Dáníel 11
11
1Aur Dárá Mádí kí saltanat ke pahle sál meṉ maiṉ hí us ko qáim karne aur taqwíyat dene ko khaṛá húá.
2Aur ab maiṉ tujh ko haqíqat batátá húṉ. Fárs meṉ abhí tín bádsháh âur barpá hoṉge, aur chauthá un sab se ziyádá daulatmand hogá, aur jab wuh apní daulat se taqwíyat páegá, to sab ko Yúnán kí saltanat ke ḳhiláf ubháregá. 3Lekin ek zabardast bádsháh barpá hogá, jo baṛe tasallut se hukmrán hogá, aur jo kuchh cháhegá karegá. 4Aur us ke barpá hote hí us kí saltanat ko zawál áegá, aur ásmán kí chároṉ hawáoṉ kí atráf par taqsím ho jáegí; lekin na us kí nasl ko milegí, aur na us ká sá iqbál báqí rahegá, balki wuh saltanat jaṛ se ukhaṛ jáegí, aur g̣airoṉ ke liye hogí. 5Aur sháh i junúb zor pakṛegá; aur us ke umará meṉ se ek us se ziyádá iqtidár o iḳhtiyár hásil karegá; aur us kí saltanat bahut baṛí hogí. 6Aur chand sál ke ba‘d wuh ápas meṉ mel kareṉge, kyúṉki sháh i junúb kí beṭí sháh i shimál ke pás áegí, táki ittihád qáim ho; lekin us meṉ quwwat i bázú na rahegí, aur na wuh bádsháh qáim rahegá, na us ká iqtidár; balki un aiyám meṉ wuh apne báp aur apne lánewáloṉ aur taqwíyat denewále samet tark kí jáegí. 7Lekin us kí jaṛoṉ kí ek sháḳh se ek shaḳhs us kí jagah barpá hogá. Wuh sipahsálár hokar sháh i shimál ke qil‘e meṉ dáḳhil hogá, aur un par hamla karegá, aur g̣álib áegá, 8aur un ke butoṉ aur ḍhálí húí múratoṉ ko sone chándí ke qímatí zurúf samet asír karke Misr ko le jáegá; aur chand sál tak sháh i shimál se dastbardár rahegá. 9Phir wuh sháh i junúb kí mamlukat meṉ dáḳhil hogá, par apne mulk ko wápas jáegá. 10Lekin us ke beṭe barangeḳhta hoṉge jo baṛá lashkar jama‘ kareṉge, aur wuh chaṛháí karke phailegá, aur guzar jáegá: aur wuh lauṭkar us ke qil‘e tak laṛeṉge; 11aur sháh i junúb g̣azabnák hokar niklegá, aur sháh i shimál se jang karegá; aur wuh baṛá lashkar lekar áegá, aur wuh baṛá lashkar us ke hawále kar diyá jáegá. 12Aur jab wuh lashkar paráganda kar diyá jáegá, to us ke dil meṉ ghamanḍ samáegá. Wuh lákhoṉ ko giráegá, lekin g̣álib na áegá. 13Aur sháh i shimál phir hamla karegá aur pahle se ziyáda lashkar jama‘ karegá. Aur chand sál ke ba‘d bahut se lashkar o mál ke sáth phir hamlaáwar hogá. 14Aur un dinoṉ meṉ bahutere sháh i junúb par chaṛháí kareṉge, aur terí qaum ke qazzák bhí uṭheṉge, ki us royá ko púrá kareṉ; par wuh gir jáeṉge. 15Chunáṉchi sháh i shimál áegá, aur damdama báṉdhegá, aur hasín shahr le legá: aur junúb kí táqat qáim na rahegí, aur us ke chída mardoṉ meṉ muqábale kí táb na hogí. 16Aur hamlaáwar jo kuchh cháhegá karegá, aur koí us ká muqábala na kar sakegá. Wuh us jalálí mulk meṉ qiyám karegá, aur us ke háth meṉ tabáhí hogí. 17Aur wuh yih iráda karegá, ki apní mamlukat kí tamám shaukat ke sáth us meṉ dáḳhil ho, aur sádiq us ke sáth hoṉge; wuh kámyáb hogá, aur wuh use jawán kuṉwárí degá, ki us kí barbádí ká bá‘is ho; lekin yih tadbír qáim na rahegí, aur us ko is se kuchh fáida na hogá. 18Phir wuh bahrí mamálik ká ruḳh karegá, aur bahut se le legá: lekin ek sardár us kí malámat ko mauqúf karegá, balki use usí ke sir par ḍálegá. 19Tab wuh apne mulk ke qil‘on kí taraf muṛegá, lekin ṭhokar khákar gir paṛegá, aur ma‘dúm ho jáegá. 20Aur us kí jagah ek âur barpá hogá, jo us ḳhúbsúrat mamlukat meṉ ḳhirájgír ko bhejegá, lekin wuh chand roz meṉ beqahr o jang hí halák ho jáegá. 21Phir us kí jagah ek pájí barpá hogá, jo saltanat kí ‘izzat ká haqqdár na hogá, lekin wuh nágahán áegá, aur cháplúsí karke mamlukat par qábiz ho jáegá. 22Aur wuh sailáb i afwáj ko apne sámne ragedegá, aur shikast degá, aur amír i ‘ahd ko bhí na chhoṛegá. 23Aur jab us ke sáth ‘ahd o paimán ho jáegá, to dag̣ábází karegá, kyúṉki wuh baṛhegá aur ek qalíl jamá‘at kí madad se iqtidár hásil karegá. 