Kata Fílib 2

Kawalenoolowaku, li maluukamu mata Kilisita

1Nokoomuu loon li mal̥egenamu jibabbaj kátintimben li hujokoolahu hooluul li Kilisita, li nokoo loon jibabbaj kawankulen li húbooliyahu hoola, li nokoo loon jibabbaj hujokoo li Buyinumabu, li nokoo foof loon babbaj to húbooli li kabonket, 2kama jibaj mayine mano, húbooli hano, ban li jinaak jiyinoo wahawu wanolawu, mantee ésuumansuumayi yúmbaam li eluuk ŋáa’. 3Jakum jikaan wah li kayinoo kata búhaŋoo, mantee foof boot huŋes kasal kabajut jáliŋ, bale li kawalenoolo, jijok bukan kaabuku loon kuhaŋuuhaŋ. 4Jakum an li bukuluul aŋes wahawu wajakumuu boot li akila balewool, bale aŋes foof wajakumuu boot li kaabuku. 5Jiloŋ li tutooluul loon bukan káyinene li Yéesu Kilisita kuloŋemuu:

6Okila lalele li Ateemit,

mata okila afimmuu min aano Ateemit yan no

boot nanoonan.

Imban, min alemuu li Ateemit,

aŋesut min átuk tó lit li kaleyaku koola li Ateemit.

7Bale, okila humumool anonge min akat bo

wahawu wan abajumuu feh,

min aŋa’ búnokoo bata aloka,

ban li akaanoolo alako an li tut bukanabuku,

ban ésukayi li ejokool loon an.

8Li awalenoolo,

ban li akaan loon Ateemit

aloboolumuu boot yok nan aketumuu,

eket yata li ekuluwa.

9Wahawu unwu újimuu foof Ateemit li atebenool

boot tan haŋumuu feh matebo,

10bájum wahoowah feh wáami li emitayi,

li etaamayi, li wáamimuu kata láala etaamayi,

li úkuntuŋ hákil Yéesu wo bajame kajawaku koola,

11imban anoowan feh li alob kaanaku,

Yéesu Kilisita ammuu Amaaŋenawu,

boot li máyiineniyamu mata Ateemit Atuubaawu.

Jilako sihiitum li adunaayi

12Kutuyom kan iboolaat, wahawu unwu újimuu, loon jifiyomuu li jilako bukan kátuulom, muñeˈe jinaak jihaŋ mátuul, ban jakum lako ínje to bale, bale háŋum ínje balet to. Jilok li ekole li kateelen ló, mantee kafakaku kooluul li kujuki. 13Li mal̥egenamu, Ateemit akaanumuu li bukuluul húfañum li kayile kata kakaan wah, naboo li húnongumahu hoola hajakaahu.

14Jikaan wahawu feh bámummunoolut, báwonnoolut, 15bájum li jilako bukan kan an ayilaat awataten, bukan kajake, bañiil bata Ateemit batilut tanootan hákil bukanabuku kacolutumuu li kajakutumuu kata adunaaye. Joote jiwuŋen hákil bukanabuku umbuku loon siwuutasu sammuu li emitayi. 16Jifañumuu jikaan mo, li jítuk lit Hulimahu hata buloŋabu. Jikaan momuu, fan iyili ísangoolum mooluul li hunakahu nan Kilisita ammuu li álaañul, mata fan híis kaanaku bulokabu búmbaam li sílaamasu súmbaam inti kakaal̥o.

17Káyinenaku kooluul kulakolako kasila kan jikaane boot li Ateemit. Nokoomuu loon boot min húsimahu húmbaam húyuwi min lako búsimen famen to kooluul, kama fan súumom, ban bukuluul foof fan súumuul. 18Li manolamu, bukuluul foof eete súumuul, ban li jilako li ésuumansuum boot lí ínje ló.

Fool li aboñ Tímote buko li Efáfulodit li kata Fílib

19Líyinene li Amaaŋenawu ban let fiyo, mantee li ijam kaciimanciim kooluul, li ibaj kawankulen. 20Li mal̥egenamu, bajut akee ábute li Tímote abaje uyinoolawu wanolawu li wúmbaam. Layinooleyinoo mooluul li mal̥egenool. 21Kaabuku feh mooliil bale kuyinoole, kuyinoolut mata Yéesu Kilisita. 22Bukuluul humumuul jihaase buu Tímote áhiisumuu kaanaku lakankaan an ajake, ban jihaase foof buu ínje li akila jilokumuu boot li Hulimahu Hásuumaahu, loon añiil alokemuu li atuubawool. 23Okila lifañumuu min íboñuluul nan emmuu ijuk jak buu éemi li jowom nokoo. 24Hiitonhiit kaanaku Amaaŋenawu muñeˈe fan akatom min ibil ínje humumom ijukuul.

25Lijuujuk li een jaajak min ílaañenuluul atuyolaal Efáfulodit, ammuu anaboolawom ata bulok li ata bútaj, okila an jíboñulomuu abil alambenoolom li wahawu wan jokommuu li wo. 26Lafanfañ ŋáa’ min ajukuul foofuul feh, ban kaanookaan buyina ŋáa’, min bukuluul jijamumuu kaanaku lásomuusomut. 27Li mal̥egenamu, lásomutensomut ajow alako li aket, bale Ateemit láyiyenooyiyen, ban inti okila bale láyiyene, bale ínje foof láyiyene jakum bil ibaj buyina bahaŋ maluuk. 28Boot min isommen íboñuluul ó’ mantee li jilaañen jibaj ésuumansuum bukuluul bajukelool, min buyinaabu búmbaam buban. 29Muñeˈe kama jiyabool li ésuumansuum ló loon atuyuul li Amaaŋenawu. Joote jiluuken bukan loon okila, 30mata lalakoweene li aket boot mata bulokabu bata Kilisita. Lalakoweene li asen buloŋool min alambenom li wahawu wan bukuluul humumuul jiyilaatumuu jikaan boot lí ínje.

Currently Selected:

Kata Fílib 2: cskDBL

Highlight

Copy

Compare