JOHN 1
1
Kharingwui Tui
1 #
Hao 1.1; 1 Joh 1.1; Phon 19.13; Joh 17.5. Haokaphokli Tui chi leisai, Tui chi Vareli ngasosai, kala Tui chi Varena. 2Kharewui eina Tui chi Vareli ngasosai. 3#Col 1.16; 1 Cor 8.6; Heb 1.2. Ot saikora awui mangā eina kasāna kala sākahai saikora hi a mazangla kasā maleilakmana. 4#Joh 5.26; 11.25; 14.6. Awuili kharing leisai, kala kharing chi mikumowui kahorna. 5#Joh 9.5; 12.46. Kahor china tangkhamangli horngasaka kala tangkhamangna chili mayuirarmana.
6 #
Mk 1.4; Mat 3.1; Lk 3.3; Joh 1.19-23. John kaho Varena chihokharā mi akha leisai. 7Saikorana awui manga eina shitsang khavai kahor chiwui shākhi samikida a kharāna. 8Kahor chi a maningmana, kha chiwui shākhi mikhavai kharāna. 9#1 Joh 2.8. Mi kachiva̱li horkhangasaka khamashunga kahor chi okathuili rākhamina. 10Tui chi okathuili leisai kala awui mangā eina okathui hi sakhuilala okathuina ali matheithuwa. 11Ana awui ramli rai, kha awui mibingna ali makhuisangthuwa. 12#Gal 3.26; Joh 3.18; 1 Joh 5.13. Kha awui mingli shitsangda ali khuikasanga, asheewui lah asāwui kaphaning lah mikumowui kaphaning eina maningla 13#Joh 3.5; 1 Pet 1.23; Jam 1.18; 1 Joh 3.9. Varewui kaphaning eina kapharā saikorali ana Varewui naongarā ngasā khavai pangshap mi.
14 #
Rom 1.3; Gal 4.4; Phil 2.7; 1 Tim 3.16; Heb 2.14; 1 Joh 4.2. Kala Tui chi asā ngasāhaowa kala lukhamashan kala khamashung pemting eina ithumwui alungli raokthui. Avāvawui Naohonaotong sāda ana samkaphang awui tekhamatei chi ithumna yanga.
15 #
Joh 1.30. Johnna awui pongli shākhi mida vaoda hānga, “‘Iwui thili rāki kaje mipa china ili reimei, kaja ava ili rida leihairakasāna’ da ina kahāng mipa chi hina.” 16#Col 1.19; 2.9; Eph 1.23; Rom 5.21. Awuili pemting kahaiwui vang ithumna lukhamashanwuitungli lukhamashan ngarorda samphanga. 17#Joh 7.19. Ain hi Moseswui mangā eina mi, lukhamashan eina khamashung-khangarong hi Jishuwui eina rai. 18#Sho 33.20; Joh 6.26; 1 Joh 4.12; Joh 3.11. Khipānakha Vareli matheilakranga; Avāva̱wui makāli khalei Naoho-naotongmāngna ali theingasaka.
Ra̱hikme Johnwui Chānpao
(Mat 3.1-12; Mk 1.1-8; Lk 3.1-18)
19 #
Joh 1.6. Jerusalemli khalei Jihudibingwui kathānabingna pāngmonbing eina Levitebingli chihovāda Johnli “Na khipākhala?” da angahān ngasaka. 20#Joh 3.28. Johnna khikha mangalarlakla mashungrik eina hānga, “I Khrista chi maningmana” da ngahānkai. 21#Mat 11.14; 16.14; Mk 9.13; Mat 17.13; Khal 18.15; 18. Chieina athumna “Chithākha na khipākhala? Elijahla?” da ngahāna.
“Maningmana” da Johnna ngahānkai.
“Na marānla?” da athumna ngahāna.
“Maningmana” da ana ngahānkai.
22Chieina athumna hānga,
“Ithumli kashirātabingli unghāng khavai
‘Na khipākhala’ kaji hāngmilu.
Na khalattana na khipāna jikhala?”
23 #
Isa 40.3; Mk 1.3; Mat 3.3; Lk 3.4. Ana Isaiah marānwui tui eina hithada hānga,
“Prohowui shongfa ngatar ngasaklu da lamhāngli vaokazat akhon chi ina”
24Phariseebingna kachiho athumna Johnli rāhānga, 25“Na Khristala maning, Elijahla maning, marān chila maningakha, khiwui vang eina ra̱hikhamikhala?” 26#Mk 1.7-8; Mat 3.11; Lk 3.16. Johnna ngahānkai, “Ina tara̱ eina ra̱hikmi, kha nathumwui ngachaili akha nganingda khalei chi nathumna matheimana. 27Iwui thili kharā chi ana, I awui pheihop khara̱ eina tangda makhalāmiphayomana.” 28#Joh 3.26; 10.40. Saikora hi Johnna ra̱hikmi khavai apam Jordankong vāklaida khalei Bethanyli kashokna.
