Римлилерге 7

Эндиден сонъ Къануннынъ къуллары дегильмиз

1Къанунны бильгенлерге айтам: дин къардашлар, Къанун тек тири адамларнынъ яшайышында падишалыкъ эткенини бильмейсизми? 2#1 Кор 7.39Къанунгъа коре, эвли къадын тири акъайына багълы. Амма акъайы ольсе, къадын оны акъайына багълагъан къанундан къуртула. 3#Мт 5.32Шунынъ ичюн, акъайы тири олгъан къадын башкъа акъайнен ятса, ороспу сайыла. Амма акъайы ольсе, къадын къанундан къуртула. Башкъа акъайнен ятса да, ороспу сайылмай.

4 # Гал 2.19; 5.18, 22; Эф 2.15; 5.19; Кол 2.14 Агъа-къардашларым, сизлер де бойле, Месихнинъ олюми ичюн Къануннынъ огюнде олю олдынъыз ве Алланынъ файдасына берекет бермек ичюн, олюмден тирильген Месихке къошулдынъыз. 5Бедений истеклерине коре яшагъанымызда, Къанунгъа коре гуналы истеклер беденлеримизнинъ мучелеринде арекет эте эдилер, ве олар кетирген берекет олюм эди. 6#Рим 6.4Энди исе, бизни багълап тургъан Къануннынъ огюнде олип, ондан къуртулдыкъ ве эвельки киби Къанун арифине дегиль, Рухнынъ ярдымынен янъы ёлунда Аллагъа хызмет этмеге имкян алдыкъ.

Къанун ве гуна

7 # Чыкъ 20.17; Рим 3.20; 4.15 Шунынъ ичюн не айтайыкъ? Къанун – гунадырмы? Асыл ёкъ! Амма Къанун олмаса эди, мен гуна не олгъаныны бильмез эдим. Къанун «истеме», деп буюрмаса, мен «истек» не олгъаныны бильмез эдим. 8#1 Кор 15.56Эмирнинъ ярдымынен гуна фырсат тапып, меним юрегимде эр тюрлю истекни уятты. Къанун олмагъанда исе, гуна олюдир. 9Бир вакъытлары мен Къанунны бильмейип яшай эдим, амма эмир пейда олгъан сонъ, гуна тири олды, 10#Лев 18.5мен исе ольдим, ве омюр кетиреджек олгъан эмир олюмни кетирди. 11Эмирнинъ ярдымынен гуна фырсат тапып, мени алдатты ве эмирнинъ ярдымынен мени ольдюрди. 12#Текр 4.8; Збр 18.8-9Бойлеликнен, Къанун азиздир, онынъ эмирлери де азиз, адалетли ве яхшыдыр.

13Сонъ, яхшы бир шей манъа олюмни кетирдими? Мытлакъа ёкъ! Буны гуна япты. Яхшы бир шей ярдымынен манъа олюмни кетирип, гуна озюни ачыкътан косьтерди. Бойле этип, эмирнинъ ярдымынен гуна буюк къувет алды.

Гунанен олгъан куреш

14Биз билемиз ки, Къанун Рухтан келе, мен исе бедени ве къаны олгъан адамым. Гуна мени сатын алды ве озюне къул япты. 15#Гал 5.17Озюм япкъан ишлеримни анълап оламайым. Нени истесем, оны япмайым, нени кореджек козюм олмаса, оны япам. 16#1 Тим 1.8Эгер истемеген шейни япсам, Къанун яхшы олгъаныны къабул этем. 17Лякин бу ишлерни мен озюм дегиль, ичимде яшагъан гуна япа. 18#Баш 6.5; Эюп 14.4; Збр 50.5Билем ки, менде, яни беденимде яхшы шей олмай. Ичимде яхшылыкъ япмакъ истеги бар, амма оны япмагъа кучюм ёкъ. 19#Гал 5.17Мен истеген яхшы ишни япмайым, истемеген яман ишни исе япам. 20Эгер истемеген ишни япсам, бу ишни мен озюм дегиль, ичимде яшагъан гуна япа.

21Шунынъ ичюн, мен бойле бильдим: яхшылыкъ япмагъа истесем де, тек яманлыкъ япып олам. 22#Збр 1.2Ичимдеки джаным Алланынъ Къанунына къувана да. 23#1 Пётр 2.11; Гал 5.17Мен корем ки, беденим ве акъылым душманлыкъ эткен эки тюрлю къанунгъа коре арекет этелер, ве гуна мени беденимде арекет эткен къанунгъа коре эсир япа. 24Мен не къадар заваллым! Олюм кетирген бу беденден мени ким къуртараджакъ? 25Раббимиз Иса Месих ярдымынен Алла къуртараджакъ! Онъа шукюрлер олсун!

Бойлеликнен, бир тарафтан, акъылым Алланынъ Къанунына къул олып, арекет эте, башкъа тарафтан исе, беденим гуна къанунынынъ къулу олып къала.

Currently Selected:

Римлилерге 7: CTB

Highlight

Copy

Compare