LUKE 23
23
Pilatewui Mangāli Khuikhavā
(Mat 27.1-2; Mk 15.1-5; Joh 18.28-38)
1 #
Mat 27.1-2; Mk 15.1; Joh 18.28. Chiwui thili athum katonga ngakarthuida Jishuli Pilatewui mangāli 2#Lk 20.25. khuivālaga hithada kasotsanga, “Mipā hina ithumwui yurli mashongachei ngasakta Caesarlila shai mami khavai khāma kala akhalatta Khrista Awunga akhana ji.” 3#Mat 27.11-12; Mk 15.2-3; Joh 18.29-38; Lk 22.70. Pilatena ali ngahāna, “Na Jihudiwui awungalā?” Ana ali ngahānkāda hānga, “Chi nana hānghaira” 4#Lk 23.14,22,41; Mat 27.24; Joh 19.4,6; Ots 13.28. Chieina Pilatena pāngmon akhokabing eina yarui ashangva̱ chili hānga, “Mipā hiwui khayon khikha masamphangmana.” 5Kha athumna pangmeida hānga, “Awui tamkachithei china Judea ngalei katongali pa̱ngapā ngasakhaira. Hi ana Galileewui eina haophoklaga ara hilila rāshunghaira.”
Herodwuili Chihokhavā
6Pilatena chi kashā eina, “A Galileewui milā” da ngahānna. 7Jishu hi Herodna khamunga ngaleiwui eina kharāna da Pilatena kathei eina ali Herodwuili chihovai, atam chitharan Herodla Jerusalemli leisai. 8#Lk 9.9; Ots 4.27-28. Herodna Jishuli kathei eina ringphālakhaowa, kaja awui otsakwui pongli tarākha shahairasāda atam kasāngkhawui vang theingailak eina leisai kala matakhak kahai machut samphangra da chihānsai. 9#Mk 15.5. Chieina ana Jishuli khangahān kachungkha sai, kha ana khikha mangahānkāmana. 10Chili nganingkasā pāngmon akhokabing eina ain kathemabingna Jishuwuitungli zakshilāk eina phena. 11#Mk 15.17-19; Joh 19.2-3. Herod eina awui shipaibingnala zeida mana̱shiya. Chiwui thili wungnao sāri ngavaimilaga Pilatewuili chihovāluishithaowa. 12Chithang eina thuida Herod eina Pilate mashithaowa, kaja rida ani khani yangshi ngaroksai.
Jishuli Shaothat khavaiwui Tuitak
(Mat 27.15-26; Mk 15.6-15; Joh 18.39—19.16)
13Pilatena pāngmon akhokabing kathānabing kala yaruibingli hokhuiserda hānga, 14#Lk 23.4,22,41. “Nathumna mipā hili mashongachei khangasaka mina da khuirai, ina nathumwui miktāli khari-kharāda ngahānyanghaira, kha awuitungli kaphen saikora chi khikha khamashung masamphangmana. 15Herodnala masamphangmada ithumwuili chihoraluishit kajina. Ana thikhangayi khalāng otsak khikha masāhaimana. 16#Lk 23.22; Joh 19.12-14. Chiwui vang eina ali hāngmachinlaga chihohaora.” 17Makānkhami phanit kachida phātop kazang akhali athumwui vang chihomichinga.
18 #
Mat 27.20-23; Mk 15.11-14; Ots 3.13-14; Joh 18.38-40; 19.14-15. Kha athumna khokkha sāda vaowa, “Mipā hili shaothathaolu! Kala Barabbasli chihomilu”— 19keinungli tui shokkhangasakwui vang kala mi shaokathatwui vang Barabbasli phātop sanghaisai. 20Pilatena Jishuli chihongaihaoda athumli hāngluishita; 21kha athumna, “Krushli shaothathaolu, Krushli shaothathaolu!” da panglāk eina vaowa. 22Kakathumali ana hānga, “Ana khi khayon sāhaokhala? Ana thikhangayi apong khikha masamphangmana. Chiwui vang eina ina ali hāngmachinlaga chihohaora.” 23#Mat 27.26; Mk 15.15. Kha athumna marmeikharda ali shaothatphalungra da vaohaowa kala athumwui tuina yuihaowa. 24Chieina athumwui kapo athishurda Pilatena khamayā mihaowa. 25Chieina mi shaokathata phātopli sanghaikasā Barabbasli chihomihailaga Jishuli athumwui ningkachāng chi sākhavai Pilatena horsangmihaowa.
Krushli Shaokathat
(Mat 27.32-44; Mk 15.21-32; Joh 19.17-27)
26 #
Mat 27.32; Mk 15.21; Joh 19.17. Athumna Jishuli thānkazat tharan kha̱ramwui eina kharā Cyrenewui Simon kaho mi akhali tukkhuilaga krush chi chiphunda Jishuwui khanukli shurzat ngasaka. 27Kala mi kachungkhala shurvai. Chiwui ngachaili Jishuwui vang malungringda chapkhangachā, sikafa sha̱naobingla zanga. 28#Lk 21.23-24; 19.41-44. Kha Jishuna athumli ngareiungda hānga, “Jerusalemwui naongalāva̱bing, iwui vang machapalu, kha nathum khalattawui vang kala nanaongarāwui vang chaplu. 29Khikhalajila ‘Yanglu, naokashumva̱, nao makapharāva̱, kala na̱ makashimanva̱, athum sokhami ngasāranu’ da hangki kaji atam rārāli. 30Chitharan athumna kaphungli ‘Ithumli khaminrorlu’ kala ‘Leisumsumli ithumli kakhayinlu’ da hāngra. 31Kala thingna matekta leilakha chithākha thengkahai tharan khi shokrakhala?”
