Якъуп 2

Адам айырманъыз

1 # Текр 1.17; 16.19; Мт 22.16; Лк 20.21; Рим 2.11 Агъа-къардашларым, шуретли Раббимиз Иса Месихке иман этип, адамларнынъ эписине бир бакъынъыз. 2Эгер сизинъ топлашувынъызгъа алтын юзюк ве паалы урба кийген бир адам кирсе, эм кирли урбада фукъаре бир адам да кельсе, 3ве сизлер, паалы урба кийгенге бакъып: «Буюрынъыз, тёрге отурынъыз», – десенъиз, фукъареге исе: «Сен о ерде тур» я да «Шу ерде, аякъларым астында отур», – десенъиз, 4сизлер адам айырып, яман ниетнен суд этмейсизми?!

5 # 1 Кор 1.27-28; 2 Кор 8.9; Сыр 2.9 Севимли агъа-къардашларым, динъленъиз: бу дюньянынъ фукъарелерини сайлагъан Алла Озю дегильми? О, оларны иманда зенгин япты ве севгенлерге сёз берильген Падишалыгъыны берди. 6Лякин сизлер фукъареге урьметсизлик косьтересиз. Сизлерни къыйнагъан, судгъа чекип алып баргъан байлар дегильми? 7Сиз адлангъан эйи Месихнинъ Адыны яманлагъан олар дегильми?

8 # Лев 19.18 Языда: «Якъын адамны озюнъни севгенинъ киби сев», – деп буюрылгъан. Эгер Падишанынъ бу эмирини беджерсенъиз, яхшы япасынъыз. 9#Чыкъ 23.2-3; Лев 19.15; Текр 1.17Амма адам айырсанъыз, гуна япасынъыз ве Алланынъ Къануныны бозып, къабаатлы оладжакъсынъыз. 10#Мт 5.19; Гал 3.10Ким Къанунны толусынен беджерсе, амма тек бир шейде гуна япса, о, бутюн Къанунны бозгъан киби къабаатлы ола. 11#Чыкъ 20.13-14«Аиле садыкълыгъыны бозма», – деген Алла даа «Адамнынъ джаныны алма», – деди. Эгер сен аиле садыкълыгъыны бозмасанъ, амма адамнынъ джаныны алсанъ, эп бир Къанунны бозгъан адам оласынъ.

12 # Якъ 1.25 Шунынъ ичюн, лаф эткенинъизде ве арекет эткенинъизде, азатлыкъ берген къанун боюнджа суд этиледжегинъизни унутманъыз. 13#Мт 6.15; 18.35; Лк 6.37Мерамет косьтермеген адам мераметсизликнен суд этиледжек. Мерамет исе укюмден устюн келе.

Иман ве хайырлы ишлер

14Агъа-къардашларым, эгер бир адам иманы акъкъында айтса, амма хайырлы ишлер япмаса, бунынъ не файдасы бар? Бойле иман оны къуртарып олурмы? 15Бир иманлы акъайнынъ я да къадыннынъ киймеге урбасы ве куньделик ашы олмаса, 16#Текр 15.7; Икм 21.13; Еш 58.7; Мт 25.35; Лк 3.11; 1 Юх 3.17-18биринъиз оларгъа: «Аман-эсен барынъыз. Къызынынъыз ве тойгъандже аш ашанъыз», – десенъиз, лякин оларнынъ беденине керек олгъан шейни бермесенъиз, бунынъ не файдасы бар? 17Бойле де иман: эгер иман эткен адам хайырлы ишлерни япмаса, онынъ иманы озю олюдир.

18 # Мт 7.16; Гал 5.6 Амма бириси: «Сенде иман бар, менде исе хайырлы ишлер бар», – демек мумкюн. Манъа хайырлы ишлерсиз иманынъны косьтер, мен исе санъа озь иманымны ишлерим ярдымынен косьтеририм! 19#Текр 6.4; Мт 8.29; Мк 1.24; 5.7; Фаал 16.17; 19.15Сен Алланынъ бир олгъанына инанасынъ. Догъру япасынъ! Амма шейтанлар да инаналар ве къоркъудан къалтырайлар!

20Эй, акъылсыз адам, ишлерсиз иман файдасыз олгъаныны анъламайсынъмы? 21#Баш 22Дедемиз Ибраим къурбан ерине Исхакъ огълуны багълап кетиргенде, озь хайырлы ишлеринен акъланды! 22#Еуд 11.17-18Коресинъми? Хайырлы ишлеринен бирликте онынъ иманы арекет этти ве ишлери ярдымынен къусурсыз олды. 23#Баш 15.6; 2 Тар 20.7; Еш 41.8; Рим 4.3; Гал 3.6Бойле этип: «Ибраим Аллагъа иман этти, ве Алла тарафындан бу онъа инсафлыкъ деп сайылды», – язылгъаны ерине кельди, ве Ибраим Алланынъ досту олып адланды. 24Анълашыла ки, адам тек иманынен дегиль, озь хайырлы ишлеринен акълана.

25 # Ехо 2.1, 16; 6.24 Ороспу Рахавнен де бойле эди: о, шеэрни гизлиден козеткен исраиллилерни къабул этип, оларгъа башкъа ёлнен къачып къуртулмагъа ярдым этти ве бу хайырлы иши ичюн акъланды. 26Джансыз беден олю олгъаны киби, хайырлы ишлерсиз иман да олюдир.

Currently Selected:

Якъуп 2: CTB

Highlight

Copy

Compare