Kata Lom 15

Uloŋaal loon Kilisita aloŋumuu

1Alolaal jabajaalumuu sembe li káyinenaku, lootaale ulambenaal kágootomuu li káyinenaku. Jakum uŋesaal wahawu wásuumolaamuu bale. 2Anoowan li alolaal laate aŋes min akaan afaalool súum boot li majake moola, min alitenool li káyinenaku. 3Li mal̥egenamu, Kilisita aŋesut wahawu wásuumoolumuu, bale loon Kilisita alobumuu Ateemit li Bakiicelabu:

«Ugelawu wata bukanabuku kagelemuu li awu, lí ínje ulowe#Ukijenawu 69:10.»

4Wahawu feh wakiici nomuu kat to, ukiicikiic boot kaliikenolaal wah. Li mal̥egenamu, Bakiicelabu busenewolaasen kátintimben min útukaal lit, boot yok nan oomaalumuu li ubajaal wahawu wan úkangumaalumuu li wo. 5Ateemit akaanemuu an min átuk lit ban li átintimbenool, ajow akaanuul jibaj kajamoo li tutooluul loon Yéesu Kilisita afañumuu, 6mantee li jísalum Ateemit, Atuubaawu ata Amaaŋenawu oololaal Yéesu Kilisita, li buyinum bano li hulim hano.

Yéesu Kilisita labiibil boot li bukanabuku feh

7Wahawu unwu újimuu, anoowan li bukuluul laate ayab afaalool boola jak loon Kilisita ayabuulumuu foof boot li máyiineniyamu mata Ateemit. 8Li mal̥egenamu boot min ilobuul kaanaku, Kilisita labiibil min alako aloka ata Kusuwifaku boot kakaan wahawu wan Ateemit alobumuu kakaan situubayiil sihaan, min áhiis kaanaku Ateemit alobumuu kakaan wah, fan akaan wo. 9Yéesu Kilisita labiibil foof mantee bukanabuku kaletumuu kusuwif li kumanen Ateemit humum hata káyiyenaku koola, loon Bakiicelabu bulobumuu:

«Mó mújimuu fan isali li tut bukanabuku

kaletumuu kusuwif,

ban fan ikijen min isal kajawaku kooli#2 Samiyeel 22:50; Ukijenawu 18:50.»

10Bakiicelabu li bulaañen boon:

«Bukuluul jaletumuu kusuwif,

ésuumansuum elako li bukuluul li bukanabuku

feh kata Ateemit#Dótelonom 32:43.»

11Bakiicelabu li bulaañen boon foof:

«Jisal Amaaŋenawu,

bukuluul feh jaletumuu kusuwif,

ban bukanabuku feh li kukijen min kusalool!#Ukijenawu 117:1»

12 Esay li alaañen aan:

«Akee li bubukoolumabu bata Jeese fan abil álaŋul,

fan ayito min aaken bukanabuku kaletumuu kusuwif,

ban fan kuŋa’ kákangumaku kooliil kukaan li akila#Esay 11:12.»

13Ateemit asenemuu kákangum, ajow akaanuul jibaj ésuumansuum yáamak, ban li akatuul kásuumaay káamak humum hata káyinenaku kooluul, mantee kákangumaku kooluul li kuluuk ŋáa’ li búkaanum bata sembaasu sata Buyinumabu Banabaabu.

