Юхан 4
4
Иса ве самариели къадын
1Иса Ягъядан чокъ адамны сувгъа батырып чыкъаргъаны ве шегиртлерини арттыргъаны акъкъында хабер фериселернинъ къулагъына барып етти, ве бу Исагъа белли олды. 2#Юх 3.22(Аслында, Иса Озю халкъны сувгъа батырып чыкъармай эди, буны Онынъ шегиртлери япа эдилер.) 3#Юх 2.11-12Иса Еудиеден кетип, кене Галилеягъа ёл алды. 4#Лк 9.52-53Ёлда Самарие топрагъындан кечмек керек эди. 5#Баш 33.19; 48.22Иса Самариенинъ Сихар деген шеэрине кельди. Бу шеэр Якъуп озь огълу Юсуфкъа берген топракъкъа якъын эди. 6О ерде Якъупнынъ чокърагъы бар эди. Иса ёлдан ёрулып, раатланмакъ ичюн къуюнынъ янына отурды. Къарарнен уйле вакъты эди. 7Шу вакъыт самариели бир къадын сув чекмеге кельди. Иса онъа:
– Манъа ичмеге сув берсе, – деди. 8Исанынъ шегиртлери исе аш сатын алмакъ ичюн шеэрге кеткенлер.
Самариели къадын:
9– Сен еудий олып, насыл ола да, менден, самариели бир къадындан сув сорайсынъ? – деди. Еудийлер самариелилернен ич бир мунасебетте булунмай эдилер де.
10 #
Збр 35.10; Йрм 2.13; 17.13 Иса къадынгъа джевап берип:
– Эгер сен Алланынъ бахшышыны ве «Манъа ичмеге сув берсе», дегенининъ ким олгъаныны бильсенъ, Ондан сен озюнъ сув истер эдинъ, ве О санъа тири сув берер эди, – деди.
11– Эфендим! – деди къадын. – Сенде сув алмагъа къопкъа ёкъ, къую исе терен. Бу тири сувны къаерден чекесинъ? 12Бу къуюны бизге бабамыз Якъуп берген, о озю, балалары ве айванлары да ондан сув ичкенлер. Сен ондан буюксинъми, аджеба?
13Иса къадынгъа шойле джевап берип:
– Бу сувны ичкен адам кене сувсайджакъ. 14#Еш 55.1; Юх 7.38Лякин ким Мен береджек сувны ичсе, ич бир вакъыт сувсамайджакъ. Мен береджек сувны ичкен адамнынъ ичинде эбедий омюрге ынтылгъан чокъракъ пейда оладжакъ, – деди.
15– Эфендим, манъа бу сувдан берсе, мен энди сувсамайып, бу ерге сув чекмеге кельмейим, – деди къадын.
16– Барып, бу ерге акъайынъны чагъырып кель, – деди Иса.
17– Акъайым ёкъ, – деди къадын.
– «Акъайым ёкъ», деп, сен догърусыны айттынъ, – деди Иса. 18– Сен беш кере акъайгъа чыкъкъансынъ, шимди сеннен яшагъан адам исе акъайынъ дегиль. Буны сен догъру айттынъ!
19 #
Юх 9.20
– Эфендим, мен корем ки, Сен пейгъамберсинъ, – деди къадын. 20#Баш 12.6-7; 33.18; Текр 11.29; 12.5; 27.12; Къад 9.7– Баба-деделеримиз бу дагъ устюнде табынгъанлар. Амма сизинъ айткъанларынъызгъа коре, табынмагъа Ерусалимде керек.
21Иса онъа:
– Манъа инан, къадын! Ойле бир вакъыт келеята ки, Бабагъа не бу дагъда, не Ерусалимде табынаджакъсыз, – деди. 22#4 Пад 17.28-34; Збр 147.8-9; Фаал 13.23; Рим 3.1-2– Сиз неге табынгъанынъызны бильмейсиз, биз исе неге табынгъанымызны билемиз. Къуртулыш еудийлернинъ ярдымынен келир де. 23#Збр 144.18; Рим 8.15; Эф 6.18Амма ойле заман келеята ве энди кельген ки, акъикъий табынгъанлар Бабагъа Рухнен ве акъикъатнен табынаджакълар. Баба Озюне бойле табынгъанларны къыдыра. 24#2 Кор 3.17Алла – Рухтыр, ве Онъа табынгъанлар Рухнен ве акъикъатнен табынмакъ кереклер.
25 #
Текр 18.18; Мт 11.2; Юх 1.41 Къадын Исагъа:
– Билем ки, Месих келеята. Демек, Христос. О кельгенде, эр шейни бизге анълатып береджек, – деди. 26#Юх 9.37Иса къадынгъа:
– Сеннен лаф эткен Мен – Одырым, – деди.
27О дакъкъасы Исанынъ шегиртлери къайтып кельдилер. Онынъ бир къадыннен лаф эткенине шаштылар. Лякин ич бири: «Ондан не истейсинъ?» я да: «Онен не акъкъында лаф этесинъ?» – деп сорамады.
