Нехемья 3

Ерусалим дивары гъайрыдан къурула

1 # Узеир 10.6; Нех 3.30; 12.39; Йрм 31.38; Зек 14.10; Юх 5.2 Баш руханий Эльяшив ве онынъ къардашлары руханийлер ишке башлап Къойлар Къапусыны къурдылар. Олар къапунынъ къанатларыны эляллады ве ерине астылар, Юз Къуллесине ве Хананел Къуллесине къадар оларны элялладылар. 2#Узеир 2.34Онынъ янында Ерихон акъайлары чалыша эдилер, оларнынъ янында исе Имрийнинъ огълу Закъкъур къура эди.

3 # Узеир 2.35; Нех 12.39; 2 Тар 33.14; Цеф 1.10 Хассенаанынъ огъуллары Балыкълар Къапусыны къурдылар: олар къапу агъачларыны къойдылар, къанатларыны ерине астылар, сюргюлерини ве мандалларыны ерлештирдилер. 4#Узеир 8.33Оларнынъ янында Меремот диварны тюзете эди. (Меремот – Уриянынъ огълу, Урия – Хакъкъоцнынъ огълу эди.) Оларнынъ янында Мешуллам диварны тюзете эди. (Мешуллам – Берекиянынъ огълу, Берекия – Мешезавелнинъ огълу эди.) Оларнынъ янында Баананынъ огълу Цадокъ диварны тюзете эди. 5#2 Пад 14.2; 2 Тар 11.6; Ам 1.1Оларнынъ янында текъоалылар чалыша эди. Амма оларнынъ мырзалары Раббиси ичюн боюн эгип чалышмадылар.

6Пасеахнынъ огълу Ёяда ве Бесодеянынъ огълу Мешуллам Эски Къапуны тюзеттилер. Олар къапу агъачларыны къойдылар, къанатларыны ерине астылар, сюргюлерини ве мандалларыны ерлештирдилер. 7Оларнынъ янында гивонлы Мелатья ве меронотлы Ядон, эм де Гивон акъайлары ве Мицпа акъайлары чалыша эдилер. (Олар Фират дерьясынынъ гъарбий боюндаки виляетнинъ акимине бойсуна эдилер.) 8#Нех 12.38Оларнынъ янында Хархаянынъ огълу Уззиэл къуюмджы чалыша эди, онынъ янында исе мис къокъу япкъан адамнынъ огълу Хананья чалыша эди. Олар Ерусалим диварыны Кенъ диваргъа къадар тюзеттилер. 9Оларнынъ янында Ерусалим дживарынынъ ярысына башчылыкъ япкъан Хурнынъ огълу Рефая чалыша эди. 10Оларнынъ янында ве озь эвининъ къаршысында Харумафнынъ огълу Едая диварны тюзете, онынъ янында да Хашавнеянынъ огълу Хаттуш чалыша эди.

11 # Нех 12.38 Харимнинъ огълу Малкия ве Пахат-Моавнынъ огълу Хашшув башкъа ерде диварны ве Собалар Къуллесини тюзете эдилер. 12Оларнынъ янында Халлохешнинъ огълу Шаллум озь къызларынен берабер чалыша эди. Шаллум Ерусалим дживарынынъ ярысынынъ башлыгъы эди.

13 # Нех 2.13; 2 Тар 26.9; Нех 2.13, 15 Ханун ве Заноахнынъ сакинлери Вадий Къапусыны тюзеттилер. Олар къапуны япып, къапунынъ къанатларыны ерине астылар, сюргюлерини ве мандалларыны ерлештирдилер. Олар даа Кубре Къапусына къадар 500 метрге#3.13 500 метр – къ. еуд. «1 000 аммах». узангъан диварнынъ къысмыны къурдылар. 14#Йрм 6.1Бет-Хаккерем дживарынынъ башлыгъы, Рекъавнынъ огълу Малкия исе Кубре Къапусыны тюзетти. О, къапуны япып, къапунынъ къанатларыны асты, сюргюлерини ве мандалларыны ерлештирди.

