2 Kata Koolent 8

Sijanguwasu sata Maseduwaan li silamben kata Yeelusalem káyinenumuu

1Kútuyoli, áloli jifañe min jikaanuul min jihaas kájiyaku kan Ateemit asenumuu síjanguwasu sammuu li etaamayi yata Maseduwaan. 2Bukanabuku kammuu li sijanguwasu unsu kubabbaj sílaam sáamak, bale ésuumahukowayi yooliil elulluuk ŋáa’, yok kunaak kusen ŋáa’ maayeet min kukite koonomuu bukan kagaye ŋáa’. 3Kusensen wahawu wan kuyilimuu kusen, maayeet jow haŋ to, ban kuyitoyito li kuyaan kusen. Injé liyilo ilob mo mata lijuujuk. 4Kúyaakoololiyaakoo ŋáa’ mata min jikatiil min kukaan to kaŋeniil li bulokabu bata kalambenaku kata bukanabuku kata Ateemit kammuu li ésukayi yata Yeelusalem. 5Wahawu wan kukaanumuu uhanhaŋ wan áloli jiyinooleenumuu. Kujanjand kusenoolo buko humumiil boot li Amaaŋenawu, ban li kusenoolo boot li áloli. Kukankaan mo loon Ateemit afañumuu. 6Tit okila anaake ayabumuu booluul wahawu wan bukanabuku kunaake kusenumuu. Wahawu unwu újimuu áloli li jiyaakoolool min ahabel akaan booluul bulokabu umbu bajakumuu ŋáa’, loon átoŋ bomuu. 7Muñeˈe bukuluul jibaje wahawu feh ŋáa’. Jibaje káyinen, jihaase jak buu lobemuu, jihaase wahawu wata Ateemit. Jihankenehanken li wahoowah feh, ban húbooliyahu han jíhiisuulumuu hunhu li bukuluul. Mó mújimuu, joote kama jinaak jihaŋ masen ŋáa’.

8Injé ilet li katuuŋuul jikaan wahawu unwu. Lilollob loon muñaˈa boot min iyoob min ijuk buu jil̥egene eeno li húbooliyahu hooluul, ho bakittenooleyi li kahankenaku kata kaabuku. 9Li mal̥egenamu, bukuluul jihaase kájiyaku kata Amaaŋenawu oololaal Yéesu Kilisita. Akila ammuu an abaje, li akat bo hubajahu hoola feh min abil alako an agaye humum hooluul, mantee bugayabu boola li bújiwuul li jilako bukan kabaje.

10Boot min ilobuul kayinoolaku kúmbaam: hútiim bukuluul jilakomuu kútinaa li kasenaku, ban bukuluul jifañe li jisen. Jaajak ŋáa’ min jihanken li bulokabu umbu. 11Muñeˈe kama jihabel bulokabu umbu jikaan. Jikaan to uyinumuul min jihabel bo loon foof jijokumuu min jikaan bo. Jikaan bo loon jiyilimuu. 12Li mal̥egenamu, ukaan tomuu buyinumi min usen wah li kayinoo kajake, Ateemit fan ayab wahawu wan usenumuu. Fan ajuke li wahawu wan ubajumuu, bale inti li wahawu wan ubajutumuu.

13Eenutuulumuu jikaanoolo bugay jiyiliwum jilamben kaabuku. Lifañe min bukanabuku kujoki le keb. 14Muñeˈe bukuluul jumbuku li hubaj, ban jiyilo jiŋa’ wahawu wawuuhumuu min jilamben bukanabuku kabajutumuu. Ban líiŋumuu hunak hakee, bukanabuku kabajutumuu li kubaj jow wuuh ban bukuluul jibajut, li kuŋa’ wahawu wawuuhumuu min kuhin kulambenuul. Kaanumuu loon muñaˈa, li lako jijokoole jile keb, 15loon Bakiicelabu bulobumuu:

«Anawu abajumuu ŋáa’, abajut jow wuuh,

anawu abajumuu jatit, bajut wah wan abajut.»

Tit li kufaalool kan kunaboolemuu

16Ateemit akaanumuu li buyinumabu bata Tit kahanken min alambenuul loon áloli, ajow asali. 17Nan áloli jiyaakoomuu Tit mata min abil boot booluul, let mantee lansaan bale éehe’ fan abil, bale lasommensommen min abil alambenuul, ban okila ajoke min abil boot booluul. 18Boot min kúnaboolul li atuyolaal an sijanguwasu feh sisalemuu humum hata bulokabu boola bata kawaaleyaku kata Hulimahu Hásuumaahu. 19Bale inti wahawu unwu bale. Sijanguwasu sil̥usool boot min alako anaboola óololi li kañaahoolaku unke kata bulok bata kakaan wah wajake, ban kúsenolimuu boot li kasal kata Amaaŋenawu humumool, li káhiis kaanaku jifanfañ min jilamben.

20Alóli jumbuku li kajuke to jakum bil an ayili áwatatenoli mata buu jítukumuu sídalamasu saluuk muñowu, san bukuluul jisenumuu. 21Li mal̥egenamu, káyinoololi feh ko kommuu huŋes min jikaan wahawu wajakumuu, inti hákil Amaaŋenawu bale, bale foof hákil bukanabuku.

22Jíboñuluuboñ atuyolaal min ánaboolul li buko. Jiyoobooyoob ñameeŋe li wah wameeŋe min jijuk, ban jijuujuk kaanaku lakankaan an ajasowe. Muñeˈe lahaŋe majaso, mata lababbaj kákangum káamak li bukuluul. 23Tit akila anaboolawom laam, ban áloli fóofoli jóomi li bulokabu boot li bukuluul. Kutuyolaal kaabuku kánabulumuu li Tit, buko sijanguwasu síboñuliil, min kulok boot li kasalaku kata Kilisita. 24Kama jíhiisiil kaanaku jíbooliyiibooli li mal̥egen, min sijanguwasu síyinen, ban li sihaas soon min áloli jibajumuu ésuumansuum li bukuluul, jikooŋe.

Currently Selected:

2 Kata Koolent 8: cskDBL

Highlight

Copy