásí aur naját Yahúdíoṉ ke liye kisí âur jagah se áegí; par tú apne báp ke ḳhándán samet halák ho jáegí: aur kyá jáne ki tú aise hí waqt ke liye saltanat ko pahuṉchí hai? 15Tab Ástar ne un ko Mardakí ke pás yih jawáb le jáne ká hukm diyá, 16ki Já, aur Sosan meṉ jitne Yahúdí maujúd haiṉ, un ko ikaṭṭhá kar, aur tum mere liye roza rakkho, aur tín roz tak, din aur rát, na kuchh kháo na piyo; maiṉ bhí aur merí saheliyáṉ isí tarah se roza rakkheṉgí; aur aise hí maiṉ bádsháh ke huzúr jáúṉgí jo áín ke ḳhiláf hai; aur agar maiṉ halák húí to halák húí. 17Chunáṉchi Mardakí rawána húá, aur Ástar ke hukm ke mutábiq sab kuchh kiyá.
Currently Selected:
Ástar 4: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