28Къадын исе савутыны шу ерде къалдырды да, шеэрге барып, адамларгъа:
29– Барынъыз, мен япкъан бутюн ишлеримни айтып берген адамны корюнъиз! Бельки О, Месихтир? – деди.
30Адамлар шеэрден чыкъып, Исанынъ алдына келип башладылар.
31Шу арада шегиртлери:
– Равви, аш ашаса, – деп Исаны чагъырдылар.
32Амма Иса оларгъа:
– Меним башкъа ашым бар, сиз оны бильмейсиз, – деди.
33Шегиртлер озьара:
– Бельки, бириси Онъа аш кетиргендир? – дедилер. 34#Текр 8.3; Юх 5.30; 6.38; 9.4; 14.31Иса исе оларгъа шай деди:
– Меним ашым – Мени Ёллагъаннынъ ирадесини беджермек ве Онынъ ишини битирмектир. 35#Мт 9.38; Лк 10.2Сиз: «Ормакъ вакътына даа дёрт ай бар», – демейсизми? Энди сизге айтам: козьлеринъизни котерип, тарлаларгъа бакъынъыз. Ашлыкъ чокътан агъарып, ормакъ ичюн азыр тура! 36#1 Кор 3.6-9Оракъчы иш акъкъыны ала ве эбедий омюр берекетини джыя. Бойледже, сачкъан адам оракъчынен берабер къуваналар. 37«Бириси сача, башкъасы ора», – деген аталар сёзю шу вазиетте догърудыр. 38Мен сизни озюнъиз замет чекмеген берекетни ормагъа ёллайым. Башкъалары замет эткен, сиз исе оларнынъ заметине къошасынъыз.
39О шеэрде яшагъан бир талай самариелилер Исагъа иман эттилер, чюнки олар къадыннынъ: «Бу адам мен япкъан ишлеримнинъ эписини айтып берди», – деген шаатлыгъына инангъан эдилер. 40Бойледже, самариелилер Исанынъ алдына келип, оларда къалмасыны истедилер, ве О, о ерде эки кунь къалды. 41Исанынъ сёзюни эшитип, даа чокъ адамлар иман этти. 42#Юх 1.29; 1 Юх 4.14Олар къадынгъа:
– Энди иман эткенимиз сенинъ айткъанынъ ичюн дегиль. Озюмиз эшиттик ве билемиз ки, бу, керчектен де дюньянынъ Къуртарыджысыдыр, – дедилер.
Иса падиша мемурынынъ огълуны тедавийлей
43 #
Мт 8.5-13; Лк 7.1-10 Эки кунь кечкен сонъ, Иса о ерден Галилеягъа кетти. 44#Мт 13.57; Мк 6.4; Лк 4.24(О, Озю: «Пейгъамбер озь ветанында урьметсиз къала», – дей эди.) 45#Юх 2.23Галилеягъа кельгенде, галилеялылар Оны яхшы къабул эттилер. Олар Ерусалимдеки байрамгъа барып, о ерде Исанынъ бутюн япкъан ишлерини корьген эдилер.
46 #
Юх 2.1, 12; 21.2 Сонъ Иса кене Галилеянынъ Кана шеэрчигине кельди. Анда О, сувны шарапкъа чевирген эди.
Къафарнаум шеэринде исе огълу хаста олгъан бир падишанынъ мемуры бар эди. 47Бу адам Исанынъ Еудиеден Галилеягъа къайткъаныны эшитип, Онынъ алдына барды ве олюм тёшегинде яткъан огълуны келип тедавийлемеси ичюн Исагъа ялварды.
48 #
Юх 2.18; 6.30; 1 Кор 1.22 – Сиз аджайип шейлер ве бельгилерни корьмегендже инанмайджакъсыз! – деди онъа Иса.
49– Эфендим, – деди Онъа падишанынъ мемуры, – огъланчыгъым ольмезден эвель, етип кель!
50– Эвинъе бар, огълунъ сагъ-селямет оладжакъ, – деди Иса.
О адам Исанынъ айткъанына инанып, кетти. 51О, даа ёлда олгъанда, къуллары оны къаршылап:
– Баланъ сагъ-селямет! – дедилер.
52– Саат къачта алы енгиллешти? – деп сорады о.
– Сыджагъы тюневин саат бирде тюшти, – деди къуллар.
53 #
Мт 8.13; Фаал 16.34; 18.8 Баланынъ бабасы, Иса онъа: «Огълунъ сагъ-селямет оладжакъ», – дегени шу вакъыт олгъаныны анълады. О озю ве бутюн эв халкъы Исагъа иман эттилер.
54 #
Юх 2.11
Бу, Исанынъ Еудиеден Галилеягъа келип косьтерген экинджи бельгиси эди.
Currently Selected:
Юхан 4: CTB
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2016