Сайылар 18

Руханийлер ве левийлилернинъ вазифелери

1 # Чыкъ 28.38 РАББИ Харунгъа бойле деди:

– Сен, сенинъ огъулларынъ ве къабиленъ Мукъаддес Ерде япыладжакъ къанунсызлыкъ ичюн джевапкяр оладжакъсынъыз. Сен ве огъулларынъ озь руханийлигинъизде япыладжакъ къанунсызлыкъ ичюн джевапкяр оладжакъсынъыз. 2#Сай 3.6-10Сенинъ агъа-къардашларынъ, Левий къабилеси, баба-деденънинъ сою сенинъ янынъда олсунлар. Олар санъа къошулсынлар ве санъа хызмет этсинлер. Сен ве огъулларынъ исе Шаатлыкъ Чадырында хызмет этинъиз. 3Олар сенинъ огюнъде джевапкяр олсун ве Чадырнен багълы бутюн хызметлерни беджерсин. Ялынъыз Мукъаддес Ернинъ шейлерине ве къурбан ерине якъынлашмасынлар, ёкъса, олар да, сиз де оледжексинъиз. 4Олар санъа къошулсын ве Корюшюв Чадырынен багълы бутюн хызметлерни беджерсинлер, Чадырда эр бир ишни япсынлар. Башкъа ич кимсе сизге якъынлашмасын. 5#Сай 1.53Илериде Исраиль огъулларына къаршы гъазап тюшмесин деп, Мукъаддес Ернен ве къурбан еринен багълы хызметлерни беджеринъиз. 6Иште, Мен Исраиль огъуллары арасындан агъа-къардашларынъыз левийлилерни алдым ве оларны сизге бир бахшыш оларакъ бердим. Олар РАББИге багъышлангъандыр ве Корюшюв Чадырынен багълы хызметлерни япсынлар. 7#Чыкъ 26.31; Лев 16.2; Сай 1.51Лякин тек сен ве огъулларынъ къурбан еринен перденинъ артындакинен багълы руханийлик вазифелерини беджеринъиз ве хызметинъизни этинъиз. Руханийлик хызметини Мен сизге бахшыш оларакъ берем. Сизден башкъа эр ким якъынлашып хызмет этсе, ольдюриледжек.

Руханийлернинъ пайы

8 # Чыкъ 29.28; Лев 7.32; Сай 5.9 Сонъ РАББИ Харунгъа бойле деди:

– Манъа котериледжек бахшышлар ичюн сен джевапкяр оладжакъсынъ. Исраиль огъулларынынъ эписи азиз бахшышларыны Мен санъа ве огъулларынъа берем. Олар сизинъ руханийлик пайынъыз олсун. Бу – эбедий низамнамедир. 9Энъ азиз бахшышлардан, атеште якъыладжакъ къурбанлардан булар сенинъ олсун: олар Манъа кетириледжек эр бахшыш – ашлыкъ бахшышлары, гуналар ичюн къурбанлар ве къабаат ичюн къурбанларнынъ эписи. Бу улу азизликлер сенинъ ве огъулларынъки оладжакъ. 10Оларны энъ азиз бахшыш оларакъ ашанъыз. Эр эркек киши ондан ашап олур. Оларны азизлик деп сайынъыз.

11 # Лев 22.2, 3, 11-13 Оларнынъ котериледжек бахшышларындан булар сенинъ олсун: Исраиль огъулларынынъ эписи салландырыладжакъ бахшышларны Мен санъа, огъулларынъа ве къызларынъа берем. Бу – эбедий низамнамедир. Сенинъ эвинъде элял олгъан эр кес оларны ашап олур.

12 # Текр 18.4 Мен санъа энъ яхшы зейтюн ягъыны, энъ яхшы янъы шарапны ве ашлыкъны, олар РАББИге берген биринджи берекетлерини бердим. 13#Чыкъ 23.19Топракънынъ биринджи берекетлеринден РАББИге кетириледжеклернинъ эписи сенинъки олсун. Сенинъ эвинъде элял олгъан эр кес оларны ашап олур.

14 # Лев 27.21, 28 Исраиль топрагъында РАББИге багъышлангъан эр шей сенинъ олсун. 15#Чыкъ 13.2, 11-16; Сай 3.46-47Эр биринджи догъгъан, РАББИге багъышлангъан эм адам, эм айван сенинъ олсун. Ялынъыз биринджи догъгъан эр бала ве арам сайылгъан айванларнынъ эр биринджи догъгъан баласы сатын алынмакъ керек. 16#Чыкъ 30.13Бир айлыкъ чагъында олгъанда, олар ичюн беш кумюш#18.16 Беш кумюш – къ. еуд. «5 шекель». акъча берильсин. Бир кумюшнинъ чекиси мукъаддес шекель чекисинде олсун. Бир шекельде йигирми гера бар.