Fool aloka ata Yéesu Kilisita laam

14Kutuyom, ínje humumom líyinenyinen kaanaku bukuluul jikankaan bukan kásuume ŋáa’; jihaase wahawu feh wan jóotimuu jihaas, ban jiyilo foof jinaak jisaaboo. 15Tin tameeŋe li eleetalayi inye, likiiculuukiic to kulim kal̥aal̥e, boot kawayil̥enuul wah wan jihaase. Likankaan mo, humum hata kájiyaku kan Ateemit asenommuu, 16min ilako aloka ata Yéesu Kilisita boot li bukanabuku kaletumuu kusuwif. Lisenoolosenoolo boot kawaale Hulimahu Hásuumaahu hata Ateemit, mantee bukanabuku kaletumuu kusuwif li kulako loon esalah yásuume Ateemit, yan Buyinumabu Banabaabu bukaane enab. 17Mó mújimuu, humum hata hujokoolahu húmbaam li Yéesu Kilisita, liyilo isaloolo mata bulokabu búmbaam boot li Ateemit. 18Li mal̥egenamu, éetimuu ikaañen ilob mata wah ukee, fan lako bale wahawu wan Kilisita ákaanummuu lí ínje. Lájowunjowum lí ínje min akaan bukanabuku kaletumuu kusuwif kútuul Ateemit. Lákaanunkaanum mó li kulimaku kúmbaam li bakaanelabu búmbaam. 19Buyinumabu bata Ateemit bújowunjowum lí ínje min bukaan búhiisenum banooban bájaahaleniye. Muñowu liwaalemuu Hulimahu Hásuumaahu hata Kilisita tanootan, kítum Yeelusalem boot yok li etaamayi yata Iliili. 20Lijoojok min iwaale Hulimahu Hásuumaahu bale ban bukanabuku kujamutumuu an li alob mata Kilisita. Likankaan mo jakum bil iteef ilaken li huteef huleeteema han akee ateefe aban, 21min nab li hulimahu han Bakiicelabu bulobumuu:

«Bukanabuku kan kulobutumuu moola,

fan kujukool,

ban bukanabuku kajamutumuu li kulob moola,

fan kúnaanum#Esay 52:15.»

Fool li alob mata ejow boot Lom

22Wahawu unwu foof úhilommuu ñameeŋe ibilum booluul. 23Bale muñeˈe libane bulokabu búmbaam li halaabahu unhe. Baje simit sameeŋe nan súumom ŋáa’ min ibil boot booluul. 24Lifañe min ibil nan emmuu li ilako li ijow boot li etaamayi yata Esifaañ, ibil ijukuul min ilako li bukuluul jatit min jilambenom, mantee li iyili ijow boot bo. 25Bale muñeˈe boot min ijow li ésukayi yata Yeelusalem boot kalamben bukanabuku kata Ateemit. 26Li mal̥egenamu, bukanabuku kata Ateemit kammuu li etaamayi yata Maseduwaan li kammuu li etaamayi yata Akaay kujoojok min kulamben bukanabuku kata Ateemit ban li kukaan kusukateen kata ésukayi yata Yeelusalem. 27Buko humumiil kujoke min kukaan mo, ban li mal̥egenamu laalu ecaagen yan kookeniil, mata kusuwifaku kugaboogaboo li buko kásooniyenaku kabilummuu li Buyinumabu, mó mújimuu bukanabuku kaletumuu kusuwif koote kuŋa’ wahawu wan kubajumuu min kulamben kusuwifaku. 28Nan emmuu li iban bulokabu umbu, ban li iseniil wahawu wan kommuu li kusenom boot li buko, fan íjowum booluul ítowum ihaaŋ boot li etaamayi yata Esifaañ. 29Lihaase een nan emmuu li ibil booluul, fan ibil li kásooniyenaku foof ko feh kata Kilisita.

30Kutuyom, boot min íjowum li Amaaŋenawu oololaal Yéesu Kilisita li húbooliyahu hata Buyinumabu Banabaabu, min iyaakuul eenuul: uhankenaal li mano min utajaal li kal̥aw Ateemit boot lí ínje. 31Jil̥aw mantee li ifak li kuŋen kata bukanabuku káyinenutumuu kata etaamayi yata Súde,#15:31 Bukanabuku umbuku Kusuwif koom mantee foof wahawu wan kusenommuu boot kájowetum Yeelusalem, bukanabuku káyinenumuu li Kilisita li kuyab wo bo li kásuumaay. 32Kaan momuu, ban súumumuu li Ateemit, fan íliiŋul booluul li ésuumansuum ló, min ifan iyool̥o jatit booluul. 33Ateemit an kásuumaay kubilummuu li akila, ajow alako li bukuluul foofuul feh. Aameen.

Currently Selected:

Kata Lom 15: cskDBL

Highlight

Copy