Kata Lom 16

Kasaafoo

1Boot min iboñuluul áliinolaal Fóbe ammuu li bulok boot li ejanguwayi yata Sankile. 2Jiyabool booluul li kajaw kata Amaaŋenawu, loon bukanabuku kata Ateemit kuyaboolemuu booliil, ban li jilambenool li wahoowah wan emmuu jokool li wo li bukuluul. Akila humumool lalambenlamben bukan kameeŋe, lí ínje humumom.

3Jisaafom Filisila buko li Akilaas kammuu kufaalom kuloka boot li Yéesu Kilisita. 4Kulakolako li kuket min kufakenom buloŋ. Let ínje balewom eete isaliil, sijanguwasu feh sata bukanabuku kaletumuu kusuwif foof soote sisaliil. 5Jisaafom foof bukanabuku kata ejanguwayi yammuu li eluufayi yooliil. Jisaafom Efenet an íboolimuu ŋáa’. Okila ajandumuu feh áyinen li Yéesu Kilisita li etaamayi yata Aasi. 6Jisaafom Mali alokumuu ŋáa’ boot li bukuluul. 7Jisaafom Andolonik buko li Suniyaas kammuu bukanom li kufaalom foof kan jilakomuu li hukul̥. Koonosoono buko kúl̥uba bukan káamak li kufootalaku. Kujandom kúyinen li Yéesu Kilisita.

8Jisaafom Anfiliyakis an íboolimuu ŋáa’ li hujokoolahu han jibajumuu li Amaaŋenawu. 9Jisaafom Ilibeŋ ammuu áfaaloli aloka boot li Amaaŋenawu, buko li Sitakis an íboolimuu ŋáa’. 10Jisaafom Afeles, áhiisumuu kaanaku láyinenyinen li mal̥egen li Kilisita. Jisaafom bukanabuku feh kammuu li eluufayi yata Alísitobilis. 11Jisaafom Elojiyoŋ ammuu anom. Jisaafom bukanabuku kammuu li eluufayi yata Naalisiis káyinenumuu li Amaaŋenawu. 12Jisaafom Tilifen buko li Tilifoos, kammuu li bulok súf boot li Amaaŋenawu. Jisaafom foof Felisid an íboolimuu foof ban li áami li bulok ŋáa’ boot li Amaaŋenawu. 13Jisaafom Lúfis ammuu aloka áamak ata Amaaŋenawu. Jisaafom jaawool ammuu foof jaawom. 14Jisaafom Asenkilit buko li Filemoŋ, Eelimees buko li Fatulobaas, Eelimaas li kutuyolaal kammuu li buko. 15Jisaafom Filolog buko li Súli, Neele buko li áliinool Olenfaas, li bukanabuku feh kata Ateemit kammuu li buko.

16Jisaafoo bukuluul humumuul kasaafoo kata batuyaay. Sijanguwasu feh sata Kilisita sisaafuluul.

Fool li aan kata Lom kujuke to

17Kutuyom, ínje ummu li kal̥awuul min jíkaanum bukanabuku kájiyemuu bugiiloo li bubaj li bukuluul, ban li kunaak kuceeŋ kulimaku kan kuliikenewuulumuu min kújimen bukanabuku káyinenumuu li Kilisita. Jíloyiyiil. 18Bukan loon buko kulet li bulok boot li Kilisita ammuu Amaaŋenawu oololaal, bale boot li kalaku kooliil. Fan kunaak kuŋa’ kulim katiñowe, li balobe básuume min kubunt bukanabuku kahaasutumuu wahoowah. 19Li mal̥egenamu, bukanabuku feh kuhaase buu jítuulumuu Hulimahu Hásuumaahu. Mó mújimuu, súumonsuum ŋáa’ li bukuluul, bale lifañe min jibaj bújallo boot kakaan majake, ban jakum jikat wah min újiwuul li jikaan majakut. 20Ateemit ata kásuumaay muñeˈe li agunj Sayitaane li kootaku kooluul.

Kájiyaku kata Amaaŋenawu oololaal Yéesu kujow kulako li bukuluul!

21 Tímote ammuu afaalom aloka lasaafuluul, buko li Lísiyis, li Jaasoŋ buko li Sosifateel, kammuu bukanom.

22Injé Télisiyis an Fool alobumuu min ikiicool eleetalayi inye, lisaafuluul li kajaw kata Amaaŋenawu.

23Gáyiyis ayabommee boola lasaafuluul. Boola foof ejanguwayi feh ewoogemuu. Elaas ahahenemuu sídalamasu sata ésukayi yata Lom, lasaafuluul. Atuyolaal Kaalitis foof lasaafuluul.

[ 24Kájiyaku kata Amaaŋenawu oololaal Yéesu Kilisita kulako li bukuluul. Aameen!]#16:24 Hulimahu unhu hubajut li síliibal sakee li sihaanasu

Kasal kúbanum

25Usalaal Ateemit! Layilo alitenum káyinenaku kooluul li Hulimahu Hásuumaahu han iyiiŋenemuu. Ho hommuu hulimahu han iwaaleyemuu mata Yéesu Kilisita. Fan aliten káyinenaku kooluul naboo foof li kahaasaku kata mal̥egenamu mahaaseenutimuu, mayolimuu naanaŋ fiyo ŋáa’. 26Bale muñeˈe mal̥egenamu ummu múhiisihiis li síliibalasu sata kufulofetaku. Wahawu unwu Ateemit aano tomuu boot nanoonan, alobe min ubaj mantee bukanabuku feh li kuhaas mal̥egenamu ummu, min kúyinen li Yéesu ban li kútuulool.

27Usalaal Ateemit ájallomuu balewool. Máyiineniyamu mujow mulako moola boot nanoonan humum hata Yéesu Kilisita! Aameen.

Currently Selected:

Kata Lom 16: cskDBL

Highlight

Copy