Dáníel 3
3
1Nabúkadnazar bádsháh ne ek sone kí múrat banwáí, jis kí lambáí sáṭh háth aur chauṛáí chha háth thí, aur use Dúrá ke maidán súba e Bábul meṉ nasb kiyá. 2Tab Nabúkadnazar bádsháh ne logoṉ ko bhejá ki názimoṉ, aur hákimoṉ, aur sardároṉ, aur qázíoṉ, aur ḳhazáṉchíoṉ aur mushíroṉ, aur muftíoṉ, aur tamám súboṉ ke mansabdároṉ ko jama‘ kareṉ, táki wuh us múrat kí taqdís par házir hoṉ, jis ko Nabúkadnazar bádsháh ne nasb kiyá thá. 3Tab názim, aur hákim, aur sardár, aur qází, aur ḳhazáṉchí, aur mushír, aur muftí, aur súboṉ ke tamám mansabdár us múrat kí taqdís ke liye, jise Nabúkadnazar bádsháh ne nasb kiyá thá, jama‘ húe, aur wuh us múrat ke sámne, jis ko Nabúkadnazar ne nasb kiyá thá, khaṛe húe. 4Tab ek manád ne baland áwáz se pukárkar kahá, Ai logo, ai ummato, aur ai muḳhtalif zabáneṉ bolnewálo, tumháre liye yih hukm hai, ki 5jis waqt qarná, aur nai, aur sitár, aur rabáb, aur barbat, aur chag̣ána, aur har tarah ke sáz kí áwáz suno, to us sone kí múrat ke sámne, jis ko Nabúkadnazar bádsháh ne nasb kiyá hai, girkar sijda karo. 6Aur jo koí girkar sijda na kare, usí waqt ág kí jaltí bhaṭṭí meṉ ḍálá jáegá. 7Is liye jis waqt sab logoṉ ne qarná, aur nai, aur sitár, aur rabáb, aur barbat, aur har tarah ke sáz kí áwáz suní, to sab logoṉ, aur ummatoṉ, aur muḳhtalif zabáneṉ bolnewáloṉ ne us múrat ke sámne, jis ko Nabúkadnazar bádsháh ne nasb kiyá thá, girkar sijda kiyá. 8Pas us waqt chand Kasdíoṉ ne ákar Yahúdíoṉ par ilzám lagáyá. 9Unhoṉ ne Nabúkadnazar bádsháh se kahá, Ai bádsháh, abad tak jítá rah. 10Ai bádsháh, tú ne yih farmán járí kiyá hai, ki jo koí qarná, aur nai, aur sitár, aur rabáb, aur barbat, aur chag̣ána, aur har tarah ke sáz kí áwáz sune, girkar sone kí múrat ko sijda kare. 11Aur jo koí girkar sijda na kare, ág kí jaltí bhaṭṭí meṉ ḍálá jáegá. 12Ab chand Yahúdí haiṉ, jin ko tú ne Bábul ke súbe kí kárpardází par mu‘aiyan kiyá hai, ya‘ní Sadrak, aur Mísak, aur ‘Abad Najú, in ádmíoṉ ne, ai bádsháh, terí ta‘zím nahíṉ kí. Wuh tere ma‘búdoṉ kí ‘ibádat nahíṉ karte, aur us sone kí múrat ko jise tú ne nasb kiyá sijda nahíṉ karte. 13Tab Nabúkadnazar ne qahr o g̣azab se hukm kiyá, ki Sadrak, aur Mísak, aur ‘Abad Najú ko házir kareṉ; aur unhoṉ ne un ádmíoṉ ko bádsháh ke huzúr házir kiyá. 14Nabúkadnazar ne un se kahá, Ai Sadrak, aur Mísak aur ‘Abad Najú, kyá yih sach hai, ki tum mere ma‘búdoṉ kí ‘ibádat nahíṉ karte ho, aur us sone kí múrat ko jise maiṉ ne nasb kiyá sijda nahíṉ karte? 15Ab, agar tum musta‘idd raho, ki jis waqt qarná, aur nai, aur sitár, aur rabáb, aur barbat, aur chag̣ána, aur har tarah ke sáz kí áwáz suno, to us múrat ke sámne jo maiṉ ne banwáí hai girkar sijda karo, to bihtar; par agar sijda na karoge, to usí waqt ág kí jaltí bhaṭṭí meṉ ḍále jáoge; aur kaun sá ma‘búd tum ko mere háth se chhuṛáegá? 