2 Salátín 16
16
1Aur Ramaliyáh ke beṭe Fiqah ke sattrahweṉ baras se sháh i Yahúdáh Yútám ká beṭá Áḳhaz saltanat karne lagá. 2Aur jab wuh saltanat karne lagá, to bís baras ká thá, aur us ne solah baras Yarúshalem meṉ bádsháhí kí. Aur us ne wuh kám na kiyá jo Ḳhudáwand us ke Ḳhudá kí nazar meṉ bhalá hai, jaisá us ke báp Dáúd ne kiyá thá. 3Balki wuh Isráíl ke bádsháhoṉ kí ráh par chalá; aur us ne un qaumoṉ ke nafratí dastúr ke mutábiq, jin ko Ḳhudáwand ne baní Isráíl ke sámne se ḳhárij kar diyá thá, apne beṭe ko bhí ág meṉ chalwáyá. 4Aur úṉche maqámoṉ, aur ṭíloṉ par, aur har ek hare daraḳht ke níche us ne qurbání kí, aur baḳhúr jaláyá. 5Tab sháh i Arám Razín aur sháh i Isráíl Ramaliyáh ke beṭe Fiqah ne laṛne ko Yarúshalem par chaṛháí kí. Aur unhoṉ ne Áḳhaz ko gher liyá, lekin us par gálib na á sake. 6Us waqt sháh i Arám Razín ne Ailát ko fath karke Arám meṉ phir shámil kar liyá, aur Yahúdíoṉ ko Ailát se nikál diyá; aur Arámí Ailát meṉ ákar waháṉ bas gaye, jaisá áj tak hai. 7So Áḳhaz ne sháh i Asúr Tiglatpilásar ke pás elchí rawána kiye, aur kahlá bhejá, ki Maiṉ terá ḳhádim aur beṭá húṉ: so tú á, aur mujh ko sháh i Arám ke háth se, aur sháh i Isráíl ke háth se jo mujh par chaṛh áe haiṉ riháí de. 8Aur Áḳhaz ne us chándí aur sone ko, jo Ḳhudáwand ke ghar meṉ aur sháhí mahall ke ḳhazánoṉ meṉ milá lekar sháh i Asúr ke liye nazrána bhejá. 9Aur sháh i Asúr ne us kí bát mání; chunáṉchi sháh i Asúr ne Damishq par lashkarkashí kí, aur use le liyá, aur waháṉ ke logoṉ ko asír karke Qír meṉ le gayá, aur Razín ko qatl kiyá. 10Aur Áḳhaz bádsháh sháh i Asúr Tiglatpilásar kí muláqát ke liye Damishq ko gayá, aur us mazbah ko dekhá jo Damishq meṉ thá; aur Áḳhaz bádsháh ne us mazbah ká naqsha, aur us kí sárí san‘at ká namúna Úriyáh káhin ke pás bhejá. 11Aur Úriyáh káhin ne ṭhík usí namúne ke mutábiq jise Áḳhaz ne Damishq se bhejá thá ek mazbah banáyá. Aur Áḳhaz bádsháh ke Damishq se lauṭne tak Úriyáh káhin ne use taiyár kar diyá. 12Jab bádsháh Damishq se lauṭ áyá, to bádsháh ne mazbah ko dekhá; aur bádsháh mazbah ke pás gayá, aur us par qurbání guzrání. 13Aur us ne us mazbah par apní soḳhtaní qurbání, aur apní nazr kí qurbání jaláí, aur apná tapáwan tapáyá, aur apní salámatí ke zabíhoṉ ká ḳhún usí mazbah par chhiṛká. 14Aur us ne pítal ká wuh mazbah jo Ḳhudáwand ke áge thá haikal ke sámne se, ya‘ní apne mazbah aur Ḳhudáwand kí haikal ke bích meṉ se, uṭhwákar use apne mazbah ke shimál kí taraf rakhwá diyá. 15Aur Áḳhaz bádsháh ne Úriyáh káhin ko hukm kiyá, ki Baṛe mazbah par subh kí soḳhtaní qurbání, aur shám kí nazr kí qurbání, aur bádsháh kí soḳhtaní qurbání, aur us kí nazr kí qurbání, aur mamlukat ke sab logoṉ kí soḳhtaní qurbání aur un kí nazr kí qurbání, aur un ká tapáwan chhaṛháyá kar; aur soḳhtaní qurbání ká sárá ḳhún, aur zabíhe ká sárá ḳhún, us par chhiṛká kar: aur pítal ká wuh mazbah mere suwál karne ke liye rahegá. 16So jo kuchh Áḳhaz bádsháh ne farmáyá, Úriyáh káhin ne wuh sab kiyá. 17Aur Áḳhaz bádsháh ne kursíoṉ ke kanároṉ ko káṭ ḍálá, aur un ke úpar ke hauz ko un se judá kar diyá, aur us baṛe hauz ko pítal ke bailoṉ par se jo us ke níche the utárkar pattharoṉ ke farsh par rakh diyá. 18Aur us ne us ráste ko jis par chhat thí, aur jise unhoṉ ne sabt ke din ke liye haikal ke andar banáyá thá, aur bádsháh ke darámad ke ráste ko jo báhar thá sháh i Asúr ke sabab se Ḳhudáwand ke ghar meṉ shámil kar diyá. 19Aur Áḳhaz ke báqí kám, aur sab kuchh jo us ne kiyá, so kyá wuh Yahúdáh ke bádsháhoṉ kí tawáríḳh kí kitáb meṉ qalamband nahíṉ? 20Aur Áḳhaz apne bápdádá ke sáth so gayá, aur Dáúd ke shahr meṉ apne bápdádá ke sáth dafn húá: aur us ká beṭá Hizqiyáh us kí jagah bádsháh húá.
Currently Selected:
2 Salátín 16: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
