Ástar 2
2
1In bátoṉ ke ba‘d, jab Aḳhasúerus bádsháh ká g̣azab ṭhanḍá húá, to us ne Washtí ko, aur jo kuchh us ne kiyá thá, aur jo kuchh us ke ḳhiláf hukm húá thá, yád kiyá. 2Tab bádsháh ke mulázim jo us kí ḳhidmat karte the kahne lage, ki Bádsháh ke liye jawán ḳhúbsúrat kuṉwáriyáṉ ḍhúṉḍhí jáeṉ; 3aur bádsháh apní mamlukat ke sab súboṉ meṉ mansabdároṉ ko muqarrar kare, táki wuh sab jawán ḳhúbsúrat kuṉwáriyoṉ ko qasr i Sosan ke bích haramsará meṉ ikaṭṭhá karke bádsháh ke ḳhwájasará Haijá ke supurd kareṉ jo ‘auratoṉ ká muháfiz hai; aur tahárat ke liye un ká sámán un ko diyá jáe; 4aur jo kuṉwárí bádsháh ko pasand ho, wuh Washtí kí jagah malika ho. Yih bát bádsháh ko pasand áí; aur us ne aisá hí kiyá.
5Aur qasr i Sosan meṉ ek Yahúdí thá, jis ká nám Mardakí thá, jo Yáir, bin Sima‘í, bin Qís ká beṭá thá, jo Binyamíní thá; 6aur Yarúshalem se un asíroṉ ke sáth gayá thá jo sháh i Yahúdáh Yakúniyáh ke sáth asírí meṉ gaye the, jin ko sháh i Bábul Nabúkadnazar asír karke le gayá thá. 7Us ne apne chachá kí beṭí Hadassáh ya‘ní Ástar ko pálá thá; kyúṉki us ke máṉ báp na the; aur wuh laṛkí hasín aur ḳhúbsúrat thí: aur jab us ke máṉ báp mar gaye, to Mardakí ne use apní beṭí karke pálá. 8So aisá húá, ki jab bádsháh ká hukm aur farmán sunne meṉ áyá, aur bahut sí kuṉwáriyáṉ qasr i Sosan meṉ ikaṭṭhí hokar Haijá ke supurd húíṉ, to Ástar bhí bádsháh ke mahall meṉ pahuṉcháí gayí, aur ‘auratoṉ ke muháfiz Haijá ke supurd húí. 9Aur wuh laṛkí use pasand áí, aur us ne us par mihrbání kí; aur fauran use sháhí mahall meṉ se tahárat ke liye us ke sámán, aur kháne ke hisse, aur aisí sát saheliyáṉ jo us ke láiq thíṉ use díṉ, aur use aur us kí saheliyoṉ ko haramsará kí sab se achchhí jagah meṉ le jákar rakkhá. 10Ástar ne na apní qaum na apná ḳhándán záhir kiyá thá; kyúṉki Mardakí ne use tákíd kar dí thí, ki na batáe. 11Aur Mardakí har roz haramsará ke sahn ke áge phirtá thá, táki daryáft kare, ki Ástar kaisí hai, aur us ká kyá hál hogá. 12Jab ek ek kuṉwárí kí bárí áí ki ‘auratoṉ ke dastúr ke mutábiq bárah mahíne kí safáí ke ba‘d Aḳhasúerus bádsháh ke pás jáe, (kyúṉki itne hí din un kí tahárat meṉ lag játe the, ya‘ní chha mahíne murr ká tel lagáne meṉ, aur chha mahíne ‘itr aur ‘auratoṉ kí safáí kí chízoṉ ke lagáne meṉ,) 13tab is tarah se wuh kuṉwárí bádsháh ke pás játí thí, ki jo kuchh wuh cháhtí ki haramsará se bádsháh ke mahall meṉ le jáe, wuh us ko diyá játá thá. 14Shám ko wuh játí thí, aur subh ko lauṭkar dúsre haramsará meṉ bádsháh ke ḳhwájasará Sha‘sjaz ke supurd ho játí thí jo haramoṉ ká muháfiz thá; wuh bádsháh ke pás phir nahíṉ játí thí, magar jab ki bádsháh use cháhtá, tab wuh nám lekar buláí játí thí. 15Jab Mardakí ke chachá Abíḳhail kí beṭí Ástar kí jise Mardakí ne apní beṭí karke rakkhá thá bádsháh ke pás jáne kí bárí áí, to jo kuchh bádsháh ke ḳhwájasará aur ‘auratoṉ ke muháfiz Haijá ne ṭhahráyá thá, us ke siwá us ne âur kuchh na máṉgá. Aur Ástar un sab kí, jin kí nigáh us par paṛí, manzúr i nazar húí. 16So Ástar Aḳhasúerus bádsháh ke pás us ke sháhí mahall meṉ us kí saltanat ke sátweṉ sál ke dasweṉ mahíne meṉ jo Tebat mahína hai pahuṉcháí gayí. 17Aur bádsháh ne Ástar ko sab ‘auratoṉ se ziyáda piyár kiyá, aur wuh us kí nazar meṉ un sab kuṉwáriyoṉ se ziyáda ‘azíz aur pasandída ṭhahrí: pas us ne sháhí táj us ke sir par rakh diyá, aur Washtí kí jagah use malika banáyá. 18Aur bádsháh ne apne sab umará aur mulázimoṉ ke liye ek baṛí ziyáfat ya‘ní Ástar kí ziyáfat kí; aur súboṉ meṉ mu‘áfí kí, aur sháhí karam ke mutábiq in‘ám báṉṭe. 19Aur jab kuṉwáriyáṉ dúsrí bár ikaṭṭhí kí gayíṉ, to Mardakí bádsháh ke pháṭak par baiṭhá thá. 20Aur Ástar ne na to apne ḳhándán aur na apní qaum ká patá diyá thá, jaisá Mardakí ne use tákíd kar dí thí; is liye kí Ástar Mardakí ká hukm aisá hí mántí thí, jaisá us waqt jab wuh us ke háṉ parwarish pá rahí thí. 21Un hí dinoṉ meṉ, jab Mardakí bádsháh ke pháṭak par baiṭhá kartá thá, bádsháh ke ḳhwájasaráoṉ meṉ se jo darwáze par pahrá dete the do shaḳhsoṉ, ya‘ní Bigtán aur Tarash ne bigaṛkar cháhá ki Aḳhasúerus bádsháh par háth chaláeṉ. 22Yih bát Mardakí ko ma‘lúm húí, aur us ne Ástar malika ko batáí; aur Ástar ne Mardakí ká nám lekar bádsháh ko ḳhabar kar dí. 23Jab us mu‘ámale kí tahqíqát kí gayí, aur wuh bát sábit húí; to wuh donoṉ ek daraḳht par laṭká diye gaye; aur yih bádsháh ke sámne tawáríḳh kí kitáb meṉ likh liyá gayá.
Currently Selected:
Ástar 2: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