Varewui Yaonao
29 #
Joh 1.36; Isa 53.7; Ots 8.32; 1 Pet 1.19; Phon 5.6; 1 Joh 3.5. Akhama kathā Jishu rākharā theida Johnna hānga, “Yanglu, okathuiwui morei khuithuikhame Varewui Yaonao! 30#Joh 1.15. ‘Iwui thili akha rārāli, ava ili reimei, khikhalajila ava ili rida leihaira kasāna’ da ina kahānga chi hipāna. 31Ila ali matheisāmana, kha Israelnaobingli a khipākhala da chithei khavai ina tara̱ eina ra̱hikkhamina.” 32#Mk 1.10; Mat 3.16; Lk 3.22. Johnna shākhi mida hānga; “Manglāna kazingramwui eina nāsha̱ thada tai kala awuitungli tākapa̱ ina thei. 33I ali matheisāmana, kha tara̱ eina ra̱hikmi khavai ili kashirāta china ili hānga, ‘Manglāna tāda tākhangasāma, nana katheipa chi Manglā Kathara eina ra̱hikkhame china. 34Ina chi theihaira kala ina nathumli kahāngna, a Varewui Naomayara chilaka.’”
Sākhangatha̱ Kharebing
35 #
Lk 7.18. Akhama kathā Johnna awui sākhangatha̱ khanili ngasoda chili nganingsai, 36kala Jishu zatkasā theida hānga, “Yanglu, Varewui yaonao!” 37Sākhangatha̱ khani china awui kahāng chi shāda Jishuwui thi shurthuwa. 38Jishuna ngareiunga kala ani shurzatkasā chi theida hānga, “Khi phākazatkhala?”
Anina ngahānkai, “Ojā, na kali pamkhala?” 39Jishuna ngahānkai, “Rāyanglu” (Chitharan ngazinwui pung mati shākha tāhairasai). Chieina anina ali ngasovāda awui pamkhavai athei kala chithang ali ngasopamhaowa. 40#Mat 4.18-22; Mk 1.16-20; Lk 5.2-11. Johnwui tui shāda athi shurkhavā khani chiwui ngachaili akhava Simon Peterwui agato Andrewna. 41#Dan 9.25; Joh 4.25. Ana hengsāda ama Simonli samphangda hānga, “Ithum Messiahli samphanghaira.” (Tui hiwui kakhalatva Khrista kajina). 42#Joh 21.15-17; 1 Cor 15.5; Mat 16.18. Chieina Simonli Jishuwuili thānvai.
Jishuna ali yanglaga hānga, “Na Johnwui naomayara Simon kaho china, kha nawui aming Cephas hora.” (Hiwui kakhalata Peter kajina).
Philip eina Nathanaelli Kaho
43 #
Mat 10.3; Joh 6.5; 12.21; 14.8. Akhama kathā Jishuna Galileeli vākhavai ngarāna, kala ana Philipli samphangda hānga, “Ithi shurlu.” 44(Philip hi Andrew eina Peterwui keinung Beth-saida kaho chiwui mina). 45#Lk 24.27. Philipna Nathana-elli samphangda hānga. “Moseswui ainli kapi kahai kala marānbingnala kapi kahai mipa, Josephwui naomayara, Nazarethwui Jishu chili ithum samphanghaira.” 46#Joh 7.41; Mk 6.2. Nathana-elna hānga, “Nazarethwui eina khamathā ot shokpairala?” “Rāyanglu” da Philipna ngahānkai. 47Jishuna awui ngalemli Nathana-el rākharā kathei tharan, ana awui pongli hānga, “Yanglu, chukkhara̱ khikha makhalei Israelna; khayon khikhala maleimana.” 48Nathana-elna ali ngahāna, “Nana ili kathada theikhala?” Jishuna ngahānkai, “Philipna mahokhuiranglakha na khaorārongwui azingli pamkasā ina thei.” 49#Laa 2.7; Mk 15.32; Joh 12.13. Nathana-elna Jishuli ngahānkai, “Ojā, na Varewui Naomayarana! Na Israelwui awungana!” 50Jishuna hānga, “Ina nali khaorārongwui azingli thei da kahāngwui vang shitkasangla? Nana hili hakkhamei kachungkha theifara.” 51#Lk 3.21; Hao 28.12. Kala Jishuna athumli hānga, “Kachangkhat eina ina nathumli kahāngna, nathumna kazingram shokahai theira, kala Varewui kazingraobingna miwui Naomayarawuitungli kakā katung theira.”
Currently Selected:
JOHN 1: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.