17 # Чыкъ 13.2, 11-16 Лякин биринджи догъгъан бугъа, къочкъар, я да эчки ичюн акъча алма. Олар азизликтир. Къанларыны къурбан ерине септир ве ягъыны, РАББИге хош къокъу чыкъармакъ ичюн, къурбан оларакъ атеште якъ. 18#Чыкъ 29.26-28Оларнынъ эти сенинъ оладжакъ. Салландырыладжакъ бахшыш оларакъ кокреги ве огдеки онъ аягъы да сенинъ оладжакъ. 19#Лев 2.13; 2 Тар 13.5Исраиль огъулларынынъ РАББИ ичюн котериледжек азиз башлыкъларнынъ эписини Мен санъа, огъулларынъа ве къызларынъа берем. Бу – эбедий низамнамедир, РАББИнинъ огюнде санъа ве сенинъ эвлятларынъа берильген эбедий туз васиетидир.

20 # Текр 10.9; 12.12; 14.27; 18.1-2; Ехо 13.33; 14.3; 18.7; Ехез 44.28 РАББИ Харунгъа бойле деди:

– Оларнынъ топрагъында сенинъ къысметинъ олмайджакъ, араларында ич бир пайынъ олмайджакъ. Исраиль огъулларынынъ арасында сенинъ къысметинъ де, пайынъ да – Меним.

Левийлилернинъ пайы

21 # Лев 27.30; Текр 14.22 Левий огъулларына, Корюшюв Чадырында беджерген хызметлери ичюн, Мен Исраильде бутюн олгъан барлыгъынынъ онда бир пайыны оларнынъ пайы оларакъ бердим. 22Исраиль огъуллары, гуна къазанмамакъ ве ольмемек ичюн, илериде Корюшюв Чадырына якъынлашмасынлар. 23Левийлилер Корюшюв Чадырындаки хызметлерни беджерсин ве оларнынъ япкъан къабаатлары ичюн джевапкяр олсунлар. Бу – несиллеринъизге эбедий низамнамедир. Исраиль огъулларынынъ арасында оларнынъ пайы олмайджакъ. 24Исраиль огъулларынынъ кетирильген онда бир пайыны, оларнынъ РАББИге котериледжек бахшышларыны Мен левийлилерге оларнынъ пайы оларакъ берем. Шу себептен Мен левийлилерге, Исраиль огъуллары арасында оларнынъ пайы олмайджакъ, дедим.

Левийлилернинъ он пайда бир пайы

25РАББИ Мусагъа бойле деди:

26 # Нех 10.38 – Левийлилерге бойле айт:

Исраиль огъулларындан онда бир пайыны алгъанда (Мен оны сизге пайынъыз оларакъ бердим), ондан да котериледжек бахшыш оларакъ онда бир пайыны Манъа кетиринъиз. Онда бир пайынынъ он пайда бир пайыны беринъиз. 27Армандан ашлыкъ ве шарап чапчагъындан шарап оларакъ, олар сизинъ котериледжек бахшышларынъыз деп сайыладжакълар. 28Бойлеликнен, Исраиль огъуллары берген онда бир пайларындан алып, РАББИге котериледжек бахшышларынъызны кетиреджексинъиз. Олардан сиз РАББИ ичюн котериледжек бахшышларны руханий Харунгъа береджексинъиз. 29Бутюн сизге бахшыш этильгенлерден РАББИ ичюн котериледжек бахшышны, эписининъ энъ яхшысыны, мукъаддесини кетиринъиз.

30Оларгъа даа бойле айт:

Буларнынъ энъ яхшысыны кетиргенинъизде, бу левийлилерге армандан ашлыкъ ве шарап чапчагъындан шарап оларакъ сайыладжакъ. 31Сиз де, къоранталарынъыз да ондан ашамакъ мумкюн. Бу – Корюшюв Чадырында беджерген ишлеринъиз ичюн къазанчтыр. 32Буларнынъ энъ яхшысыны кетиргенинъизде, гуна къазанмайджакъсынъыз, Исраиль огъулларынынъ азиз бахшышларыны арамламайджакъсынъыз ве ольмейджексинъиз.

Currently Selected:

Сайылар 18: CTB

Highlight

Copy

Compare