24Aur aiyám i amn meṉ mulk ke zarḳhez maqámát meṉ dáḳhil hogá, aur jo kuchh us ko bápdádá aur un ke ábá o ajdád se na húá thá kar dikháegá. Wuh g̣anímat aur lúṭ aur mál un meṉ taqsím karegá, aur kuchh ‘arse tak mazbút qil‘oṉ ke ḳhiláf mansúbe báṉdhegá. 25Wuh apne zoráwar dil ko ubháregá, ki baṛí fauj ke sáth sháh i junúb par hamla kare; aur sháh i junúb niháyat baṛá aur zabardast lashkar lekar us ke muqábale ko niklegá, par wuh na ṭhahregá; kyúṉki wuh us ke ḳhiláf mansúbe báṉdheṉge. 26Balki jo us ká diyá kháte haiṉ wuhí use shikast deṉge, aur us kí fauj paráganda hogí, aur bahut se qatl hoṉge. 27Aur in dinoṉ bádsháhoṉ ke dil sharárat kí taraf máil hoṉge; wuh ek hí dastarḳhwán par baiṭhkar jhúṭh boleṉge: par kámyábí na hogí; kyúṉki ḳhátima muqarrara waqt par hogá. 28Tab wuh bahut sí g̣anímat lekar apne mulk ko wapás jáegá; aur us ká dil ‘ahd i muqaddas ke ḳhiláf hogá; aur wuh apní marzí púrí karke apne mulk ko wápas jáegá. 29Muqarrara waqt par wuh phir junúb kí taraf ḳhurúj karegá; lekin yih hamla pahle kí mánind na hogá; 30kyúṉki ahl i Kittím ke jaház us ke muqábale ko nikleṉge, aur wuh ranjída hokar muṛegá; aur ‘ahd i muqaddas par us ká g̣azab bhaṛkegá, aur wuh us ke mutábiq ‘amal karegá, balki wuh muṛkar un logoṉ se jo ‘ahd i muqaddas ko tark kareṉge ittifáq karegá. 31Aur afwáj us kí madad kareṉgí, aur wuh muhkam maqdis ko nápák aur dáimí qurbání ko mauqúf kareṉge, aur ujáṛnewálí makrúh chíz ko us meṉ nasb kareṉge. 32Aur wuh ‘ahd i muqaddas ke ḳhiláf sharárat karnewáloṉ ko ḳhushámad karke bargashta karegá; lekin apne Ḳhudá ko pahchánnewále taqwíyat pákar kuchh kar dikháeṉge. 33Aur wuh jo logoṉ meṉ ahl i dánish haiṉ bahutoṉ ho ta‘lím deṉge, lekin wuh kuchh muddat tak talwár aur ág aur asírí aur lúṭmár se tabáhhál raheṉge. 34Aur jab tabáhí meṉ paṛeṉge, to un ko thoṛí sí madad se taqwíyat pahuṉchegí, lekin bahutere ḳhushámadgoí se un meṉ á mileṉge. 35Aur ba‘z ahl i fahm tabáhhál hoṉge, táki pák o sáf aur barráq ho jáeṉ, jab tak áḳhirí waqt na á jáe; kyúṉki yih muqarrara waqt tak multawí hai. 36Aur bádsháh apní marzí ke mutábiq chalegá, aur takabbur karegá, aur sab ma‘búdoṉ se baṛá banegá, aur Haqq Ta‘álá ke ḳhiláf bahut sí hairatangez báteṉ kahegá, aur iqbálmand hogá, yaháṉ tak ki qahr kí taskín ho jáegí; kyúṉki jo kuchh muqarrar ho chuká hai, wáqi‘ hogá. 37Wuh apne bápdádá ke ma‘búdoṉ kí parwá na karegá, aur na ‘auratoṉ kí marg̣úba ko, aur na kisí âur ma‘búd ko mánegá, balki apne áp hí ko sab se bálá jánegá, 38aur apne makán par ma‘búd i hisár kí ta‘zím karegá: aur jis ma‘búd ko us ke bápdádá na jánte the, soná aur chándí aur qímatí patthar aur nafís hadye dekar us kí takrím karegá. 39Wuh begána ma‘búd kí madad se muhkam qil‘oṉ par hamla karegá; jo us ko qubúl kareṉge, un ko baṛí ‘izzat baḳhshegá: aur bahutoṉ par hákim banáegá, aur rishwat meṉ mulk ko taqsím karegá. 40Aur ḳhátima ke waqt meṉ sháh i junúb us par hamla karegá, aur sháh i shimál rath aur sawár aur bahut se jaház lekar girdbád kí mánind us par chaṛh áegá, aur mamálik meṉ dáḳhil hokar sailáb kí mánind guzregá. 41Aur jalálí mulk meṉ bhí dáḳhil hogá, aur bahut se mag̣lúb ho jáeṉge; lekin Adom aur Moáb aur baní ‘Ammon ke ḳháss log us ke háth se chhuṛá liye jáeṉge. 42Wuh dígar mamálik par bhí háth chaláegá: aur mulk i Misr bhí bach na sakegá. 43Balki wuh sone chándí ke ḳhazánoṉ aur Misr kí tamám nafís chízoṉ par qábiz hogá: aur Lúbí aur Kúshí bhí us ke hamrikáb hoṉge. 44Lekin mashriqí aur shimálí atráf se afwáheṉ use pareshán kareṉgí, aur wuh baṛe g̣azab se niklegá, ki bahutoṉ ko nest o nábúd kare. 45Aur wuh shándár muqaddas paháṛ aur samundar ke darmiyán sháhí ḳhaime lagáegá; lekin us ká ḳhátima ho jáegá, aur koí us ká madadgár na hogá.
Currently Selected:
Dáníel 11: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
