Kata Kolos 2

1Li mal̥egenamu, lifañe min jihaas buu bútajabu búsengimuu, ban éemimuu li bo boot li bukuluul, boot li kata ésukayi yata Lawodise, li boot li bukanabuku feh kahaasolutommuu. 2Wahawu wan ifañumuu, wo wommuu min bukuluul jibaj kawankulen li uyinumuul, ban li jijokoo lit loon an ano li húbooliwoo ló, imban li jibaj butuuko báamak. Muñowu jommuu jikaan, li jiyili jihaas mahaaseenutimuu mata Ateemit, mammuu Kilisita. 3Li Kilisita hubajahu feh hata bújallo li hata kahaasemiñ huyolimuu.

4Lilobuulob wahawu unwu, jakum bil an abuntumuul li balobe básuume. 5Maayeet min kite eenimuu ilet ínje humumom li bukuluul, bale buyinumom bumbu li bukuluul. Súumonsuum ŋáa’ min jibajumuu kajamoo, li min jítukumuu lit káyinenaku kooluul li Kilisita.

Buloŋabu ban uyabaalumuu li mal̥egen li Kilisita

6Emmuu jiyayyab Yéesu Kilisita loon Amaaŋenawu ooluul, kama jikatool min acolen buloŋabu booluul. 7Jiya kuhaa’ kalite li akila, ban li jánkum li akila, min jihaŋ malit li káyinenaku kooluul loon kuliikenuulumuu. Jinaak jisal Ateemit ŋáa’.

8Jíkaanum jakum bil an abuutumuul li Sihekej#2:8 Sihekej: Li kufalansewaay yo yommuu Fílosofi (Philosophie). Laalu émalimiñ yabilumulo li bújallo bata ál̥ahukowan, li sembaasu sata uyinumawu wajakutaawu wammuu li adunaayi, bale inti li Kilisita ebilumulo. 9Li mal̥egenamu, bóonowabu feh bata Ateemit, bumbu li eniilayi yata Kilisita. 10Bukuluul li hujokoolahu hooluul li okila jíyabummuu wahawu feh boot to, okila ahaŋumuu sembe sanoosan sata uyinumawu wajakutumuu li huhaane hanoohan.

11Li Yéesu Kilisita bukuluul jíteyenumimuu búkut, kateyen búkut kan kaŋen kata an kukaanut, bale li Kilisita kubilumulo ban to láfulenummuu wahawu wakaanemuu eniilayi ehoofoo. 12Nan kúbatiisewuulumuu, no jihokoolimuu li Kilisita, ban li jiyitowumul foof li eketayi li akila, mata jíyinenyinen li sembaasu sata Ateemit sayitenumuloomuu li eketayi. 13Naanaŋ, bukuluul jiketenket mata uhoofoolawu wooluul úji, ban foof mata jilakowut bukan kata Ateemit. Muñeˈe Ateemit lasenuusen buloŋ mata hujokoolahu hooluul li Kilisita húji, ban li abonket uhoofoolawu woololaal feh. 14Ateemit lábubbuj kaayiitaku dán uhoofoolawu woololaal ukiicimuu, kanaake kúhiisolaamuu buu luhoofoolaalumuu le, li wahawu wan ootaalumuu ucaamaal Ateemit. Lábubbuj wahawu unwu feh li kabaaŋaku kan abaaŋ womuu li ekuluwaayi. 15Muñeˈe Ateemit li abot sembaasu sata uyinumawu feh wajakutumuu, li sata kunahaanaku kata wo feh, ban li ayiiŋen wo hákil ésukayi feh, ban foof li akaan wo únabul kata búsol kayooŋaku kata Añoolool aheek womuu.

16Mó mújimuu, jakum jikat an min atiibuul mata wah wan jitiñe li mata wah wan jihobe, mantee foof mata kagaan, mata hul̥een huwunkul, li mata húyiiyaayahu hata kusuwifaku. 17Wahawu unwu feh hin élinga yata wahawu wammuu li ebil. Mal̥egenamu mo mummu li Kilisita. 18Jakum jikat bukanabuku kafañumuu ŋáa’ kakaan loon kuwalenoolowalenoolo, ban li kunaak kumanen kumalaka, min kúfulenuul li busuuhenabu bammuu booluul. Bukan loon muñowu kulobelob ŋáa’ mata wahawu wan kujukumuu li kahimmo. Fan kunaak kukaal̥o li katebenoolo, ban li kunaak kuyinoo mata wahawu wata adunaaye bale. 19Kujokut li Kilisita ammuu húkowahu hata Ejanguwayi. Li mal̥egenamu, Kilisita ájimuu eniilayi foof yo feh li ékuumeni, ban li éjokoolum li síŋullumasu sata yo li kuŋawaku foof kata yo, min yank loon Ateemit afañumuu.

Buloŋ li eket li Yéesu Kilisita

20Kaanumuu loon bukuluul jiketooketoo li Kilisita, min jífu’ li makaanelamu mata uyinumawu wata adunaayi, wáa lí újiwuul li jinaak jiloŋ loon eenimuu li kuŋen adunaayi joom? Wáa újiye li jinaak jikaan loon adunaayi elobumuu: 21Jakum uŋa’ wahawu unwe! Jakum ujaken unwa! Jakum ugo’ waaye? 22Siluwaasu unsu sikaanikaan boot li wah waatut ulaañen ubaj jáliŋ wo baŋaleli uban min kaan wah. Laalu hin siluwa li baliikene bata bukan. 23Li mal̥egenamu, siluwaasu unsu ujuke somuu li oon bújallo bóomi ló, mata silollob buu anoowan ammuu li anab li bútinabu boola, mata kawalenoolo, li mata katek eniil, bale siluwaasu unsu sibajut jáliŋ. Soonosoono to boot kakaan eniilayi súum bale.

Currently Selected:

Kata Kolos 2: cskDBL

Highlight

Copy

Compare