Kata Kolos 4

1Kunahaanake, jinaak jikaan emiikeelayi yooluul wah wacole ban li jijokiil kule keb. Jiwayil̥o kaanaku bukuluul foof jibaje Anahaan li emitayi.

Kulim kata kasaab

2Jihanken li kal̥awaku ban li jijooŋoo to li ko, min jinaak jisal Ateemit. 3Jil̥aw foof boot li áloli mantee Ateemit li ásenoli bútin bajake min jiwaale hulimahu hoola bukanabuku, min jiyili jikitteniil wahawu wan kuhaasutumuu li Kilisita, wájiwommee li eeno li hukul̥. 4Jil̥aw min iyili íhiis jak wahawu unwu wahaasutimuu, loon éetimuu íhiis wó.

5Jiloŋ li bújallo ló hákil bukanabuku káyinenutumuu li Kilisita. Nanoonan nan jiyilo jikaan majake, li jikaan mo. 6Kulimaku kooluul kujow kulako nanoonan kulim kásuume. Jihaas buu jóotimuu jinaak jibag anoowan jak.

Kasaafoo kúbanum

7Atuyolaal Ticik an uboolaataalumuu, fan alobuul múmbaam feh. Lakankaan aloka ata mal̥egen li anaboolawom li bulokabu bata Amaaŋenawu. 8Boot min iboñuluul okila humumool, bájum li abil alobuul mata buloŋabu bóololi baabe, ban li awankulenuul foof. 9Ticik fan kúnabooluul buko Onéesim ammuu an ata booluul, ban li áami atuyolaal ata mal̥egen an uboolaataal, átuke lit li káyinenaku. Kúliiŋulumuu, fan kuhebuul wahawu feh wabajumuu baabe.

10Alisitaak an kukul̥oomuu li mano lí ínje, lasaafuluul. Maak, ammuu atuyawu ata Balunabaas, lasaafuluul foof. (Bukuluul jijanjam kulimaku kan ilobumuu mata Maak: abilumuu booluul, li jiyabool jak). 11Yéesu an koonemuu Súsutiis, lasaafuluul foof. Li kusuwifaku feh káyinenumuu li Yéesu, umbuku kúhaaji bale kommuu li bulok lí ínje boot li Jáyiiyaju jata Ateemit. Kútintimbenontintimben ŋáa’.

12Efafulaas ammuu foof an ooluul, lasaafuluul. Lakankaan aloka ata Yéesu Kilisita, ban akatut kal̥aw súf boot li bukuluul, bájum li jítuk lit ban li jank jijow jikiben li káyinenaku kooluul, min jinaak jikaan li mal̥egen loon Ateemit afañumuu. 13Li mal̥egenamu, ínje humumom liyilo ilob moola kaanaku lalokelok ŋáa’ boot li bukuluul, boot kata ésukayi yata Lawodise li boot kata ésukayi yata Híyelofoliis. 14Lík ammuu abuntena buko li Demaas kan uboolaataamuu, kusaafuluul.

15Jisaaf kutuyolaal kammuu Lawodise. Jisaaf foof Ninfaas li bukanabuku feh kata ejanguwayi yammuu li eluufayi yoola. 16Nan bukuluul jommuu li jijanga eleetalayi inye booluul jiban, li jikaan manooman min ejangayi foof li ejanguwayi yata kata Lawodise. Bukuluul foof li jijanga eleetalayi yammuu li ebilumul Lawodise. 17Imban li joon Alisif ajooŋoo to min akaan bulokabu jak, ban Amaaŋenawu asenoolumuu kakaan.

18Injé humumom Fool ítuke li kaŋenom min ikiiculuul kulimaku unke min isaafuluul. Jiwayil̥o kaanaku li hukul̥ leem.

Kájiyaku kata Ateemit kujow kulako li bukuluul.

Currently Selected:

Kata Kolos 4: cskDBL

Highlight

Copy

Compare