MATTHEW 3
3
John Ra̱hikmewui Tamkachithei
(Mk 1.1-8; Lk 3.1-18; Joh 1.19-28)
1 #
Mk 1.3-8; Lk 3.2-17; Joh 1.6-8,19-28. Atam chitharan John Ra̱hikmena Judeawui lamhāngli pao hāshokrai. 2#Mat 4.17; Mk 1.15. “Ningngateilu, kaja kazing wungram nganaishunhaira.” 3#Isa 40.3. John hi Isaiah marānna hānghaikasā;
“Kachikathāna lamhāngli vaozata,
‘Prohowui shongfa ngarānlu,
awui apong ngatar ngasaklu’” kaji china.
4 #
2 Wung 1.8; Zec 13.4; Pāng 11.22. Johnna uthā eina sākakhui kachon ngavai, sāhuiwui shānneira̱ nei kala khaoh eina khuira̱ awui kashakazāna. 5Chitharan Jerusalemli, Judea katongali kala Jordan kongwui kuikhamareili khalei kha̱ saikorawui eina mi tarākha awui ngalemli rai. 6Athumna athumwui morei hāngphatta ana athumli Jordan kongli ra̱hikmi.
7 #
Mat 12.34; 23.33; 1 Thes 1.10. Pharisee eina Sadducee kachungkhana ra̱hik khavaiwui vang kharā chi ana kathei tharan athumli hānga, “He phara̱wui naongarābing! Rāki kaji malungkhavātwui eina yāmkhavai nathumli khipāna hāngkhala? 8Nathum khalatta ningngateichaohaira kaji otsak eina chitheilu, 9#Joh 8.33; Rom 4.16. kala nathum khalatta ‘Ithumwui avāva̱ Abraham lei’ da maphaninghaialu; ina nathumli kahāngna kaja ngalungbing hiwui eina Varena Abrahamli nao kachungkha semmishapa. 10#Mat 7.19. Aruila thingrongbingwui angayungli ngahā parhaida lei. Chieina athei khamathā makhamathei thingrong kachiva̱ ta̱teklaga meilungli horsanghaora. 11Ning khangateiwui vang ina nathumli tara̱ eina ra̱hikmi, kha iwui thili rārāda khalei A chiya ili reimei, I awui pheihop phungkida matik machāmana. Ana nathumli Manglā Kathara kala mei eina ra̱hikmira.” 12#Mat 13.30. Awui pāngli yāmkok lei kala lanpumli khalei mā hurmathākhuida kapanga mā chi chumli kazipkhuira, kha ahikbing chi mashimitkapai meilungli riktāhaora.
Jishuwui Ra̱kahik
(Mk 1.9-11; Lk 3.21-22)
13 #
Mk 1.9-11; Lk 3.21-22; Joh 1.31-34. Chiwui thili ali ra̱hikmi ngasakida Jishuna Galileewui eina Jordan kongli Johnwuili rai. 14Kha Johnna awui ning suitā ngasakida, “Ili nana ra̱hikmitha̱ki kajina, laga nali ra̱hikmi khavai ili rāli?” da hānga.
15Kha Jishuna ali ngahānkai, “Hithāsāhaoranu! kaja Varena ngarān kahai chi ungshung khavai hi sāngayilaka.” Chieina Johnna mayāhaowa.
16Jishuli ra̱hikmihailaga tara̱wui eina shokkhaleoda yanglu, kazingram shoda Varewui Manglā chi nasha̱ thada awuitungli tākapa̱ chi ana thei. 17#Mat 12.18; 17.5; Mk 9.7; Lk 9.35; Laa 2.7; Isa 42.1. Kala yanglu kazingramwui eina akhon akha vaorai, “Hi Iwui khaluma Naomayarana, Ina ali ningyāng unglaka.”
Currently Selected:
MATTHEW 3: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.