2 Kata Koolent 9

Ateemit lafanfañ an asene wah li ésuumansuum ló

1Bajut jáliŋ yanooyan min ikiiculuul min ilobuul mata sídalamasu san jisenumuu boot li bukanabuku kata Ateemit kammuu li ésukayi yata Yeelusalem. 2Lihaase buu jikaan tomuu uyinumuul li kalambenaku, ban li isaloolo humum hooluul hákil kata Maseduwaan, min eeniil: «Kutuyolaal kammuu li etaamayi yata Akaay, kábilum hútiim kufaleˈe boot kasen.» Kahankenaku kooluul kújiji bukan kameeŋe li buko li kufañ min kusen. 3Boot min íboñuluul kutuyolaal, jakum bil kasalaku kan isaloolomuu humum hooluul mata kasenaku, kulako kakaal̥o. Mó mújimuu lifañe min jifale jilako to loon ilobumuu. 4Jikaanut momuu, ban kata Maseduwaan li kúnaboolul lí ínje boot booluul jibil jíliiŋul jitookutuul mafaleˈe, fan káanoli ñisuu mata min jíkangummuu li bukuluul ŋáa’. Bukuluul humumuul fan jihaŋ masuu. 5Mó mújimuu li ijok kaanaku jaajak min ilob kutuyolaal min kúyabulom hákil booluul, min kujoojen wahawu wan bukuluul jilobumuu kasen. Nan emmuu li íliiŋul, li itook wahawu unwu feh bafaleˈe, min híis kaanaku jisensen wo li ésuumansuum, inti loon an atuuŋuul min jisen.

6Jiwayil̥o hulimahu unhe:

«An al̥ukumuu jatit,

fan abil abaj jatit.

An li al̥uk ŋáa’,

fan abil abaj ŋáa’.»

7Anoowan laate asen loon ajokumuu li buyinumool, ban jakum baj ejok li ehaaseen, mantee foof loon an atuuŋool min asen. Ateemit, an asene wah li ésuumansuum ló lafañumuu. 8Ateemit layilo asenuul wahoowah feh wajake, bájum li jibaj nanoonan wahawu feh wan jokuulumuu li wo, ban fan jibaj jifamen to wahawu wan jommuu jinaak jiŋa’ min jikaan wah feh wajake. 9Loon Bakiicelabu bulobumuu:

«Lagabengaben, li asen kusukateenaku;

macolamu moola li moono to boot nanoonan.»

10Ateemit asenemuu sígul anawu al̥ukemuu, ban li asenool sinaaŋasu san atiñemuu, fan asenuul sígul ban li akaan so sibukoo. Fan akaan macolamu mooluul mubaj ebukoolum yameeŋe. 11Fan asenuul hubaj li wahoowah feh, min jinaak jiyili jísuum li bukanabuku. To bukan kameeŋe kóotummu kusal Ateemit humum hata wahawu wan jísenolimuu jijow jiseniil. 12Bulokabu umbu bata kayabaku kata wahawu wan bukuluul jisenumuu, bulakowut boot kalamben bale bukanabuku kata Ateemit li wahawu wan jokiilumuu li wo, bale fan búji foof bukan kameeŋe li kúsalum Ateemit li kal̥aw. 13Mín súumiilumuu li majakamu mata bulokabu booluul, mo kusalumuu Ateemit mín jítuulumuu Hulimahu Hásuumaahu hata Kilisita loon jilobemuu. Fan kusal foof Ateemit mata másuumamu mooluul li kagaboolaku kan jigaboomuu wahawu wooluul li buko li kaabuku feh. 14Fan kul̥aw boot li bukuluul, min kúhiisuul húbooliyahu han kúbooliwuulumuu, humum hata kájiyaku káamakaku kan Ateemit asenuulumuu. 15Ateemit ajow asali mata kájiyaku koola kan an ayilaatumuu alob mata ko.

Currently Selected:

2 Kata Koolent 9: cskDBL

Highlight

Copy