1 Kata Tesalonik 5
5
1Kutuyom, tookut min jikiicuul mata taŋayi li mata nay Amaaŋenawu ammuu li álaañul. 2Bukuluul humumuul jihaase jak kaanaku hunakahu hata Amaaŋenawu fan hubil an bahaasut loon ákuu abilemuu li huk. 3Nan bukanabuku kommuu li koon: «Muñeˈe lubajaale kásuumaay, muñeˈe let úkoliyaal wahoowah,» no unnu búyiik bommuu li buyaan bulowiil, loon sílaam silowemuu anaale ahalete, ban an li buko let afak. 4Kutuyom, bale bukuluul jilet li élim mata min bil hunakahu unhu hugoobuul loon ákuu. 5Li mal̥egenamu, bukuluul foofuul feh bañiil bata mawuŋe joom, bañiil bata tihunak. Uletaal bukan káami li ehuka, mantee foof li élim. 6Mó mújimuu, ootut úmooliyaal loon bukan kaabuku, bale lootaale ukaanaal to sijijolaal, ban jakum uwuuhenaal wahoowah li buloŋolaal. 7Mata bukanabuku kámooliyemuu, li huk kúmooliye; kákaliyenoolemuu li huk kúkaliyenoole. 8Bale alolaal bañiil bata etihunaka loomaal, ban ootut uwuuhenaal li wahoowah. Lootaale uŋalaal káyinenaku li húbooliyahu kulako ebangalayi yoololaal yaŋali kaan kájufo. Kákangumaku kata fan ufakaal ko kommuu li kulako káhandolaal kata mañ. 9Mata, Ateemit akaanutolaal to boot min ubil ubujaal katek li etindihuuñayi yoola, bale min úbajumaal kafakaku li Amaaŋenawu oololaal Yéesu Kilisita. 10Mata Kilisita lakeeket boot li ololaal, bájum, ulakowaal li buloŋ mantee foof li uketaal, li úloŋumaal li akila nan ammuu li abil. 11Mó mújimuu, jinaak jiwankulenoo ban li jítintimbenoo loon jifimmuu min jikaane.
Kasaab li kasaaf kúbanum
12Kutuyom, jil̥awuul min jiluuken bukanabuku kammuu li bulok súf li bukuluul, buko kan Amaaŋenawu akaanumuu hákiluul boot min kookenuul min foof kuliikenuul. 13Jíhiisiil kaanaku jiluukeniiluuken ŋáa’ ban li jíbooliyiil, mata bulokabu ban kommuu li kakaanaku búji. Kásuumaay kubaj li tutuul.
14Kutuyom, áloli jumbuku li kal̥awuul kaanaku: Jihab bukan li bukuluul kafañut kakaan bulok bal̥uule. Jiwankulen bukanabuku kákol̥l̥imuu, ban li jilamben kágootomuu. Jímuñ bukanabuku feh. 15Jíkaanum, jakum bil an akaanuul majakut li jiluken, bale jiŋes nanoonan min jinaak jikaanoo majake, ban li jikaan foof majake bukanabuku feh.
16Jilako nanoonan li ésuumansuum. 17Jakum jilako to bal̥awut, 18jisal Ateemit li wahoowah feh. Wahawu unwu Ateemit afañumuu min jikaan li buloŋabu booluul li Yéesu Kilisita.
19Jakum jihok sambunasu sata Buyinumabu Banabaabu bammuu li bukuluul; 20jakum jibes kulimaku kabilummuu li Ateemit. 21Bale jilaso jak wahoowah feh, min jinab li wahawu wajakumuu, 22ban li jitey wahoowah feh wajakut.
23Ateemit asenemuu kásuumaay ajow akaan min jilako li mal̥egen bukan koola, ban li afooy humumahu hooluul foof ho feh, li uyinumawu wooluul, saalasu li siniilasu sooluul, jakum bil an ajuk majakut li bukuluul, boot li hunakahu nan Amaaŋenawu oololaal Yéesu Kilisita ammuu li abil. 24Ateemit ahooñuulumuu fan akaan wahawu unwu feh, mata alobumuu wah fan akaan wo.
25Kutuyom, jil̥aw foof boot li áloli.
26Jisaaf kutuyolaal feh kasaafoo kata batuyaay. 27Liyaakuul, li kajawaku kata Amaaŋenawu: jijanga eleetalayi inye kutuyolaal feh.
28Kájiyaku kata Amaaŋenawu oololaal Yéesu Kilisita kujow kulako li bukuluul.
Currently Selected:
1 Kata Tesalonik 5: cskDBL
Highlight
Copy
Compare
Share
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.
