1 Samúel 8
8
1Jab Samúel buḍḍhá ho gayá, to us ne apne beṭoṉ ko Isráílíoṉ ke qází ṭhahráyá. 2Us ke pahlauṭhe ká nám Yúel, aur us ke dúsre beṭe ká nám Abiyáh thá: wuh donoṉ Baírsaba‘ meṉ qází the. 3Par us ke beṭe us kí ráh par na chale, balki wuh nafa‘ ke lálach se rishwat lete, aur insáf ká ḳhún kar dete the.
4Tab sab Isráílí buzurg jama‘ hokar Rámah meṉ Samúel ke pás áe; 5aur us se kahne lage, Dekh, tú za‘íf hai, aur tere beṭe terí ráh par nahíṉ chalte: ab tú kisí ko hamárá bádsháh muqarrar kar de jo âur qaumoṉ kí tarah hamárí ‘adálat kare. 6Lekin jab unhoṉ ne kahá, ki Ham ko koí bádsháh de jo hamárí ‘adálat kare, to yih bát Samúel ko burí lagí, aur Samúel ne Ḳhudáwand se du‘á kí. 7Aur Ḳhudáwand ne Samúel se kahá, ki Jo kuchh yih log tujh se kahte haiṉ, tú us ko mán; kyúṉki unhoṉ ne terí nahíṉ, balki merí hiqárat kí hai, ki maiṉ un ká bádsháh na rahúṉ. 8Jaise kám wuh us din se, jab se maiṉ un ko Misr se nikál láyá, áj tak karte áe haiṉ, ki mujhe tark karke âur ma‘búdoṉ kí parastish karte rahe haiṉ, waisá hí wuh tujh se karte haiṉ. 9So tú un kí bát mán; taubhí tú sanjídagí se un ko ḳhúb jatá de, aur un ko batá bhí de, ki jo bádsháh un par saltanat karegá, us ká taríqa kaisá hogá.
10Aur Samúel ne un logoṉ ko jo us se bádsháh ke tálib the Ḳhudáwand kí sab báteṉ kah sunáíṉ. 11Aur us ne kahá, ki Jo bádsháh tum par saltanat karegá, us ká taríqa yih hogá, ki wuh tumháre beṭoṉ ko lekar apne rathoṉ ke liye aur apne risále meṉ naukar rakkhegá, aur wuh us ke rathoṉ ke áge áge dauṛeṉge. 12Aur wuh un ko hazár hazár ke sardár aur pachás pachás ke jama‘dár banáegá; aur ba‘z se hal jutwáegá, aur fasl kaṭwáegá, aur apne liye jang ke hathyár aur apne rathoṉ ke sáz banwáegá; 13aur tumhárí beṭiyoṉ ko lekar gandhin, aur báwarchin, aur nánpaz banáegá; 14aur tumháre khetoṉ, aur tákistánoṉ, aur zaitún ke bág̣oṉ ko jo achchhe se achchhe hoṉge lekar apne ḳhidmatgároṉ ko ‘atá karegá; 15aur tumháre khetoṉ aur angúrí bág̣oṉ ká daswáṉ hissa lekar apne ḳhojoṉ aur ḳhádimoṉ ko degá; 16aur tumháre naukar chákaroṉ aur lauṉḍiyoṉ, aur tumháre shakíl jawánoṉ, aur tumháre gadhoṉ ko lekar apne kám par lagáegá. 17Aur wuh tumhárí bheṛ bakriyoṉ ká bhí daswáṉ hissa legá: so tum us ke gulám ban jáoge. 18Aur tum us din us bádsháh ke sabab se jise tum ne apne liye chuná hogá, faryád karoge; par us din Ḳhudáwand tum ko jawáb na degá. 19Taubhí logoṉ ne Samúel kí bát na suní, aur kahne lage, Nahíṉ; ham to bádsháh cháhte haiṉ jo hamáre úpar ho; 20táki ham bhí âur sab qaumoṉ kí mánind hoṉ, aur hamárá bádsháh hamárí ‘adálat kare, aur hamáre áge áge chale, aur hamárí taraf se laṛáí kare. 21Aur Samúel ne logoṉ kí sab báteṉ suníṉ, aur un ko Ḳhudáwand ke kánoṉ tak pahuṉcháyá. 22Aur Ḳhudáwand ne Samúel ko farmáyá, Tú un kí bát mán aur un ke liye ek bádsháh muqarrar kar. Tab Samúel ne Isráíl ke logoṉ se kahá, ki Tum sab apne apne shahr ko chale jáo.
Currently Selected:
1 Samúel 8: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)