16Sadrak, aur Mísak, aur ‘Abad Najú ne bádsháh se ‘arz kí, ki Ai Nabúkadnazar, is amr meṉ ham tujhe jawáb dená zarúrí nahíṉ samajhte. 17Hamárá Ḳhudá, jis kí ham ‘ibádat karte haiṉ, ham ko ág kí jaltí bhaṭṭí se chhuṛáne kí qudrat rakhtá hai; aur ai bádsháh, wuhí ham ko tere háth se chhuṛáegá. 18Aur nahíṉ to, ai bádsháh, tujhe ma‘lúm ho, ki ham tere ma‘búdoṉ kí ‘ibádat nahíṉ kareṉge, aur us sone kí múrat ko, jo tú ne nasb kí hai, sijda nahíṉ kareṉge. 19Tab Nabúkadnazar qahr se bhar gayá, aur us ke chihre ká rang Sadrak, aur Mísak, aur ‘Abad Najú par mubaddal húá, aur us ne hukm diyá, ki bhaṭṭí kí áṉch ma‘múl se sát guná ziyáda kareṉ. 20Aur us ne apne lashkar ke chand zoráwar pahlawánoṉ ko hukm kiyá, ki Sadrak, aur Mísak, aur ‘Abad Najú ko báṉdhkar ág kí jaltí bhaṭṭí meṉ ḍál deṉ. 21Tab yih mard apne zerjámoṉ, qamísoṉ aur ‘amámoṉ samet báṉdhe gaye, aur ág kí jaltí bhaṭṭí meṉ pheṉk diye gaye. 22Pas chúṉki bádsháh ká hukm tákídí thá, aur bhaṭṭí kí áṉch niháyat tez thí, is liye Sadrak, aur Mísak, aur ‘Abad Najú ko uṭhánewále ág ke shu‘loṉ se halák ho gaye. 23Aur yih tín mard ya‘ní Sadrak, aur Mísak, aur ‘Abad Najú bandhe húe ág kí jaltí bhaṭṭí meṉ já paṛe. 24Tab Nabúkadnazar bádsháh sarásíma hokar jald uṭhá, aur arkán i daulat se muḳhátib hokar kahne lagá, kyá ham ne tín shaḳhsoṉ ko bandhwákar ág meṉ nahíṉ ḍalwáyá? Unhoṉ ne jawáb diyá, ki Bádsháh ne sach farmáyá hai. 25Us ne kahá, Dekho, maiṉ chár sháḳhs ág meṉ khule phirte dekhtá húṉ, aur un ko kuchh zarar nahíṉ pahuṉchá; aur chauthe kí súrat iláhzáde kí sí hai. 26Tab Nabúkadnazar ne ág kí jaltí bhaṭṭí ke darwáze par ákar kahá, Ai Sadrak, aur Mísak, aur ‘Abad Najú, Ḳhudá Ta‘álá ke bando, báhar niklo, aur idhar áo. Pas Sadrak, aur Mísak, aur ‘Abad Najú ág se nikal áe. 27Tab názimoṉ, aur hákimoṉ, aur sardároṉ, aur bádsháh ke mushíroṉ ne faráham hokar un shaḳhsoṉ par nazar kí, aur dekhá ki ág ne un ke badanoṉ par kuchh tásír na kí, aur un ke sir ká ek bál bhí na jaláyá, aur un kí poshák meṉ mutlaq farq na áyá, aur un se ág se jalne kí bú bhí na átí thí. 28Pas Nabúkadnazar ne pukárkar kahá, ki Sadrak, aur Mísak, aur ‘Abad Najú ká Ḳhudá mubárak ho, jis ne apná firishta bhejkar apne bandoṉ ko riháí baḳhshí, jinhoṉ ne us par tawakkul karke bádsháh ke hukm ko ṭál diyá, aur apne badanoṉ ko nisár kiyá, ki apne Ḳhudá ke siwá kisí dúsre ma‘búd kí ‘ibádat aur bandagí na kareṉ. 29Is liye maiṉ yih farmán járí kartá húṉ, ki Jo qaum, yá ummat, yá ahl i lug̣at, Sadrak, aur Mísak, aur ‘Abad Najú ke Ḳhudá ke haqq meṉ koí námunásib bát kaheṉ, un ke ṭukṛe ṭukṛe kiye jáeṉge, aur un ke ghar mazbala ho jáeṉge. Kyúṉki koí dúsrá ma‘búd nahíṉ, jo is tarah riháí de sake. 30Phir bádsháh ne Sadrak, aur Mísak aur ‘Abad Najú ko súba e Bábul meṉ sarfaráz kiyá.
Currently Selected:
Dáníel 3: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
