1 Samúel 3
3
1Aur wuh laṛká Samúel ‘Elí ke sámne Ḳhudáwand kí ḳhidmat kartá thá. Aur un dinoṉ meṉ Ḳhudáwand ká kalám giránqadr thá, koí royá barmalá na hotí thí. 2Aur us waqt aisá húá, ki jab ‘Elí apní jagah leṭá thá, (us kí áṉkheṉ dhuṉdhláne lagíṉ, aur wuh dekh nahíṉ saktá thá:) 3aur Ḳhudá ká chirág̣ ab tak bujhá nahíṉ thá, aur Samúel Ḳhudáwand kí haikal meṉ jaháṉ Ḳhudá ká sandúq thá leṭá húá thá; 4to Ḳhudáwand ne Samúel ko pukárá: us ne kahá, Maiṉ házir húṉ; 5aur wuh dauṛkar ‘Elí ke pás gayá, aur kahá, Tú ne mujhe pukárá, maiṉ házir húṉ. Us ne kahá, Maiṉ ne nahíṉ pukárá; phir leṭ já. So wuh jákar leṭ gayá. 6Aur Ḳhudáwand ne phir pukárá, Samúel! Samúel uṭhkar ‘Elí ke pás gayá, aur kahá, Tú ne mujhe pukárá, so maiṉ házir húṉ. Us ne kahá, Ai mere beṭe, maiṉ ne nahíṉ pukárá; phir leṭ já. 7Aur Samúel ne hanoz Ḳhudáwand ko nahíṉ pahcháná thá, aur na Ḳhudáwand ká kalám us par záhir húá thá. 8Phir Ḳhudáwand ne tísrí daf‘a Samúel ko pukárá. Aur wuh uṭhkar ‘Elí ke pás gayá, aur kahá, Tú ne mujhe pukárá, so maiṉ házir húṉ. So ‘Elí ján gayá, ki Ḳhudáwand ne us laṛke ko pukárá. 9Is liye ‘Elí ne Samúel se kahá, Já, leṭ rah; aur agar wuh tujhe pukáre, to tú kahná, Ai Ḳhudáwand, farmá, kyúṉki terá banda suntá hai. So Samúel jákar apní jagah par leṭ gayá. 10Tab Ḳhudáwand á khaṛá húá, aur pahle kí tarah pukárá, Samúel! Samúel! Samúel ne kahá, Farmá, kyúṉki terá banda suntá hai. 11Ḳhudáwand ne Samúel se kahá, Dekh, maiṉ Isráíl meṉ aisá kám karne par húṉ, jis se har sunnewále ke kan jhanná jáeṉge. 12Us din maiṉ ‘Elí par sab kuchh jo maiṉ ne us ke gharáne ke haqq meṉ kahá hai shurú‘ se áḳhir tak púrá karúṉgá. 13Kyúṉki maiṉ use batá chuká húṉ, ki Maiṉ us badkárí ke sabab se jise wuh jántá hai, hamesha ke liye us ke ghar ká faisala karúṉgá, kyúṉki us ke beṭoṉ ne apne úpar la‘nat buláí, aur us ne un ko na roká. 14Isí liye ‘Elí ke gharáne kí bábat maiṉ ne qasam kháí, ki ‘Elí ke gharáne kí badkárí na to kabhí kisí zabíhe se sáf hogí, na hadye se. 15Aur Samúel subh tak leṭá rahá; tab us ne Ḳhudáwand ke ghar ke darwáze khole. Aur Samúel ‘Elí par royá záhir karne se ḍará. 16Tab ‘Elí ne Samúel ko bulákar kahá, Ai mere beṭe, Samúel! Us ne kahá, Maiṉ házir húṉ. 17Tab us ne púchhá, Wuh kyá bát hai jo Ḳhudáwand ne tujh se kahí hai? Maiṉ terí minnat kartá húṉ, use mujh se poshída na rakh. Agar tú kuchh bhí un bátoṉ meṉ se jo us ne tujh se kahí haiṉ chhipáe, to Ḳhudá tujh se aisá hí kare, balki us se bhí ziyáda. 18Tab Samúel ne us ko rattí rattí hál batáyá, aur us se kuchh na chhipáyá. Us ne kahá, Wuh Ḳhudáwand hai: jo wuh bhalá jáne, so kare. 19Aur Samúel baṛá hotá gayá, aur Ḳhudáwand us ke sáth thá; aur us ne us kí bátoṉ meṉ se kisí ko miṭṭí meṉ milne na diyá. 20Aur sab baní Isráíl ne Dán se Baírsaba‘ tak ján liyá, ki Samúel Ḳhudáwand ká nabí muqarrar húá. 21Aur Ḳhudáwand Sailá meṉ phir záhir húá: kyúṉki Ḳhudáwand ne apne áp ko Sailá meṉ Samúel par apne kalám ke zarí‘e se záhir kiyá.
Currently Selected:
1 Samúel 3: URDR55
Highlight
Copy
Compare
Share
Want to have your highlights saved across all your devices? Sign up or sign in
British and Foreign Bible Society 1955, 2016
Learn More About Kitáb i Muqaddas 1955 (Tauret, Zabúr, Ambiyá ke Sahífa, aur Injíl)