15 # 4 Пад 25.4; Нех 2.14; 12.37; Йрм 52.7 Мицпа дживарынынъ башлыгъы, Кол-Хозенинъ огълу Шаллум Чокъракъ Къапусыны тюзетти. О, къапуны япып, онынъ устюне къапакъ япты, къапунынъ къанатларыны асты, сюргюлерини ве мандалларыны ерлештирди. Бундан гъайры о, падиша багъчасындаки Шелах хавузынынъ диварыны Давут Шеэринден энген мердивенлерге къадар янъыдан къурды. 16#3 Пад 2.10; Фаал 2.29Онынъ артында Бет-Цур дживарынынъ ярысынынъ башлыгъы, Азбукънынъ огълу Нехемья Давутнынъ дюрбесине къадар, къазылгъан хавуз ве джесюрлернинъ эвине къадар диварны тюзетти.

Диварны тюзеткен левийлилер

17Оларнынъ артында левийлилер чалыша эдилер. Банийнинъ огълу Рехум, онынъ янында Хашавья, Кеила дживарынынъ ярысынынъ башлыгъы диварны тюзетти. О, озь дживары ичюн чалыша эди. 18Оларнынъ артында агъа-къардашлары чалыша эди. Кеила дживарынынъ ярысынынъ башлыгъы, Хенададнынъ огълу Баввай чалыша, 19онынъ янында Мицпанынъ башлыгъы, Ешуанынъ огълу Эзер экинджи ерде, Кошедеки силяханеге котерилишине къадар диварны тюзете эди. 20#Узеир 10.6; Нех 3.1Ондан сонъ Заббайнынъ огълу Барукъ Кошеден баш руханий Эльяшивнинъ эви киришине къадар диварнынъ башкъа ерини гъайретнен тюзетти. 21#Нех 3.4Ондан сонъ Хакъкъоцнынъ торуны, Уриянынъ огълу Меремот Эльяшивнинъ эви киришинден эвининъ сонъуна къадар диварнынъ башкъа ерини тюзетти.

Диварны тюзеткен руханийлер

22Онынъ янында этрафларда яшагъан руханийлер диварны тюзете эди. 23Олардан сонъ, озь эвлерининъ къаршысында Биньямин ве Хашшув чалыша эдилер. Олардан сонъ Ананьянынъ торуны, Маасеянынъ огълу Азарья озь эвининъ янында диварны тюзете эди. 24Ондан сонъ Хенададнынъ огълу Биннуй Азарьянынъ эвинден Кошеге ве дивар тиремесине къадар диварнынъ башкъа ерини къура эди. 25#Йрм 32.2Узайнынъ огълу Палал Кошенинъ къаршысында ве падишанынъ юкъары эвиндеки къуллесининъ къаршысында, къаравулларнынъ азбары янында чалыша эди. Ондан сонъ Парошнынъ огълу Педая чалыша эди. 26#Нех 8.1, 3, 16; 12.37Офелде яшагъан Сарай хызметчилери Сув Къапусынынъ къаршысында шаркъий тарафны ве онынъ янындаки тышкъа чыкъкъан къуллеге къадар узангъан диварны янъыдан къурдылар.

Башкъа къуруджылар

27 # Нех 3.5 Ондан сонъ текъоалылар тышкъа чыкъкъан буюк къулледен башлап Офелнинъ диварына къадар диварнынъ къысмыны тюзеттилер. 28#2 Тар 23.15Атлар Къапусындан сонъ руханийлер озь эвининъ къаршысындаки диварны озьлери тюзеттилер. 29#1 Тар 3.22Олардан сонъ Иммернинъ огълу Цадокъ озь эвининъ къаршысындаки олгъан диварнынъ къысмыны тюзетти. Ондан сонъ Шекъаньянынъ огълу Шемая диварны тюзете эди. О, Шаркъий Къапунынъ къаравулы эди. 30#Нех 3.4Ондан сонъ Шелемьянынъ огълу Хананья ве Цалафнынъ алтынджы огълу Ханан диварнынъ башкъа ерини тюзетти. Олардан сонъ Берекиянынъ огълу Мешуллам озь яшагъан ери къаршысындаки диварны тюзетти. 31Ондан сонъ къуюмджынынъ огълу Малкия Мифкъад Къапусынынъ Незаретчи Къуллеси къаршысында, Сарай хызметчилерининъ эвине къадар ве алыш-веришчилернинъ яшагъан ерине къадар, кошедеки юкъары ханеге къадар янъыдан диварны къурды. 32#Нех 3.1; 12.39; Юх 5.2Дивар кошесиндеки юкъары ханеден Къойлар Къапусына къадар олгъан диварны исе къуюмджылар ве алыш-веришчилер тюзеттилер.

Currently Selected:

Нехемья 3: CTB

Highlight

Copy

Compare