1 Samúel 6
6
1So Ḳhudáwand ká sandúq sát mahíne tak Filistíoṉ ke mulk meṉ rahá. 2Tab Filistíoṉ ne káhinoṉ aur nujúmíoṉ ko buláyá, aur kahá, ki Ham Ḳhudáwand ke is sandúq ko kyá kareṉ? ham ko batáo, ki ham kyá sáth karke use us kí jagah bhejeṉ? 3Unhoṉ ne kahá, ki Agar tum Isráíl ke Ḳhudá ke sandúq ko wápas bhejte ho, to use ḳhálí na bhejná: balki jurm kí qurbání us ke liye zarúr hí sáth karná: tab tum shifá páoge, aur tum ko ma‘lúm ho jáegá, ki wuh tum se kis liye dastbardár nahíṉ hotá. 4Unhoṉ ne púchhá, ki Wuh jurm kí qurbání jo ham us ko deṉ kyá ho? Unhoṉ ne jawáb diyá, ki Filistí sardároṉ ke shumár ke mutábiq sone kí páṉch gilṭiyáṉ, aur sone hí ke páṉch chuhiyáṉ: kyúṉki tum sab aur tumháre sardár donoṉ ek hí ázár meṉ mubtalá húe. 5So tum apní gilṭiyoṉ kí múrateṉ, aur un chuhiyoṉ kí múrateṉ jo mulk ko ḳharáb kartí haiṉ banáo; aur Isráíl ke Ḳhudá kí tamjíd karo; sháyad yúṉ wuh tum par se, aur tumháre deotáoṉ par se, aur tumhare mulk par se apná háth halká kar le. 6Tum kyúṉ apne dil ko saḳht karte ho, jaise Misríoṉ ne aur Fir‘aun ne apne dil ko saḳht kiyá? jab us ne un ke darmiyán ‘ajíb kám kiye, to kyá unhoṉ ne logoṉ ko jáne na diyá, aur kyá wuh chale na gaye? 7Ab tum ek nayí gáṛí banáo, aur do dúdhwálí gáeṉ, jin ke júá na lagá ho, lo, aur un gáeoṉ ko gáṛí meṉ joto, aur un ke bachchoṉ ko ghar lauṭá láo. 8Aur Ḳhudáwand ká sandúq lekar us gáṛí par rakkho; aur sone kí chízoṉ ko jin ko tum jurm kí qurbání ke taur par sáth karoge, ek sandúqche meṉ karke us ke pahlú meṉ rakh do; aur use rawána kar do, ki chalá jáe. 9Aur dekhte rahná, agar wuh apní kí sarhadd ke ráste Bait Shams ko jáe, to usí ne ham par yih balá e ‘azím bhejí: aur agar nahíṉ, to ham ján leṉge, ki us ká háth ham par nahíṉ chalá; balki yih hádisa jo ham par húá ittifáqí thá. 10So un logoṉ ne aisá hí kiyá; aur do dúdhwálí gáeṉ lekar un ko gáṛí meṉ jotá, aur un ke bachchoṉ ko ghar meṉ band kar diyá. 11Aur Ḳhudáwand ke sandúq, aur sone kí chuhiyoṉ, aur apní gilṭiyoṉ kí múratoṉ ke sandúqche ko gáṛí par rakh diyá. 12Un gáeoṉ ne Bait Shams ká sídhá rásta liyá; wuh saṛak hí saṛak ḍakártí gayíṉ, aur dahine yá báeṉ háth na muṛíṉ: aur Filistí sardár un ke píchhe píchhe Bait Shams kí sarhadd tak gaye. 13Aur Bait Shams ke log wádí meṉ gehúṉ kí fasl káṭ rahe the: unhoṉ ne jo áṉkheṉ uṭháíṉ to sandúq ko dekhá, aur dekhte hí ḳhush ho gaye. 14Aur gáṛí Baitshamsí Yashú‘ ke khet meṉ ákar waháṉ khaṛí ho gayí, jaháṉ ek baṛá patthar thá: so unhoṉ ne gáṛí kí lakṛiyoṉ ko chírá, aur gáeoṉ ko soḳhtaní qurbání ke taur par Ḳhudáwand ke huzúr guzráná. 15Aur Láwíoṉ ne Ḳhudáwand ke sandúq ko aur us sandúqche ko jo us ke sáth thá, jis meṉ sone kí chízeṉ thíṉ, níche utárá, aur un ko us baṛe patthar par rakkhá: aur Bait Shams ke logoṉ ne usí din Ḳhudáwand ke liye soḳhtaní qurbáníáṉ chaṛháíṉ aur zabíhe guzráne. 16Jab un páṉchoṉ Filistí sardároṉ ne yih dekh liyá, to wuh usí dín ‘Aqrún ko lauṭ gaye.
17Sone kí gilṭiyáṉ jo Filistíoṉ ne jurm kí qurbání ke taur par Ḳhudáwand ko guzráníṉ, wuh yih haiṉ:— ek Ashdúd kí taraf se; ek G̣azzah kí taraf se; ek Asqalon kí taraf se; ek Ját kí taraf se; aur ek ‘Aqrún kí taraf se; 18aur wuh sone kí chuhiyáṉ, Filistíoṉ ke un páṉchoṉ sardároṉ ke shahroṉ ke shumár ke mutábiq thíṉ, jo fasíldár shahroṉ aur dihát ke málik us baṛe patthar tak the, jis par unhoṉ ne Ḳhudáwand ke sandúq ko rakkhá thá jo áj ke din tak Baitshamsí Yashú‘ ke khet meṉ maujúd hai. 19Aur us ne Bait Shams ke logoṉ ko márá, is liye ki unhoṉ ne Ḳhudáwand ke sandúq ke andar jháṉká thá; so us ne un ke pachás hazár aur sattar ádmí már ḍále: aur waháṉ ke logoṉ ne mátam kiyá, is liye ki Ḳhudáwand ne un logoṉ ko baṛí marí se márá. 20So Bait Shams ke log kahne lage, ki Kis kí majál hai, ki is Ḳhudáwand Ḳhudá e quddús ke áge khaṛá ho? aur wuh hamáre pás se kis kí taraf jáe? 21Aur unhoṉ ne Qaryat Ya‘rím ke báshindoṉ ke pás qásid aur kahlá bhejá, ki Filistí Ḳhudáwand ke sandúq ko wápas le áe haiṉ; so tum áo, aur use apne háṉ le jáo.
Currently Selected:
1 Samúel 6: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)