Dáníel 8
8
1Belshazzar bádsháh kí saltanat ke tísre sál meṉ mujh ko, háṉ, mujh Dáníel ko ek royá nazar áí, ya‘ní merí pahlí royá ke ba‘d. 2Aur maiṉ ne ‘álam i royá meṉ dekhá, aur jis waqt maiṉ ne dekhá, aisá ma‘lúm húá, ki maiṉ Sosan ke qasr meṉ thá, jo súba ‘Ailám meṉ hai. Phir maiṉ ne ‘álam i royá hí meṉ dekhá, ki maiṉ daryá e Úláí ke kanáre par húṉ. 3Tab maiṉ ne áṉkh uṭhákar nazar kí, aur kyá dekhtá húṉ, ki daryá ke pás ek meṉḍhá khaṛá hai, jis ke do síṉg haiṉ. Donoṉ síṉg úṉche the, lekin ek dúsre se baṛá thá, aur baṛá dúsre ke ba‘d niklá thá. 4Maiṉ ne us meṉḍhe ko dekhá, ki mag̣rib o shimál o junúb kí taraf síṉg mártá hai, yaháṉ tak ki na koí jánwar us ke sámne khaṛá ho saká, aur na koí us se chhuṛá saká; par wuh jo kuchh cháhtá thá kartá thá, yaháṉ tak ki wuh bahut baṛá ho gayá. 5Aur maiṉ soch hí rahá thá, ki ek bakrá mag̣rib kí taraf se ákar tamám rú e zamín par aisá phirá, ki zamín ko bhí na chhúá, aur us bakre kí donoṉ áṉkhoṉ ke darmiyán ek ‘ajíb síṉg thá. 6Aur wuh us do síṉgwále meṉḍhe ke pás, jise maiṉ ne daryá ke kanáre khaṛá dekhá, áyá, aur apne zor ke qahr se us par hamlaáwar húá. 7Aur maiṉ ne dekhá ki wuh meṉḍhe ke qaríb pahuṉchá, aur us ká g̣azab us par bhaṛká, aur us ne meṉḍhe ko márá, aur us ke donoṉ síṉg toṛ ḍále, aur meṉḍhe meṉ us ke muqábale kí táb na thí. Pas us ne use zamín par paṭak diyá, aur use latáṛá, aur koí na thá ki meṉḍhe ko us se chhuṛá sake. 8Aur wuh bakrá niháyat buzurg húá, aur jab wuh niháyat zoráwar húá, to us ká baṛá síṉg ṭúṭ gayá, aur us kí jagah chár ‘ajíb síṉg ásmán kí chároṉ hawáoṉ kí taraf nikle. 9Aur un meṉ se ek se ek chhoṭá síṉg niklá, jo junúb aur mashriq aur jalálí mulk kí taraf beniháyat baṛh gayá; 10aur wuh baṛhkar ajrám i falak tak pahuṉchá; aur us ne ba‘z ajrámi falak aur sitároṉ ko zamín par girá diyá, aur un ko latáṛá. 11Balki us ne ajrám ke farmánrawá tak apne áp ko baland kiyá; aur us se dáimí qurbání ko chhín liyá, aur us ká maqdis girá diyá. 12Aur ajrám ḳhatákárí ke sabab se dáimí qurbání samet us ke hawála kiye gaye, aur us ne sachcháí ko zamín par paṭak diyá, aur wuh kámyábí ke sáth yúṉ hí kartá rahá. 13Tab maiṉ ne ek qudsí ko kalám karte suná, aur dúsre qudsí ne usí qudsí se, jo kalám kartá thá, púchhá, ki Dáimí qurbání aur wírán karnewálí ḳhatákárí kí royá jis meṉ maqdis aur ajrám páemál hote haiṉ, kab tak rahegí? 14Aur us ne mujh se kahá, ki Do hazár tín sau shám o subh tak; us ke ba‘d maqdis pák kiyá jáegá.
15Phir yúṉ húá, ki jab maiṉ, Dáníel, ne yih royá dekhí, aur us kí ta‘bír kí fikr meṉ thá, to kyá dekhtá húṉ, ki mere sámne koí insánsúrat khaṛá hai. 16Aur maiṉ ne Úláí meṉ se ádmí kí áwáz suní, jis ne baland áwáz se kahá, Ai Jabráíl, is shaḳhs ko is royá ke ma‘ní samjhá de. 17Chunáṉchi wuh jaháṉ maiṉ khaṛá thá nazdík áyá, aur us ke áne se maiṉ ḍar gayá, aur muṉh ke bal girá: par us ne mujh se kahá, Ai ádamzád, samajh le, ki yih royá áḳhirí zamáne kí bábat hai. 18Aur jab wuh mujh se báteṉ kar rahá thá, maiṉ gahrí níṉd meṉ muṉh ke bal zamín par paṛá thá: lekin us ne mujhe pakaṛkar sídhá khaṛá kiyá, 19aur kahá, ki Dekh, maiṉ tujhe samjháúṉgá, ki qahr ke áḳhir meṉ kyá hogá, kyúṉki yih amr áḳhirí muqarrara waqt kí bábat hai. 20Jo meṉḍhá tú ne dekhá, us ke donoṉ síṉg Mádí aur Fárs ke bádsháh haiṉ. 21Aur wuh jasím bakrá Yúnán ká bádsháh hai, aur us kí áṉkhoṉ ke darmiyán ká baṛá síṉg pahlá bádsháh hai. 22Aur us ke ṭúṭ jáne ke ba‘d, us kí jagah jo chár âur nikle, wuh chár saltanateṉ haiṉ, jo us kí qaum meṉ qáim hoṉgí, lekin un ká iqtidár us ká sá na hogá. 23Aur un kí saltanat ke áḳhirí aiyám meṉ, jab ḳhatákár log hadd tak pahuṉch jáeṉge, to ek turshrú aur ramzshinás bádsháh barpá hogá. 24Yih baṛá zabardast hogá; lekin apní quwwat se nahíṉ; aur ‘ajíb tarah se barbád karegá, aur baromand hogá, aur kám karegá, aur zoráwaroṉ aur muqaddas logoṉ ko halák karegá; 25aur apní chaturáí se aise kám karegá ki us kí fitrat ke mansúbe us ke háth meṉ ḳhúb anjám páeṉge, aur dil meṉ baṛá ghamanḍ karegá, aur sulh ke waqt meṉ bahuteroṉ ko halák karegá: wuh bádsháhoṉ ke bádsháh se bhí muqábala karne ke liye uṭh khaṛá hogá, lekin beháth hiláe hí shikast kháegá. 26Aur yih subh o shám kí royá jo bayán húí, yaqíní hai, lekin tú is royá ko band kar rakh, kyúṉki is ká ‘iláqa bahut dúr ke aiyám se hai. 27Aur mujh Dáníel ko g̣ash áyá, aur maiṉ chand roz tak bímár paṛá rahá; phir maiṉ uṭhá aur bádsháh ká kár o bár karne lagá; aur maiṉ royá se pareshán thá, lekin is ko koí na samjhá.
Currently Selected:
Dáníel 8: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