32Kala Jishuli ngasoda yomnao khanilila shaothat khavai thānvai. 33#Mat 27.33-44; Mk 15.22-32; Joh 19.17-24. Athumna Mikuira̱ kaho apam chili vākashung eina Jishuli krushli kala yomnao khani chili, akhana yāshong, akhana uishong da shaothata. 34#Ots 7.60; Laa 22.18. Jishuna hānga, “Avā, athumli pheomilu, athumna khi kasākhala da matheimana.” Kala awui kashankachon ngayar khavai athumna ka̱lā yanga. 35#Lk 4.23. Mibing china chiwui ngalemli nganingda ngashānyangda leilakha, Jihudiwui kathānabingna zeida hānga. “Ana mi kateiliva huishapa, A hi Varewui kapangkakhui Khristana jiakha akhalatta huikhuiranu” 36#Mk 15.23; Laa 69.21. Shipaibingnala mana̱shida atheira̱ kathur rāmikhaningda 37hānga, “Na Jihudiwui awungana jiakha nakhalatta huikhuilu.” 38Kala awui kuishakli. “Hi Jihudiwui Awungana” da kapihai.
39Yomnao khani chiwui ngachaili akhana, “Na Khristana kaji maningmalā? Nakhalattala kala inilila huikhuilu” da zeida hānga. 40Kha akhapā china hānga, “Nala ngaraikachā shongrān samphangda leilaga Vareli mangacheemalā? 41#Lk 23.4,14; 22. Iniva inina sākahai chiwui athei samkaphangna, kha ava khikha khalāng makhalei mina.” 42Kala ana hānga, “Jishu, nana nawui wungramli kazang tharan ili kaphaningungmilu.” 43#2 Cor 12.3; Phon 2.7. Chieina Jishuna hānga, “Kachangkhat eina ina nali kahāngna, na aja ili ngasoda Paradiseli pamra.”
Jishuwui Kathi
(Mat 27.45-56; Mk 15.33-41; Joh 19.28-30)
44 #
Mat 27.45-56; Mk 15.33-41; Joh 19.25-30. Ara chi pung katharukawui atamna, kala pung kachiko atam eina tangda apam saikora ngamitinghaowa, 45#Sho 26.31-35; Heb 9.8; 10.19. zimikla mahorthu kala khorumshimwui kachon rānkahai chila khani sāda kākhaowa. 46#Laa 31.5. Chiwui thili Jishuna panglāk eina vaoda, “Avā, nawui pāngli imanglā horsangli!” da hānglaga thihaowa. 47Kashokshok chi theilaga raimi shākhawui akhavā china Vareli sochikatta hānga, “Makahatlakla, mipā hi khamashunga mina.” 48Kashokshok saikora yangkhavai kazipkasā mi saikorana otshot chi theida malungkaphelaga shim hanungserhaowa. 49#Lk 8.1-3; 23.55-56; 24.10. Awui theikhamasuia saikora kala Galileewui eina athi shurkharā sha̱naobing chila khalāda nganinglaga otsak saikora ngashānyanga.
Jishuli Kachifa
(Mat 27.57-61; Mk 15.42-47; Joh 19.38-42)
50 #
Mat 27.57-61; Mk 15.42-47; Joh 19.38-42; Ots 13.29. Chitharan Judeawui keinung Arimatheawui eina kharā Joseph kaho mayarnao akha leisai. A hi hangva̱ akhavāna kala kaphā khamashunga mina. 51Athumwui otsak chili a mazangmana kha Vare wungram kharā ngaraikapama mina. 52Mipā hina Pilateli Jishuwui angun apoi. 53Ana angun chi khuitālaga kachon khamanaka akha eina romhai, kala mi khipālikha machizanlakrang kaji kashokakhui lungkhur chili chizana. 54Chithang khangarān kasā zimiksho ngasāsai kala sabbath haophokki jiurasai. 55Galileewui eina ngasokharā sha̱naobing chi Josephli shurvālaga chikhurla kala kachizanla athei, 56#Mk 16.1; Sho 12.16; 20.10. Chiwui thili athumna shimli latunglaga nganamkaphā thao ayur-ayā khangarān sakhui.
Sabbaththang ningkhami athishurda athumna ngasāmkhui.
Currently Selected:
LUKE 23: TANGBSI
Highlight
Share
Copy
Want to have your highlights saved across all your devices? Sign up or sign in
Tangkhul Naga Bible - Kathara Bible
Copyright © 2014 by The Bible Society of India
Used by permission. All rights reserved worldwide.