Dáníel 1
1
1Sháh i Yahúdáh Yahúyaqím kí saltanat ke tísre sál meṉ sháh i Bábul Nabúkadnazar ne Yarúshalem par chaṛháí karke us ká muhásara kiyá. 2Aur Ḳhudáwand ne sháh i Yahúdáh Yahúyaqím ko, aur Ḳhudá ke ghar ke ba‘z zurúf ko us ke hawále kar diyá, aur wuh un ko Sin‘ár kí sarzamín meṉ apne butḳháne meṉ le gayá; chunáṉchi us ne zurúf ko apne but ke ḳhazáne meṉ dáḳhil kiyá. 3Aur bádsháh ne apne ḳhwájasaráoṉ ke sardár Aspanaz ko hukm kiyá, ki baní Isráíl meṉ se aur bádsháh kí nasl meṉ se aur shurafá meṉ se logoṉ ko házir kare; 4wuh be‘aib jawán, balki ḳhúbsúrat aur hikmat meṉ máhir, aur har tarah se dánishwar, aur sáhib i ‘ilm hoṉ, jin meṉ yih liyáqat ho, ki sháhí qasr meṉ khaṛe raheṉ, aur wuh un ko Kasdíoṉ ke ‘ilm, aur un kí zabán kí ta‘lím de. 5Aur bádsháh ne un ke liye sháhí ḳhurák meṉ se, aur apne píne kí mai meṉ se rozána wazífa muqarrar kiyá, ki tín sál tak un kí parwarish ho, táki is ke ba‘d wuh bádsháh ke huzúr khaṛe ho sakeṉ. 6Aur un meṉ baní Yahúdáh meṉ se Dáníel aur Hananiyáh aur Mísáel aur ‘Azariyáh the. 7Aur ḳhwájasaráoṉ ke sardár ne un ke nám rakkhe; us ne Dáníel ko Beltashazar, aur Hananiyáh ko Sadrak, aur Mísáel ko Mísak, aur ‘Azariyáh ko ‘Abad Najú kahá. 8Lekin Dáníel ne apne dil meṉ iráda kiyá, ki apne áp ko sháhí ḳhurák se, aur us kí mai se jo wuh pítá thá nápák na kare, is liye us ne ḳhwájasaráoṉ ke sardár se darḳhwást kí, ki wuh apne áp ko nápák karne se ma‘zúr rakkhá jáe. 9Aur Ḳhudá ne Dáníel ko ḳhwájasaráoṉ ke sardár kí nazar meṉ maqbúl o mahbúb ṭhahráyá. 10Chunáṉchi ḳhwájasaráoṉ ke sardár ne Dáníel se kahá, ki Maiṉ apne Ḳhudáwand bádsháh se, jis ne tumhárá kháná píná muqarrar kiyá hai, ḍartá húṉ. Tumháre chihre us kí nazar meṉ tumháre ham‘umroṉ ke chihroṉ se kyúṉ zabún hoṉ, aur yúṉ tum mere sir ko bádsháh ke huzúr ḳhatre meṉ ḍálo? 11Tab Dáníel ne dárog̣e se, jis ko ḳhwájasaráoṉ ke sardár ne Dáníel aur Hananiyáh aur Mísáel aur ‘Azariyáh par muqarrar kiyá thá, kahá, 12Maiṉ terí minnat kartá húṉ, ki tú das roz tak apne ḳhádimoṉ ko ázmákar dekh, aur kháne ko ság pát aur píne ko pání ham ko dilwá; 13tab hamáre chihre aur un jawánoṉ ke chihre jo sháhí kháná kháte haiṉ tere huzúr dekhe jáeṉ. Phir apne ḳhádimoṉ se jo tú munásib samjhe so kar. 14Chunáṉchi us ne un kí yih bát qubúl kí, aur das roz tak un ko ázmáyá. 15Aur das roz ke ba‘d un ke chihroṉ par un sab jawánoṉ kí chihroṉ kí nisbat jo sháhí kháná kháte the ziyáda raunaq aur tázagí nazar áí. 16Tab dárog̣e ne un kí ḳhurák aur mai ko jo un ke liye muqarrar thí mauqúf kiyá, aur un ko ság pát kháne ko diyá. 17Tab Ḳhudá ne un chároṉ jawánoṉ ko ma‘rifat aur har tarah kí hikmat aur ‘ilm meṉ mahárat baḳhshí, aur Dáníel har tarah kí royá aur ḳhwáb meṉ sahib i fahm thá. 18Aur jab wuh din guzar gaye jin ke ba‘d bádsháh ke farmán ke mutábiq un ko házir honá thá, to ḳhwájasaráoṉ ká sardár un ko Nabúkadnazar ke huzúr le gayá. 19Aur bádsháh ne un se guftogú kí, aur un meṉ se Dáníel aur Hananiyáh aur Mísáel aur ‘Azariyáh kí mánind koí na thá; is liye wuh bádsháh ke huzúr khaṛe rahne lage. 20Aur har tarah kí ḳhiradmandí aur dánishwarí ke báb meṉ jo kuchh bádsháh ne un se púchhá un ko tamám fálgíroṉ aur najúmíoṉ se jo us ke tamám mulk meṉ the das darja bihtar páyá. 21Aur Dáníel Ḳhoras bádsháh ke pahle sál tak zinda thá.
Currently Selected:
Dáníel 1: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
